Is 35 - A Txꞌan Biblia Yin Kꞌanjobal 1989

A Israel chi meltzoj bay Sión

¹ Tzalojokab aj tz'inan tx'otx'. Xumaclokokab takin tx'otx'.

² Ayokab is xumaquil axca yet an chochol, ayokab is tzalojc'ulal, elokab lenaj chi yila'. A Dios ok watx'nen oc sic'libil, axca watx'il yili Líbano, tol yax tx'otx' wal sic'libil, axca witz Carmelo, axca c'apax yac'alil Sarón. Masanil anima ok ilon yin is mimanbilal, c'al yipalil Cham Jehová co Diosal.

³ Aek oc yip is k'ab eb c'unjabinak. A eb c'unbinak yakan, iptzejek eb.

⁴ Alek bay eb cabtak c'ul: Tec'bajek e ba, manchak ex xiwi, tix e Dios ok ex colon el ti'. Axa eb ajc'ul oc e yin xin, ok alay oc yailal eb axca wal is mojalil, quex chi.

⁵ Catawal tu' bian, ok ilwan eb c'am chi ilwi, axa eb chacan ok yab eb.

⁶ Axa eb chi ay beyi ok watx'jok oc bey eb axca bey no tx'ucchej. Axa bitni aj eb c'amc'alta' chi je' k'anjab tu', yujtol xiwil aej ok ajol bay tz'inan tx'otx'.

⁷ A bay takin tx'otx', najablak ok yunej, xan a bay takin tx'otx' tu', xiwil aej ok ajolok. A bay cajan ec' no ok tinani', a tu' ok ch'ibaj te aj c'al an junco.

⁸ A bay tu' ok ec' junok miman be, ok yikcan aj jun be tu', Be eb yet-xa Dios. A eb man watx'ok, atac'ala' yalon ley, c'am chi je' yec' eb bay tu'. A eb yobtakwom, man ok je' yikban c'aytok mac chi ec' bay jun be tu'.

⁹ Man ok apnok no coj, tamwal juntzanxa no no' ay is may bay tu'. A bay jun be tu' ok ec' eb colbilxa.

¹⁰ A mactxel max col Cham Jehová, ok bitnok eb yuj tzalojc'ulal, cax ok apnok eb bay Sión. Ayc'al tzalojc'ulal eb yin tojbalk'inal, ok chaloj watx'ilal c'al tzalojc'ulal yuj eb, axa c'ayaj yailal tu', c'al ok'ilal.