Is 33 - A Txꞌan Biblia Yin Kꞌanjobal 1989

A Cham Yajaw ayoc yipok co c'ul

¹ Ok'bal ach c'ul, ach c'aywajwom tol c'amto mac chach c'ayon elok, ach iom aytek satej, tol c'amto mac chi ion aytek a sat. A yet ok a bekon a c'aywaji, ok ach c'aylay elok. A yet ok a bek eon aytek satej, ok ilay c'apax aytek a sat.

² Mamin Jehová, ok' wal a c'ul jin on, tol yip ach co c'ul. Ocan jetok yet junjun c'u. A yet ay yatakilal, colonc'al el xin.

³ A yet chi yaben eb conob tol chi tit owal, chi toj eb elok. A yet chach jay colwaj ayon, chi toj mimek conob elok.

⁴ Axca chi yun c'ayon el no chapulín awoj, caywal tu' ok yun sic'laytok is tzet yetal eb ajc'ul tu'.

⁵ A Jehová, Cham Axac'al Ocok, cajan Cham bay satcan, ok yikbaj Cham eb aj Sión yin yak'on eb watx'c'ulal c'al tojolal.

⁶ A Cham ok ak'on tec'anilal bay eb aj Sión tu'. A jelanilal c'al ojtakbilal ok yak' Dios, a' ok oc is colbanilok eb; axa ikemalil bay Jehová, a ton is miman beyomalil eb tu'.

⁷ Abek wal yel yaw eb soldado bay yina yuj xiwilal. Abek wal yok' eb chekbiltok yaon oc junc'ulal.

⁸ A belak max cancan tz'inanok, c'amxa mac chi ec'jab bay yuj xiwilal. Max etax el is lajti' eb. Max intaknelay el eb testigo, yujtol c'am mactxel tol ay yelapnok.

⁹ Max cuscan aj tx'otx' tx'otx', max etaxcantok yili. A Líbano max q'uixwi canajok, yujtol max k'aklay aj is teal. Axa Sarón max yutcantok ba yin tz'inan tx'otx'al, axa Basán, c'al witz Carmelo max el t'iranok.

¹⁰ Yuj tu xin, chi yal Jehová bay eb conoblak: A wal tinani' xin, ok in aj wanok, tol ok in tx'ox masanil in mimanbilal.

¹¹ A tzet yetal max e nabalnej, c'al tzet yetal max e watx'nej, naba k'alemc'al elok. Ok in xutok in cak'ek', axa tz'acantok tu'.

¹² Tan ok yuncantok conoblak, ok chawaj is k'ak'al axca chaw k'ak'al te takin q'uix.

¹³ Mac ex najat ayex, c'al ex cawil ayex, ilek wal xin, tzet yetal mayal wunej. Chi cam e yojtakneni tol chic'al je' wuj, ẍi Jehová.

¹⁴ A eb yobtakwom, max c'ayaj c'ul eb bay Sión, cax xiwilal max on eb c'am Dios yul sat. Chi yalon eb: A Jehová axca jun k'ak'ej c'aywajwom yayji, c'amc'al chi tani. ¿Mac on ok je' co cajay yetok? ẍi eb.

¹⁵ Watx' yet mac chi beybalnej tojolal cax k'anej yel chi yala', c'am chi yal c'ul chi oc beyomal yuj chaon tumin yin ewantakil, c'am chi yaltok yet yin mak'oj cam anima, tamwal chi yut ba yin tol c'am chi yil yobtakil.

¹⁶ A ton mac axca tu xin, c'am tzet ok onok, axca tol cuartel bay cajan, cax ayc'al lobej, c'al yuc'a'.

¹⁷ Ok e yil yin junok rey yetok is mimanbilal junelxa, ok apnok makbej conob ti' tac'al najat.

¹⁸ A yet ok e naontek e xiwilal yet yalantok ok mi e yal axca ti': ¿Baytal ay nak tx'ok conobal chi k'anon tojlabal? ¿Baytal ay nak chi bison ch'en torrelak yuj nalayi, jantak is beyomal co conob? quex chi mi.

¹⁹ Manxa ok e yil yin eb tx'ok conobal xiwil luesal tu', eb anima tx'ok k'anjabi, c'am chi nachaj el is ti' e yuj.

²⁰ Ok e yil Sión, conobal yet co k'in, a ton Jerusalén, conob bay ok ayjok numumial. C'am bak'in ok q'uexlayok; axca junok mantiado tol man ok oclay ajtek is yestacail, tamwal ok t'inchaj junok is tx'anil.

²¹ A bay tu' ok tx'ox ba Jehová yetok is mayk'ak'al co xol. Xiwil aej tol mimek sat ok el yakan bay tu'. A bay juntzan aej tu', man ok je' yoc eb ajc'ul yetok is mimek barco yet owal.

^22-23 A is tx'anil juntzan barco tu' man ok tok'lay cawbok yin yoyal, c'amxa bay ok yi yip tx'anil is k'apil. Ok pojlaycan ec' is tzet yetal eb ajc'ul tu', toltax ok tzakaytok eb chi ay beyi yion jabok yet, yujtol a Jehová ok on colon elok. A wal caw Cham ayoc co juezalok, co watx'nem ley, cax co reyal yayji.

²⁴ C'am junok cajyom bay Jerusalén tu' ok alonok: Ya' in ay ayin ti', man ẍiok eb. A eb cajyom bay jun conob tu', ok ak'lay tan is mul eb.