Is 31 - A Txꞌan Biblia Yin Kꞌanjobal 1989

Ok'bal c'ul eb chi say colwal bay Egipto

¹ Ok'bal c'ul eb chi toj bay Egipto yin sayoj colwal. A eb soldado yet Egipto, c'al is chej, c'al is carruaje tol miman bisil, chi yaoc eb yipok is c'ul; palta c'am chi yaoc eb sat yin Jehová, Cham Diosal Israel Asanxanej Ocok, tamwal chi k'an eb colwal bay Cham.

² Palta jelan c'apax Cham, ok yitek Cham uchlejbail yiban eb. C'am chi ec'tok tzet chi yal Cham yin jun conob yob, c'al yin eb chi colwaj bay eb unem yobal tu'.

³ A eb aj Egipto animac'al eb, cax man Diosok eb. Axa is chej eb, no'c'al wal no', tokwal espíritu no'. Yuj wal tu xin, a wal yet ok yion aj Cham Jehová is k'ab, ok ayc'ay eb colwajwom, cax ok ay c'apax c'ay eb chi col-layi, junnej ok yun cam eb.

⁴ Yujtol a Jehová Cham Yajaw yin Masanil max alon ayin axca wal ti': Axca wal yel yaw no coj yin junok calnel mayal yi', caxc'al xiwil eb ilom calnel chi oymoj yin no', tokwal ok el no' yet chi el yaw eb yin xibteni. Cayin wal tu', c'am mactxel chi je' in is tenon oc wanaj yet chin ayol ul wak'on owal bay tzalan Sión.

⁵ Axca wal no tz'iquin chi taynej yune', chi ec' jupupok yiban wayub, caywal tu' ok wut in taynen conob Jerusalén, ok in taynej, ok in colcan el eb, ẍi Cham.

⁶ Ex conob Israel, meltzojanek bay Cham mac bay tenomtak max e yut e ba.

⁷ Ok jay jun c'ual yet ok e k'okcan el e yechelej plata, c'al oro tol max e watx'nej yuj e yec'nakilal.

⁸ Ok ayc'ay Asiria yuj ch'en espada man animaok chi ak'balneni. Ok elcan aj eb ach'ej yuj, axa yoccan eb yin mosejal tu'.

⁹ Yuj wal xiwilal, xan ok tok elaj is reyalil eb, cax ok elcan aj is capitanil eb, ok bekcan eb is bandera. A Jehová chi alon jun ti', Cham ay k'ak'al is yaltar bay tzalan Sión, a k'ak'al yowal is c'ul chi chaw bay Jerusalén.