Biblia Todo Logo
Bìoball air-loidhne

- Sanasan -

Is 3 - A Txꞌan Biblia Yin Kꞌanjobal 1989


A yailal Judá c'al Jerusalén

1 Ilab xin, tol a Jehová Cham Yajaw yin Masanil, toxa ok yican el bay Jerusalén, c'al bay Judá masanil mac ayoc yipok c'ul eb conob, c'al masanil tzet chi loji c'al masanil a' aej.

2 Ok yican el Cham eb yajawil eb soldado, c'al eb soldado ak'om owal, c'al cham juez, c'al cham chekbej Dios, c'al eb aj nabal, c'al yicham winakil conob.

3 Ok ilay el eb capitán yin 50, c'al eb anima ay yelapnok, eb ak'om nabalej, eb watx'nem tzet yetal tol watx', c'al eb jelan k'anjabi.

4 Axa pax Jehová ok aon oc eb nak ach'ej yin yajawil.

5 Axa eb conob ok aj uchnaj eb, ok yak'len eb owal. Junjun mactxel ok yak' owal yetok eb cajan cawilal. A eb nak ach'ej ok yak' owal yetok eb icham winak. Axa eb comonal, ok yak' eb owal yetok eb ay yelapnok.

6 A yet tu', ok oc mitx'an junok nak yin is k'ab junok yet conob ayto yuj ba yetok is mam, cax ok yalon bay: Ay wal a pichil ach ti', ok ach occan co yajawilok yet ayoc jun yatakilal ti' co xol, ẍi mi eb.

7 A yet jun c'ual tu', yel wal maj yal c'ul nak bian. C'am chin oc yin jun opiso tu', yujtol c'am loj bay in na, tamwal ay an pichilej, manchak quin e yacan oc yajawilok conob, ẍi mi nak.

8 Manxa watx'ilok yayji Jerusalén, axa Judá mayal ayc'ayi, yujtol a is k'anej eb, c'al is yunben eb, ajc'ulal yak'on yin Jehová, yuj tx'emlay Cham yuj eb.

9 A yili sat eb chi tx'oxon el is luesal. Chi tx'oxxac'al el eb is mul axca eb aj Sodoma. Ok'bal c'ul yanimail eb, ac'al oc eb max iontek yailal yiban.

10 Al bay eb anima watx' nabal tol watx' ok yun yeloc eb, yujtol ok tzalojbok eb yuj paktzil is watx' unben.

11 Ok'bal c'ul eb anima yob nabal. Yobc'al ok chaloj yuj eb, yujtol atac'ala' yunben eb, caytu' ok yun chaon eb tojol.

12 Ach'ejc'al el eb nak chi etnen in conob ti', ix eb chi yajawbi yiban. Ex in conob, a eb chex ikbani, a eb chi ion aytek e sat, cax chex yikban c'aytok eb.

13 A Jehová ayic' bay is despacho, yet chi beyc'ulnelay eb conoblak yuj,

14 cax ok yalon bay eb yicham winakil is conob, c'al bay is yajawil eb: A ton ayex ti' max e loaytok yawoj eb meba', cax ay wal ec' e yelk'an bay e na max bet e yelk'anej bay eb tu'.

15 ¿Tzet che na' mac ex che yetnej in conob ti', cax chex aj can e yetnen eb meba'? ẍi Jehová Cham Yajaw yin Masanil.


Is yailal eb ix ix bay Jerusalén

16 Chi yal c'apax Jehová yuj eb ix ix bay Sión, tol chi luesnej ba eb; chi tx'emwaj eb yet chi bey eb, c'am chi q'uixwi eb jabok, tol chi canalwi eb, toxac'al chi tzinlabi tzet ayoc yin yakan eb yet chi bey eb.

17 Yuj wal tu xin, a Jehová ok ak'on pukil xil jolom eb yuj yabil, ok txecloj el is q'uixwiltakil eb yuj Cham.

18 A yet jun c'ual tu' ok yican el cham Yajaw yin eb ix aj Jerusalén masanil yelbub is mimanil, c'al yet yakan eb, yet jolom eb, c'al yet nuk' eb,

19 c'al ch'enal nuk' k'abej, c'al mak satej.

20 Ok yican el makil jolom eb, c'al c'alil nan eb, c'al pokok perfume eb, yetok yutxiquin eb,

21 c'al colk'ab eb, c'al ch'enal txam eb,

22 c'al an watx' pichil eb, c'al an camiẍ eb, c'al k'util eb, c'al an tx'uy eb,

23 ch'en espejo, an lababi camiẍ eb, c'al an txeq'ueq'ui k'apej, c'al mitx'banil xil eb.

24 A q'uexel is perfume eb tol watx' yoc jab, a ton tzet yak ok jayok. Axa lasu ok oc q'uexelok c'alilej, axa xil jolomej watx' yili yet yalantok, ok pukilok; a an el pichilej ok oc q'uexelok an pichilej watx' yili, ok etaxtok yili satej watx' yili yuj tzipinal tz'ayil.

25 A eb soldado aj Jerusalén ok ayc'ay eb yuj espada xol owal.

26 A conob ok ok'can ajok, ok occan yin cusc'ulalil, cax ok cancan yin tx'oklil.

Kanjobal (Q’anjob’al) © Sociedad Bíblica de Guatemala 1989

Bible Society in Guatemala
Lean sinn:



Sanasan