Is 29 - A Txꞌan Biblia Yin Kꞌanjobal 1989

¹ ¡Ay, a wal jun conob chi yik altar yet Dios,*fn* bay max ayji ec' David! A yet ok ec'tok junxa abil, yetokc'al juntzan k'in chi ec'c'alta' yet junjun abil,

² a Dios ok yaoc eb anima bay jun conob chi yik altar yet Dios yin bilc'ulal. Ay cusc'ulal, c'al k'akawilal ok ujok, axa jun conob tu', axca junok altar ok yuncan yul sat Dios.

³ Ok chektok Cham is soldado yet chi yoy ba eb yin Jerusalén tu', watx' ok yun yoc jun muralla bay yinlak, yuj makchen ajok, cax ok oc yin yet ok yak'on owal.

⁴ A Jerusalén ok ilay ayok. Atac'al bay sat tx'otx' tx'otx' ok k'anjabok, toxac'al ok numnon k'anjab ay xol pokok. Axa yul tx'otx' tx'otx' ok eltek is k'anej, axca is k'anej mac chi k'anjab yetok pixan camnak.

^5-6 Axa wal ok yunaj xin, yin wal aymanil ok yaoc Jehová yailal yiban masanil eb ajc'ul oc e yin, ex aj Jerusalén. Ok mak'waj c'u, c'al yec' quixcab ayxamay bili. Caw wal ay mimek owal cak'ek', c'al owal yaxnab, c'al k'ak'ej c'aywajwom. A wal juntzan ajc'ul, c'amxa yalbanil bisil tu', lajanxac'al ok yuncan eb axca pokok tol coc'xac'al. A masanil eb chex etneni, toxac'al ok ilaycantok eb axca chi yun yilaytok matz'il trigo yuj cak'ek'.

⁷ Masanil juntzan conob c'amxa yalbanil bisil tu', tol chi yak' owal yin jun conob chi yik altar yet Dios, tol chi ocxac'al oyan yin, yin yuchon ay is murallail, lajanxac'al ok yut ba eb axca junok ay tzet chi wayichnej yet ak'balil.

⁸ Lajan wal axca junok tol ay wajil chi waycan ajok, axa yin is wayich chi yila' tol chi lowi, palta a yet chi el lenaj wayan, ac'ala' ay is wajil. Ma axca wal junok ay takintial chi waycan ajok, axa yin is wayich chi yila' tol chi yuc'a', palta a yet chi el lenaj wayan, caw wal ayc'al takintial, toxac'al c'unjabinak c'ul yuj. Cay wal tu' ok yun yeloc juntzan conob tol c'amxa yalbanil bisil tu', chi oc yin yak'on owal yin tzalan Sión.

⁹ Beyanekc'al tok yin e c'am nabalil ayex ti'. Beyanekc'al tok yin tol axca c'am chex ilwi jabok. Ec'anekc'al k'ek'on axca uq'uem an, caxc'al c'am an che yuq'uej.

¹⁰ Yujtol axca wayan max yatek Jehová e yiban. Axca bak' satej yayji oc eb chekbej Dios yuj eb conob, palta a Jehová max makchen el nabal eb, axca chi yun makchen sat junok chi wayi yetok junok k'ap.

¹¹ Yujtol a masanil is k'anej eb chekbej Dios, lajan ok yuncan ayex axca tzet yetal tz'ibbilcan yul jun un tol chulbil, cax ayoc selloal. Ta chi ak'lay bay junok tol chi je' yilon un, cax chi al-lay bay axca ti': Il jun un ti', ta ẍi bay, cax chi tak'wi axca ti': C'am chi je' wuj wiloni, yujtol ayoc is selloal, ẍi mi.

¹² Ta chi ak'lay bay junok mactxel tol c'am chi je' yilon un: Il jun un ti', ta ẍi bay, chi mi yal axca ti': C'am chi je' wuj wiloni, ẍi mi.

¹³ Max yalon Jehová ayin axca ti': A juntzan conob ti', yinc'al k'anejal chin yak' serbil eb, toc'al chi yal eb tol ay welapnok yul sat eb, palta a wal yanimail eb najat tx'uman el win, chi tz'ak yiay ba eb ayin, palta asan juntzan chekbanil anima chi yak' eb cuylayok.

¹⁴ Yuj tu' xan a tzet yetal tol c'ayubtak yoqui, c'al milagro ok wunc'al bay jun conob ti', toxac'al ok c'aycan aj c'ul eb yuj. A jelanilal eb jelan, c'al yetok is yaj nabalil eb aj nabal xol eb, toxac'al ok c'aycan ajok, ẍi Cham.

¹⁵ Ok'bal wal c'ul eb chi c'ubaj el ba satak Jehová yaloni, chi c'ubaj el eb tzet yetal chi na', c'al yin ewantakil chi yun eb cax chi yalon eb axca ti': Tok ay mac ok on ilonok, tok ay mactxel ok ojtaknen elok, ẍi eb.

¹⁶ Palta ayex ti', q'uexan che yutej. Tokwal lajan tx'otx' tz'akbejal tx'otx' yetok mac chi tz'akoni. A junok tx'otx' tol tz'akbil, ¿xin ta chi je' yalon bay is tz'akomal axca ti': Manak ach max quin a tz'aka', xin ta ẍi bay? Tamwal junok bijan tx'otx' tz'akbejal tx'otx' chi je' yalon bay mac chi tz'akoni: Ach ti' man ojtakok tzet chonej, tokwal ẍi tx'otx' bay.

Chi al-lay tol ok col-lay el Israel

¹⁷ Toxawal ok oc tx'otx' k'aktelak ti' yin bay ok oc mulnajil, axa bay chi occ'alta' mulnajil, ok occan yin k'akteal.

¹⁸ A yet jun c'ual tu', a eb c'am chi je'c'alta' yabeni, ok yab eb, ta ok awtelay aj junok un yab eb. A eb c'am chi je' yilwani, axca tol xol k'ekk'inal ayic'ok, a eb tu' ok je' yilon eb.

¹⁹ A eb yaynakil caw wal ok tzalojbok aj eb yin Jehová. A eb caw wal meba', ok tzalojbok aj eb yin is Diosal Israel, tol Asanxanej Ocok.

²⁰ Ok lajwok ay eb c'am yabenc'ulal yin yet animail; a eb ch'aan chi yut ba, c'amxa junok eb ok can yin yiquisal. Ok c'ayil masanil eb tol asan yobtakilal chi na',

²¹ a ton mactxel chi naaj k'anej yin yet animail, cax chi tenchanen eb juez yet chi alay oc yailal yiban eb yobtakwom, cax chi yak'on eb lek'tial yet watx' c'am chi yun eb tojolal yiban eb watx'.

²² Yuj tu' xan a Jehová Diosal Israel, Cham max coloncan el Abraham, a' chi alon axca ti': A tinani' ex in conob, ex yinatil Jacob, c'amxa bay ok ex q'uixwok ajok, c'amxa bay ok cakbok el e sat yuj q'uixwilal.

²³ Yujtol a yet ok yilon eb e yinatil tzet yetal ok wun xol eb, ok yojtaknej el eb tol asanxanej in ocok, cax ay welapnok yul sat eb, ayin e Diosal in ex israel ex ti'.

²⁴ A mactxel tol ayoc yin somc'ulal, ok cuychaj el jelanilal yuj, a eb chi alxi ajok, ok cha yab eb cuybanilej, ẍi Jehová.