Is 2 - A Txꞌan Biblia Yin Kꞌanjobal 1989

A junc'ulal yet lajub c'ual

¹ A tzet max tx'oxlay yil Isaías c'ajol Amoz yin Judá c'al yin Jerusalén:

² A yet yajtok tu' a witzal Sión bay ay is templo Jehová, can ok yuncan is tel, c'al is mimanbilal yintak juntzanxa witzlak, axa masanil conoblak ok apnok oc bululok bay.

³ Cax ok yalon eb: Sebaxek, tonek ajtok bay witz bay ay yatut Jehová Diosal Jacob. Cax ok on cuyon Cham yin is cuybej, cax ok on beytok yin is beybal Cham tu', ẍi mi eb. Yujtol a bay Sión ok eltek ley, chi yal elapnok tol a bay Jerusalén ok eltek k'anej Jehová.

⁴ Axa Jehová ok beyc'ulnej is yowal eb mimek conoblak. Axa yespada eb ok occan yin asaronal, axa txam is lanza eb ok occan yin polbal trigo. Majxa yak' eb owal. Majxa c'apax k'aytzej ba eb yin owal.

⁵ Sebaxek ex yinatil Jacob, ok on beytok yin sakilk'inal chi yak' Jehová.

Chi ak'lay cuenta eb chi ec' yiban yuj Jehová

⁶ Mamin Jehová, yel wali max ton a bekcan a conob, a ton eb yinatil Jacob, yujtol nojnak el is conob eb yuj eb ajtxum chi tit bay yetc'ulal bay chi ajol c'u, c'al yetok eb aj nabal, axca yet eb filisteo, cax chi yak'on eb trato yetok eb tx'ok conobal.

⁷ A is tx'otx' eb, nojnak el yuj oro c'al yuj plata. C'am bisil is beyomal eb. Nojnak c'apax el is conob eb yuj chej, cax c'amxa chi bischaj is carruaje eb.

⁸ Nojnak el tx'otx' eb yuj yechelej, cax chi ay jajan eb bay tzet yetal max watx'nej eb.

⁹ Yuj tu' xan yaynakil animaxac'al max yuncan eb. Manchak ak' mimanc'ulal yin eb.

¹⁰ Ocanek yul ch'en nach'en, c'ubajek el e ba yul c'ul tx'otx' tx'otx', yujtol chex xiw bay Jehová, tol ay is may Cham miman yikbej.

¹¹ A eb lues ok ay moc'an eb. A eb chi yiaj can ba, ok ilay ay eb. Asannej Jehová ok ilay aj can yet jun c'ual tu'.

¹² Yujtol ok jay c'ual yowal c'ul Jehová Cham Yajaw yin Masanil, yuj yilay ay masanil eb lues, eb chi mimanej ba, c'al eb chi maynej ba.

¹³ Catatu' ok c'ayon el Cham masanil te c'ute' can is tel bay Líbano, c'al masanil te ji bay Basán.

¹⁴ Cax ok yioncan ay masanil witzlak, c'al tzalanlak can ayaj is tel.*fn*

¹⁵ Ok yioncan ay masanil torre can ayaj is tel, c'al masanil muralla watx' cawxi.

¹⁶ Cax ok yak'on paxay masanil barco yet Tarsis yich a', c'al masanil barco watx' yili.

¹⁷ Ok lajwok ay masanil tzet yetal chi maynej ba eb anima yuj. A luesalil eb anima, ok ilay ayok. Asannej ton Jehová ok ilay aj can yet jun c'ual tu'.

¹⁸ Ok yican el masanil yechelej; c'amxa junok chi cani.

¹⁹ A yet ok aj wan Jehová ul yak'on bil tx'otx' tx'otx' ti', ok octok eb anima yulak nach'enlak, c'al yulak jatilal tx'otx' tx'otx', yin c'uban el ba yuj xiwilal bay Cham tol ay is may, tol miman yikbej.

²⁰ A yet jun c'ual tu', ok k'okcantok eb anima bay ay no tx'ow, c'al bay ay no sotz', juntzan yechelej tol plata, c'al oro tol max watx'nej eb, yet chi oc eb yin ayilal bay.

²¹ Axa yet ok aj wan Jehová ul yak'on bil tx'otx' tx'otx' ti', ok octok eb anima yulak jatilal nach'enlak, c'al yulak jatilal ch'en mimek ch'en, yuj xiwilal bay Cham tol ay is may, tol miman yikbej.

²² Bekek e yaon oc eb jet animail yipok e c'ul, yujtol cambejal yayji eb, cax c'am yelapnok eb.