Is 19 - A Txꞌan Biblia Yin Kꞌanjobal 1989

K'anej max al-lay el yin Egipto

¹ A juntzan k'anej max al-lay el yin Egipto: Ilabi chi jayoc Jehová yiban jun asun amanc'uan beyi chi toj bay Egipto. Caw wal chi bilaj juntzan comon dios bay tu' satak Cham, cax chi xiw c'apax aj eb anima aj Egipto tu'.

² Chi yalon Jehová axca ti': Ok wak' pojchajtok eb aj Egipto tu', cax ok yak'len aj eb owal yin junjun. A eb yamigo ba ok yak' eb owal, axa conoblak ok mitx'lej ba yin owal, yetok c'apax nacionlak ok yak'lej owal.

³ Ok wak' etax el nabal eb, cax ok etaxtok masanil tzet yetal nabil yuj eb, xan ok yal ba eb bay comon dios, c'al bay eb ajbal, yetok bay pixan camnak, c'al bay eb naom el k'anej.

⁴ Ayin ton Jehová Yajaw in yin Masanil chi wala', tol ok waoc junok rey bay Egipto tol yob is nabal, caw wal ok'bal c'ul ok yun eb anima yuj, ẍi Cham.

⁵ Ok lajwok a' aej Nilo, takinxac'al ok yuncan bay yul is be a' tu' masanil.

⁶ Toxac'al ok aj jabil bay be a' tu', yujtol a masanil a' chi el yakan bay Egipto, ok aytek a', masantac'al ok yal takajok. A te aj, c'al an junco ok takajok.

⁷ A masanil an junco ay bay tilak a' Nilo, yetokc'al masanil tzet awojal awbil bay tilak a' tu', ok takajok, ok c'ayajok.

⁸ A masanil eb mitx'om txay bay a' Nilo tu', ok c'uyuyok eb yuj cusc'ulal. Toxac'al ok cuscan aj eb chi yaytok is txim yul a'.

⁹ Cabtakxac'al ok yuncan aj c'ul eb chi xion an lino. Axa eb chi chemon an, toxac'al ok somchajcan el c'ul eb.

¹⁰ Toxac'al ok taccan el c'ul eb chi watx'nen an k'apej, cabtakxac'al ok yuncan aj c'ul eb mulnajwom.

¹¹ Yelxac'al c'am nabal eb yajaw yayji bay conob Zoán. A eb aom oc nabalej bay Egipto, c'amxa jabok yopiso nabal eb tu'. Tzet-xac'al yuj xan chi tec'baj ba eb yalon bay cham reyal Egipto: Ayon ti' yinatil on eb aj nabal, yinatil on eb rey yettaxc'al payxa, ẍinaj eb.

¹² Ach reyal Egipto, ¿baytal ay eb a aj nabal tinani', yet watx' chi tx'ox eb, c'al yalon el eb ayach tzet yetal nabil yin Egipto yuj Jehová, Cham Yajaw yin Masanil?

¹³ A eb yajaw bay conob Zoán, c'am is nabal eb; a eb yajaw yayji bay conob Menfis, max yak' ba eb ikbelay c'aytok. A eb yajaw tu' max ikbantok eb aj Egipto yul beal man watx'ok.

¹⁴ Max yaoc Jehová somc'ulal xol eb, a ton eb chi iontok eb aj Egipto yul beal man mojok. A masanil tzet yetal chi yunej, lajan wal axca junok uq'uem an tol chi xabi, cax chi telc'oj aj xol is xaw tu'.

¹⁵ C'amxa eb aj Egipto chi je' colon is conob caxc'al beyom ma meba', caxc'al caw wal mimanbil, ma man ojtakbilok, c'amxa chi je' colwaj eb.

¹⁶ A wal yet jun c'ual tu', a masanil eb aj Egipto, lajanxac'al ok yuncan el eb axca eb ix ix, caw wal ok bilaj eb yuj xiwc'ulal yet ok yilon eb yion aj Jehová is k'ab yin eb, a ton Cham Yajaw yin Masanil.

¹⁷ Caw wal ok xiwaj eb aj Egipto tu' satak eb aj Judá. Asan yet ok naon eb aj Egipto tu' tzet ok yun k'anabax Judá yuj Jehová, Cham Yajaw yin Masanil yin eb, cax ok xiwaj eb.

¹⁸ A yet jun c'ual tu', ay oyeb conob bay Egipto ok yal hebreo, cax ok locban eb bi Jehová Cham Yajaw yin Masanil. A junok juntzan conob tu' ok yik Conob C'u.

¹⁹ A yet jun c'ual tu' ay junok altar tol yet Jehová yayji yul makbej Egipto tu'. A bay cawilal is mojonal is makbej, a tu' ok ilay aj wan junok ch'en ch'en yuj yibanilal aj can Jehová.

²⁰ A juntzan tu' ok oc yin tx'oxbanilejal tol a bay Egipto ay mac chi oc ayilal bay Jehová, Cham Yajaw yin Masanil. A yet ok el yaw eb k'anon colwal Cham yuj eb chi etnen eb, ok yatek Cham jun colwajwom bay eb, yet ok col-lay eb yuj.

²¹ Ok tx'ox wal ba Jehová bay eb aj Egipto, ok ojtaknelay wal el Cham yuj eb, ok oc eb yin ayilal bay, cax ok yak'on tz'a eb xajanbal c'al ofrenda. Ok yak'on eb ti' bay Cham c'al yiken eb.

²² Ok yatek Jehová junok miman yailal bay Egipto, ok lajwok tu', ok yak'on watx'jok ajok. Ok meltzojtek eb yul k'ab Jehová, cax ok yabenc'ulnelay eb yuj Cham.

²³ A yet jun c'ual tu', ay jun miman be ok toktac'al bay Egipto masantac'al ok apnok oc bay Asiria, xan a eb aj Asiria tu', ok je' yapni oc eb bay Egipto, ac'ala' eb aj Egipto, ok je' yapni oc eb bay Asiria, xan a cab conob tu' junnejxac'al ok yun yoc eb yin ayilal bay Jehová.

²⁴ A yet jun c'ual tu', a eb israel, ok yaoc ba eb yetok eb aj Egipto, c'al yetok eb aj Asiria. A yuj oxeb conob tu' xan ok yak' Jehová watx'c'ulal bay masanil yulyibank'inal.

²⁵ A Jehová, Cham Yajaw yin Masanil ok yak' watx'c'ulal yiban eb, cax ok yalon axca ti': Ayin chi wak' watx'c'ulalil yiban in conob Egipto, c'al yiban Asiria, a ton in mulnajbal, c'al yiban Israel, tol in satak yayji ocok, ẍi Cham.