Is 15 - A Txꞌan Biblia Yin Kꞌanjobal 1989

Max al-laycan el k'anej yin Moab

¹ A ton k'anej max al-lay yin Moab ti': Yin junnej ak'bal ok lajwok ay conob Ar yul yet Moab. Tz'ininixac'al ok yuncanok. Yin junnej ak'bal ok yun lajwok c'apax ay conob Kir yul yet Moab. Tz'ininixac'al ok yuncanok.

² A eb anima cajan bay Dibón, ok ajtok eb ok' bay jun templo ay bay tzalan. Caw wal ya' ok yab eb aj Moab yet ok ayc'ay conob Nebo, yetokc'al Medeba. Masanil eb winak ok tzukil eb xil jolom, c'al xil ti' yuj cusc'ulal.

³ A el pichilej ayoc yuj eb yet ok ec' eb yulak be. A bay yibanlak na ok el yaw eb yuj yailal. Masanilxac'al anima ok oc yin cusc'ulal bay txonbal-lak. Ok tanxac'al yal sat eb yuj ok'il.

⁴ A eb aj Hesbón, yetok eb aj Eleale, ok k'an eb colwal. Oktac'al apnok oc yel yaw eb bay Jahaza. Yuj tu' xan a masanil eb soldado bay Moab ok el yaw eb, ok pax yip eb yuj xiwilal.

⁵ Caw wal chi cus in c'ul yuj eb aj Moab. A masanil anima ay bay tu' ok tokcan eb elaj bay Zoar, cax ok apnitac'al oc eb bay Eglat-selisiya. Ok ajtok eb ok' bay witzal Luhit, c'al bay chi toj beal Horonaim. Caw wal ok el wek'ek'ok yaw eb yuj yailal ok jayoc yiban eb.

⁶ Ok tanaj a' uc'bala' yet Nimrim, ok takaj masanil an ac'un, c'amxa junok xak ac'un yaxto.

⁷ Axa eb anima ok wajtok is beyomal, atac'al bay sataktok jobeal Te Sauces ok yitok eb.

⁸ A ton bay masanil tilak makbej Moab ok ablay yel aw yet cusc'ulal, ok apnoktac'al oc bay Eglaim yetokc'al bay Beer-elim.

⁹ Caxc'al a juntzan uc'bala' yet Dimón, cakxac'al yili yuj chic', toltax oktoc'al tit mimek yailal yiban eb yuj Dios. A junok no coj ok chion aytok eb okto el bay Moab, yetokc'al eb okto iquisbok can bay sat tx'otx' tx'otx' tu'.