Is 13 - A Txꞌan Biblia Yin Kꞌanjobal 1989

Chi al-lay el k'anej yin Babilonia

¹ A ton jun k'anej max al-lay yin conob Babilonia ti', tol max cha' Isaías c'ajol Amoz bay Dios:

² Iek aj bandera bay jolom junok witz tol c'am is teal. Al-layokabi tol chi oc eb soldado yin owal. Iek aj e k'ab yuj e tx'oxoni, tol chi oc eb bay puertalak eb mimek winak.

³ Mayal wawtej eb nak soldado, mayal wak' chekbanilej bay eb nak ak'om owal sic'bilxa el wuj, a ton eb ok tzaloj yet ok wak'on ayc'ay eb wajc'ul yuj yowal in c'ul, ẍi Jehová.

⁴ Abek wal yoc aw bay jolomlak witz, axca wal tol xiwil anima chi el yaw. Abek wal bil xolak nación, tol mayal wajbaj oc ba. Lanan yawji lista yuj Jehová Cham Yajaw yin Masanil, a ton listail eb is soldado watx'xa yayji, yet chi toj eb yin owal.

⁵ Chi tit eb bay juntzan nación puch najat, a ton bay lajubal tx'otx' tx'otx'. Ajun Jehová, yetok mitx'k'abej yet yowal c'ul lanan jayoc ul yak'on lajwok masanil yul nación ti'.

⁶ C'uyuyanek, yujtol cawilxa chi jayoc jun c'ual yet yowal c'ul Jehová, a jun c'ual c'aybanilal tu' ok yatek Cham chi je' yuj masanil.

⁷ Yuj tu xin, a masanil anima ok pax yip yuj xiwc'ulal.

⁸ Caw wal ok xiwaj eb; ok jay wal oc jun miman bilc'ulal, c'al yailal yiban eb. Toxac'al ok ec' tx'umumok eb yuj yail, axca chi yun eb ix ix yet chi watx'ji c'ul eb yuj yune'. Toxac'al ok c'ayaj c'ul eb soldado yet Babilonia tu' yil-len oc sat, cakxac'al ok yun sat eb yuj q'uixwilal.

⁹ Lanan yapni oc c'ual Jehová, jun c'ual tol ay is may yuj yowal c'ul, toxac'al ok cancan jun tx'otx' ti' yin tz'inanil yuj, cay wal tu' ok yun lajwok el eb yobtakwom ay bay.

¹⁰ A yet tu xin, a masanil waycan chi joplabi bay satcan, manxa ok yak' is sakk'inalil. Ok k'ekk'olil c'apax el yakan c'u yet lanan yajolok, c'amxa c'apax yakan xajaw.

¹¹ Axa yalon Jehová axca ti': Ok waoc yailal yiban eb aj yulyibank'inal ti' yuj yobtakilal, c'al yiban eb yobtakwom yuj tzet man watx'ok chi yunej. Ok wiay eb chi maynej ba, ok waoc yailal yin eb ch'aan, tol c'am jabok is yabenc'ulal.

¹² Puralxac'al ok ilchaj eb anima, axca ch'en oro yet Ofir tol yelxac'al watx'.

¹³ Ok in tzicobtanej satcan, axa tx'otx' tx'otx', ok el bay ayic'ok yuj wak'on bilok, a ton yuj yowal in c'ul ayin Jehová in ti', Yajaw in yin Masanil. Caw wal ok k'ak'bok tit wowal yet jun c'ual tu'.

¹⁴ A eb anima, lajanxac'al ok yun eb axca no tx'ucchej tol uktebil, ma lajanxac'al ok yun eb axca junok bulan no calnel chi saklemtok, c'amxa mactxel chi wajban ocok. Junjunxac'al ok tokcan bay is conobal, c'al bay is tx'otx'al.

¹⁵ Tzanc'al mactxel ok michchajok, ok teklay camok, tzanc'al mactxel ok yak' ba mitx'layok, ok mak'lay camok.

¹⁶ T'anan wal oc eb cax ok mak'lay cam yuninal eb bay sat tx'otx'. Ok uchlay eltek eb yulak yatut masanil, cax ok etnelay eb ix yistzil eb.

¹⁷ Ok watek eb aj Media yin eb. A juntzan anima tu', c'am jabok yopiso ch'en plata yuj, tamwal ch'en oro, c'am yelapnok yul sat eb.

¹⁸ A yetok is julbal eb, ok yak'cam eb eb ach'ej. C'amxa cusc'ulal eb yin eb ato yalji, tamwal chi cusc'ul eb yin eb unin.

¹⁹ A wal conob Babilonia, asannej oc watx' yili xol juntzanxa nación, tol is maynejbail eb caldeo yayji ocok, axca ch'en ch'en watx' yili; palta lajanxac'al ok yuncan axca Sodoma c'al Gomorra, yet max wak'on lajwok.

²⁰ C'amxa bak'in ok cajay pax anima bay junelxa. C'amxa mac ok meltzojtek cajay bay, tamwal eb árabe ok ec' cajan yuj is jobbejal no'. C'amxa bak'in ok ay bulan calnel xew bay tu'.

²¹ A bay tu' ok cajay ec' no ok, toxac'al ok nojil yulak na yuj no ton ton. Axac'al no aveztruz ok ayjok ec' bay tu'; yetok c'apax no xolakteal chiwo ok ec' txec'labok no' bay tu'.

²² A no ok, ok ok' yulak mimek cuartel. A bay yulak mimek despacho watx' yili, a tu' ok cajay ec' no mimek ok. Lanan yapni oc c'ual yet ok c'aycan el Babilonia, cax manxa ok najtilbok, ẍi Jehová.