Is 10 - A Txꞌan Biblia Yin Kꞌanjobal 1989

¹ Ok'bal ex c'ul ayex che watx'nej juntzan ley man tojolok ti', tol chi etax eb anima yuj.

² C'am che watx'nej el is k'anej eb anima yaynakil, c'amxa jabok yelapnok eb mebatak anima xol in conob ti' yul e sat. Che yetnej eb xal camnakxa yichamil, cax che yelk'anen is tzet yetal eb c'amxa mam, c'amxa txutx.

³ ¿Tzet wal ok e yun ayex ti' yet ok e yak'on e cuenta, yet ok e yilon tit yailal bay najat? ¿Baytal ok e k'an colwal? ¿Baytal ok e yak'can e beyomal?

⁴ Tatol man ok ex mitx'lay yin e yilaytok preso, ok ex mak'lay cam chi yal tu'. Caxc'al mi axca tu', c'amtoc'al chi oc wanaj yowal c'ul Jehová; lanantoc'al yaon oc yailal yin is conob.

A eb aj Asiria mitx'k'ab Dios yuj yoc yailal

⁵ Chi yalon Jehová axca ti': ¡Ilek wal cham reyal Asiria! Lajan wal axca junok te c'ax chi wak'balnej yetok yowal in c'ul.

⁶ Chin chektok yin jun conob tol caw wal c'am welapnok yul sat, yob is nabal, a ton jun nación tol chi tx'emtek wowal. Chin chektok jun rey tu', yet watx' chi yelk'anej masanil is beyomal jun nación tu', yuj tec'lay ay eb axca tec'lay ay tx'otx' tz'otz'ew bay yulak be.

⁷ Palta a pax reyal Asiria xin, c'am chi na' axca tu', man yujok tu' xan chi yak' yip. Asan chi na' tol chi yak' lajwok xiwilok nación.

⁸ Chi yalon cham reyal Asiria axca ti': Masanil eb in comandante, rey ta' yayji eb.

⁹ Lajanc'al max wut conob Calno yetok conob Carquemis. Axca max wut Hamat, ca c'apax tu' max wut conob Arfad, lajan max yuncan Samaria yetok Damasco.

¹⁰ Wet max yuncan juntzan nacionlak tol xiwil is diosal. A wal is diosal eb tu', xiwil bisil yintak diosal eb aj Jerusalén c'al eb aj Samaria.

¹¹ Yuj tu xin, a wal tzet max wun yin Samaria, c'al yin is diosal, ¿tom man ok in tzakay c'apax wunen yin Jerusalén, c'al yin is diosal? ẍi cham reyal Asiria tu', ẍi Jehová.

¹² A yet mayal yun Cham Yajaw masanil tzet yetal tol t'inanc'alta yunen bay jolom witz Sión, c'al yin Jerusalén, catatu' ok yaon wal oc yailal yiban reyal Asiria yuj masanil tzet max yun yin maynejbail, yin tol ch'aanxac'al max yut ba.

¹³ Yujtol max yal cham reyal Asiria axca ti': Ayin wal max wun juntzan ti' yetok wal wipalil. Caw wal jelan in, watx' max wut in nabalnen elok. Max in q'uexwaltok is mojonail nacionlak ti'. Mayal wican is beyomalil eb, max in tec'ay eb rey yetok wipalil tu'.

¹⁴ Max wawal oc in k'ab yin is beyomal juntzan conob tu', mayal wican masanil tx'otx' tx'otx', axcaxac'al jion ajtek jos tz'iquin bekbilcan yul wayub, c'amxac'al junok mactxel max bili, c'am mac max jak ti' yel yaw, ẍi cham rey tu'.

¹⁵ Palta xin, tokwal miman yelapnok ch'en echej yintak mac chi k'anoni. Tokwal miman c'apax yelapnok ch'en sierra yintak mac chi k'anoni. Tokwal a te k'okoch chi ak'on bil junok anima. C'amak. A junok anima tu' chi ak'on bil te'.

¹⁶ Yuj wal tu', a Jehová Cham Yajaw yin Masanil, a ok ion el yip juntzan soldado tec'an waay tu', ok lajwok ay is maynejbail cham reyal Asiria axca tz'atok junok tzet yetal yuj owal k'ak'ej.

¹⁷ A Dios Asanxanej Ocok, sakk'inal yayji bay Israel, yin junnej c'ual ok yak' lajwok eb aj Asiria axca chi yun tz'aay te q'uix yuj k'ak'ej.

¹⁸ Ok lajwok ay masanil eb mimek winak, axca chi yun lajwi ay watx'il yili k'aktelak, c'al awojtelak. Axcaxac'al junok ya'ay tol c'amxa yip, caytu' ok yuncan Asiria.

¹⁹ Jaywanxanej eb mimek yajaw ok canok. Axcaxac'al jayebokxa te te' chi can yuj k'ak'ej, toltax junok unin chi je' bisoni.

²⁰ A yet jun tiempoal yet yajtok tu', a jaywanxa eb yinatil Jacob ok cancan bay Israel, ok colchajcanok. Manxa ok yaoc eb yipok c'ul jun nación ijan max ak'on lajwok ay tu', palta tol yin masanil is c'ul eb ok yaoc eb nabal yin Jehová is Diosal eb, tol Asanxanej Ocok.

²¹ A jaywan eb yinatil Jacob ok meltzojok. Ok meltzoj eb bay Dios tol miman yipalil.

²² Ex wet conob Israel, caxc'al tol c'amxa chex bischaji axca yarenail ti a' mar, palta jaywanxanej ex ok ex meltzojtek. Nabilxa tol ok jay oc c'aybanilal e yiban axca wal is mojalil.

²³ Yujtol a Jehová Cham Yajaw yin Masanil ok yak' lajwok masanil yul makbej co nación, axca max yun yaloni.

²⁴ A Jehová Cham Yajaw yin Masanil chi yal axca ti': Ex in conob cajan bay Sión, caxc'al mi ok ex mak' eb aj Asiria yetok c'ax, ma ok yiaj eb k'okoch e yin, axca max e yun bay Egipto, c'am chex xiw bay eb.

²⁵ Yujtol yet-xac'al jayeb c'ual ti' ok jayoc yailal yiban eb, cax ok wak'on lajwok ay eb yetok yowal in c'ul, ẍi Cham.

²⁶ A Jehová, Cham Yajaw yin Masanil, ok aon oc yailal yiban eb, axca wal max yun yak'on lajwok ay conob Madián bay ch'en miman ch'en yet Oreb. Caywal tu' ok yun tx'oxon yipalil yin Asiria tu', axca wal max yun tx'oxon yin Egipto bay a' Cakyin Mar.

²⁷ A ton wal yet jun c'ual tu' ok ilay el ikatz ayoc e yiban yuj eb. Ok ex bekchajcan el axca chi yun yel junok no wacax yet chi k'ajtok te yugo ayoc yin.*fn*

Chi tit eb aj Asiria

²⁸ Lanan yapni oc eb aj Asiria bay Ajat,*fn* chi ec'tok eb bay Migrón, a tu' chi cancan ikatz yuj eb bay Micmas.

²⁹ Chi k'axpoj ec'tok eb bay miman jobe, chi watx'nej aj eb is campamento bay Geba. Chi xiwcan aj eb aj Ramá. A eb aj Gabaa is conobal Saúl, chi toj eb elajok.

³⁰ Elokab e yaw, ex aj Galim. Abek yel aw tu' ex aj Laisa. Ok'bal ex c'ul ex aj Anatot.

³¹ Chi toj eb aj Madmena elajok, a eb cajyom bay Gebim chi toj c'ubaj el ba eb.

³² A tinani' chi oc wanaj eb soldado tu' bay Nob. Chi tx'ox eb yowal c'ul yin tzalan Sión bay conob Jerusalén.

³³ Ilek wali, a Jehová Cham Yajaw yin Masanil ok yak' lajwok ay eb ajc'ul oc yin axca chi yun k'aklay coj te te' bay Líbano ayxamay bil yayc'ayi. Chi tzoc'lay aj te', a te' yelxac'al can ayajok, c'al te' yelxac'al watx' yili, chi ayc'ay te' bay sat tx'otx'.

³⁴ Yetok echej chi k'aklay aj te pim k'aktelak, chi k'aklay c'apax aj te te' manxa watx'ilok bay Líbano.