Hebreos 13 - A Txꞌan Biblia Yin Kꞌanjobal 1989

Tzetbil chi jut jak'on tzalojbok c'ul Dios

¹ Manchak co bekek co camc'ulnelen co ba, yujtol juẍtak co ba, janab co ba.

² Co naektek tol bekanokab yel posada juj bay eb chi ec' ayon. Ay eb axca tu' yutnak ba, yak'nak eb posada eb ángel yin man yojtakok tatol ángel eb.

³ Co naektek eb jet creyenteal ayoc preso, axcaokab tol ayon oc preso yetok eb. Co naek c'apaxtek eb chi ilon yailal, axcaok tol ayon jun chi jab yail yetok eb.

⁴ A yet chi jilen co ba yetok jetbi junjun on, ayokab yelapnok jun ilejbail tu' yul co sat. Asanokab yin jetbi tu' chi jaoc co nabal junjun on, yujtol a mac chi yaoc mul yul k'ab yistzil ma yul k'ab yichamil, ok beyc'ulnelay eb yuj Dios, c'al eb tol manto yetbiok ba cax chi mulji, ok beyc'ulnelay c'apax eb yuj Dios.

⁵ Manokab asannejok ch'en tumin chi jil co naobtanej c'al co sayoni. Jak'ek tzaloj co c'ul yetok tzet ay ayon, yujtol yalnak Dios axca ti': C'am bak'in ok ex in bekcanok, tamwal ok ex wak'can e tx'oklil, ẍi.

⁶ Yuj tu', c'am chon xiw jalon axca chi yal yul tx'an Un: Chi colwaj Cham Jajawil wetok, xan c'am chin xiwi. Tok ay tzet chi je' quin yuten eb anima, ẍi.

⁷ Naektek eb ec'nak e nan e xol ex yak'on cuenta, a ton eb yalomal el k'anej Dios ayex. Naektek tzet max yun yeloc beybal eb e nan e xol. Axca max yut yaon oc eb c'ul yin Dios, cayokab tu' che yut c'apax e ba.

⁸ A Jesucristo, ac'ala' Cham yet payxa, yetok tinani', c'al yet yajtok tu'.

⁹ Manchak e yak' e ba etnelay yuj juntzanokxa tx'ok cuybanilejal chi ali. Caw watx' ta chi ak'lay tec'anil co nabal yuj watx'c'ulal Dios chi tx'ox ayon. Axa pax juntzan comon chekbanilej yuj tzet chi co lo' xin, c'am jabok yopiso watx'nen oc nabal eb chi beybalneni.

¹⁰ Ayon ti', tx'ok yel jun co xajanbal. A eb sacerdote chi ak'on serbil Dios yul is templo, c'am yalon yet eb chion jun xajanbal ti'.

¹¹ Yujtol a cham sat sacerdote chi ion octok chiq'uil no no' bay jun lugar asan Dios ay yet yin ofrendail yet chi yion el yobtakil. Axa tiel conob, ata tu' chi tz'a mimanil no no' tu'.

¹² Axca ton tu' max yut yaben Jesús yail, yet max cam tiel conob, yet watx' a is chiq'uil chi ion el yobtakil anima.

¹³ Yuj tu', elokonektok axca bay max ilay eltok Jesús bay tiel conob tu', chi yal elapnok, jun lajanokab jintaknelay el yetok.

¹⁴ Yujtol manak bay yulyibank'inal ti' ay co conob yin junelnej. Palta ay jun co conob tolto ok jayok. A ton jun tu' lanan jechbaneni.

¹⁵ Yuj tu', jalekc'al watx' k'anej bay Dios yuj Jesucristo. A watx' k'anej chi jal bay Dios, a ton juntzan tu' co xajanbal bay.

¹⁶ Manchak toj c'ayc'ulal juj junen watx'il, c'al co colwaj bay eb jet animail. Yujtol a juntzan ti', co xajanbal c'apax bay Dios, cax caw chi tzaloj Cham yetok.

¹⁷ Ikejek tzet chi yal eb chex ak'on cuenta. Bekek oc e ba yul k'ab eb. Yujtol a eb chi taynenc'al e yanimail. Yojtak eb tol ok yak' eb cuenta bay Dios. Watx'okab che yut e ba, yet watx' chi tzaloj eb yilon jun mulnajil tu', cax c'am chi cusaj c'ul eb. Ta chi cusaj c'ul eb e yuj, man watx'ok e yet.

¹⁸ Txajlanek wuj, yujtol wojtak tol watx' yayji yikbomal in nabal, yujtol chi wochej tol caw watx'c'al chi wut in beybal.

¹⁹ Chin tewi ayex tol caw chex txajli wuj, yet watx' chi je' wapni ayex junelxa yin ayman.

Chi alaytok is cawil c'ul eb

²⁰ A Dios ak'om junc'ulal, a' ak'nej ictzoj aj Cham Jajawil Jesucristo xol eb camnak. A Jesucristo, Jilomal yayji Cham tol miman yelapnok. Yuj is chiq'uil Cham, xan max yun jun is trato Dios tol c'am bak'in chi lajwi.

²¹ Chi wochej tol chi watx'ji wal oc e nabal yuj Dios, yet watx', watx'c'al che yut e ba, cax a tzet chi cha' c'ul Cham che yunej. Chi wochej c'apax tol yujokab Jesucristo, xan watx'okab on yul sat, yet watx' chi tzaloj Cham jetok. Mimanokabc'al yelapnok Cham yin tojbalk'inal. Yunokabi.

²² Ex wuẍtak, ex wanab, chin tewi ayex, miman che yut e c'ul yuj juntzan k'anej chi waltok ayex ti'. Txench'an tzet chi waltok ayex yul jun in carta ti'.

²³ Chi waltok e yabej tol mayal bekchaj juẍtak Timoteo. Ta ok jay cayti' yin aymanil, ok in tok yetok, yuj ex toj wiloni.

²⁴ Chi watok cawil c'ul junjun eb chex ikban bay tu', cax chi waon c'apaxtok cawil e c'ul e masanil ex yet exxa Dios wetok. Yetok eb aj Italia, ti' chi ya c'apaxtok eb cawil e c'ul.

²⁵ Yak'okab Dios is watx'c'ulal ayex e masanil bay tu'.