Hebreos 10 - A Txꞌan Biblia Yin Kꞌanjobal 1989

¹ A is ley Moisés tx'oxbanilej yayji yuj juntzan tzet tzakan jayi, mantonak juntzan acaw tu'. Yujtol a ley tu', c'am chi je' watx'nen oc eb chi yochej chi apni oc satak Dios yuj juntzan xajanbal chi ak'lay junjun abil tu'.

² K'inalok ta chi watx'ji oc eb yuj jun ley tu', xam oc waan juntzan xajanbal tu'. K'inalok ta yel chi sakbi eb yin is yobtakil yuj chi yak' eb xajanbal tu', man xam yobtakwomok eb chi yabej.

³ Akxa xin, a juntzan xajanbal eb tu' chi ak'on natek eb is yobtakil yin junjun abil.

⁴ Yujtol a is chiq'uil no toro tu', yetok chiq'uil no ach'ej chiwo tu', c'am chi je' yion el co yobtakil.

⁵ Yuj tu', a yet max ulic' Cristo bay yulyibank'inal ti', max yal bay Dios axca ti': C'am chochej no no' yin ofrendail tamwal ixim trigo, palta max ak' in mimanil.

⁶ Tokwal ay no no' cha k'an yet chi tz'a yin xajanbalil, tamwal ofrenda yet chi tancan el mulej.

⁷ Yuj tu' xan max wala': Tix in chin jay ti' ach in Diosal, yet watx' chi wun ochwan, axca ta tz'ibelaycan wabixal yul tx'an Un, quin chi, ẍi Cristo.

⁸ A yet babelal max yala', tol c'am chi yochej Dios juntzan xajanbal tu', juntzan no no' chi ak'lay bay tu', c'al juntzan no' chi yak' tz'a eb yuj yion el is yobtakil tu', tamwal chi tzaloj c'ul yetok. Caytu' max yut yaloni, caxc'al chi yal yul ley tol chi ak'lay juntzan tu' bay Dios.

⁹ Max lajwi tu' max yalon pax Cristo axca ti': Tix in ti' ach in Diosal, yet watx' chi wun ochwan, ẍi. Chi yal elapnok, tol ok ul yak' lajwok yopiso juntzan xajanbal tu', yuj yak'on junxa xajanbal q'uexelok.

¹⁰ Yujtol a Jesucristo max yak' acaw is mimanil yin xajanbalil yin junelnej, axca chi yochej c'ul Dios, xan a yuj jun xajanbal tu', chon can yin watx'il yul sat Cham.

¹¹ Masanil eb sacerdote, waan aj eb yin watx'nen eb yopiso junjun c'u. Cac'al ti' yak'on eb juntzan xajanbal tol c'am chi je' yion el co yobtakil.

¹² A pax Jesucristo xin, junch'an xajanbal yak'nak yuj co yobtakil yin junelnej. Lajwi tu', max toj ay chotan bay watx' k'ab Dios.

¹³ A tu' lanan yechbaneni, masantac'al chi can eb ajc'ul oc yin, yalan yuj Dios.

¹⁴ Yuj jun xajanbal yak'nak tu', xan tz'aknajnak on el yin tojbalk'inal, yujtol max ilay el masanil co yobtakil jin yuj.

¹⁵ Chi yak' ba Cham Espíritu Santo testigoal ayon yin juntzan ti', yujtol chi yal yin babelal axca ti':

¹⁶ Tix ok wut in trato yetok eb yinatil israel yet yajtok tu': ayin wal caw Yajaw in chi wala' tol ok waoc juntzan in chekbanil yin yanimail eb, axca tol ok in tz'ibejcan oc yin nabal eb, ẍi.

¹⁷ Max lajwi yalon jun tu', cax max yalon pax axca ti': C'amxa bak'in ok in natek is mul eb c'al is yobtakil eb, ẍi.

¹⁸ Yuj tu', a yet mayal ak'lay lajwok co yobtakil, manxa yowalilok chi jak' junokxa xajanbal yuj co yobtakil tu'.

Co jitzek oc co ba c'atan Dios

¹⁹ Yuj tu' ex wuẍtak, ex wanab, manchak on xiw joctok bay jun lugar asan Dios ay yet, yujtol yuj chiq'uil Jesucristo chi je' joctok.

²⁰ Chi je' co toj yul jun ac' be, a ton jun yet k'inalej max jakcan Cham ayon, yet max ay nic'naj an cortina. A an cortina tu', chi tx'oxtek is mimanil Cristo.

²¹ Ay jun co sacerdote miman yayji ocok ayon yuninal onxa Dios ti'.

²² Yuj tu', co jitzektok co ba bay Cham yin masanil co c'ul. Jaek oc Cham yin co c'ul sic'libil, yujtol sakbinebilxa janimail yuj, yet watx' c'amxa xiwc'ulalil ayoc yin yikbomal co nabal yuj co yobtakil, cax sakbinebilxa co mimanil yetok jun acaw sak aej.

²³ Tec'an chi jut jaon oc yipok co c'ul jun co cuybanil chabil juj. C'amokab co cabc'ulalil, yujtol a Dios, ok yunc'alta' is ti' yak'nakcan ayon.

²⁴ Co say tzet chi jut jiptzelen co ba, yet watx' chi aj can co camc'ulal, cax chi watx'jic'al oc co beybal.

²⁵ Manchak co bekay co wajban co ba, axca beybal juntzan eb co xol. Yowalil chi jiptzelejek co ba. Jak'ek jip, yujtol lanan jilon juntzan yechel chi tx'oxon tol toxa chi jay c'ual jayubal Cham Jajawil.

²⁶ A tinani', jojtakxa jun cuybej caw yel. Yuj tu', ta ac'ala' jaon oc co nabal junen yobtakil, c'am junokxa xajanbal chi je' cam yuj co yobtakil junelxa.

²⁷ Ta axca tu', asanxanej jun yailal ay is may chi jechbanej chi yal tu', c'al k'ak' k'ak' chi nilxi, moj wal caw chon xiw yuj. A k'ak' k'ak' tu' ok ak'on lajwok el eb ajc'ul oc yin Dios.

²⁸ Ta ay mac c'am chi iken ley Moisés, cax ta ay pax cawanok ma oxwanok testigo chi ilon tol c'am chi yikej, tojol cami, yin c'amxac'al yabenc'ulal.

²⁹ Akxa tinani', ta chi jintaknejcan el Cham C'ajol Dios, ta c'am yelapnok chiq'uil Cham yul co sat, ta chi jiel q'uixwil Cham Yespíritu Dios chon camc'ulneni, ¿jantakto ec'ban yailal moj co chaon yintak eb maj iken ley Moisés tu'? Yujtol yuj is chiq'uil Cristo tu', xan yunnak trato Dios jetok. Yuj xan yet onxa Dios tinani'.

³⁰ Jojtak tol axca ti' yaloncan Cham Jajawil: Ayin ay walon wet waon oc is yailal eb. Ayin ok wiec' pak bay eb, ẍi. Cax yalnak c'apax axca ti': A Cham Yajaw ok beyc'ulnej is conob, ẍi.

³¹ Caw wal ayxa is may ta chon ayc'ay yul k'ab Cham Dios iquis.

³² Palta naektek yet yalantok, yet max e chaon sakk'inal yin e yanimail yin babelal. Caw tec'an e waay nan xol yailal, caw max e yak' e yip.

³³ Ilab tol ay ex max ex buchlayi, ay ex max ex etnelay satak conob. Ay ex xin, ya yoc max e yab yet max e yilon yoc yailal eb tu'. Jun lajan e yaben yailal yetok eb.

³⁴ Caw ok'nak e c'ul yin eb ocnak preso. Yin tzalojc'ulal max techaj e yuj yet max ilay ec' e tzetak yetal, yujtol max e natek tol a ayon ti' ay co tzetak yetal satcan tol ec'ban watx'il, cax tol c'am chi lajwi.

³⁵ Yuj tu', manchak e bekay tec'anil e waay tu'. Yujtol yuj, xan ok e cha' mimek paktzebal.

³⁶ Yowalil che tec'baj e ba, yet watx' ok je' e yunen masanil tzet chi cha' c'ul Dios, cax ok e chaon tzet yak'nak is ti' yak'on ayon.

³⁷ Yujtol chi yal yul tx'an Un axca ti': Janic'xanej wali, cax chi jay Cham yowalil ok jayok, man ok ec' tiempoal jayi.

³⁸ A mac watx' yul in sat, ok ayjokc'al ec'ok yujtol chin yac'al oc eb yin is c'ul; palta ta chi meltzoj eb yintak, maj inxa tzaloj yetok eb, ẍi Dios yul tx'an Un tu'.

³⁹ Palta ayon ti', mayonnak chon meltzoj jintak, axca eb chi meltzoj yintak tu', cax chi c'aycan el eb junelnej. Yujtol ayon ti', chi jac'al oc yin co c'ul, yuj tu' chon colchaji.