Hageo 2 - A Txꞌan Biblia Yin Kꞌanjobal 1989

Is watx'il yili ac' templo

¹ A yet 21 waay yet is suk xajaw, a yet tu' max k'anjab pax Jehová bay Hageo is chekbej.

² Max yaloni, tol chi al-lay bay Zorobabel, c'al bay Josué yetok c'apax bay masanil eb anima:

³ A mac ex maxto e yil jun templo yet yalantok, yetokc'al watx'il yili, yalokabi, tatol lajan yetok jun jet ti' tinani'. ¿C'am mi che na' tol c'am jabok yelapnok, ta chi co lajlej yetok jun tu'?

⁴ Manchak a cabc'ulnej a ba ach ti' Zorobabel, c'al ach Josué sat sacerdote; manchak e cabc'ulnej c'apax e ba ex conob. Mulnajanek, yujtol ayin wal caw Jehová Yajaw in yin Masanil, ayin ec' e yetok.

⁵ Ayc'al oc Wespíritu e yetok atac'ala' max yun wak'on in ti' yet max ex el bay Egipto, xan c'amc'al chex xiwi.

⁶ Janic'xanej axa c'oli wak'on bilaj satcan, c'al yulyibank'inal ti', a ton a' mar yetok tx'otx' tx'otx'.

⁷ Ok wak' bilaj masanil nacionlak, caytu' ok yun yiontek eb is beyomal bay in templo. Ayin wal caw Jehová Yajaw in yin Masanil chi wala', tol ok nojxac'al jun templo ti' yuj tzet yetal watx' yili.

⁸ Ayin ay wet ch'en plata c'al ch'en oro.

⁹ Ayin wal caw Jehová Yajaw in yin Masanil chi wala', tol a mimanbilal jun templo ti', yelxac'al miman ok yun binaj yintak jun yet babelal. A cayti' ok wak' tz'unchaj junc'ulal, ẍi Cham.

Chi tenchanej Dios is conob

¹⁰ A yet 24 waay yet is baloneb xajaw, ac'al oc yet is cab abil yoc Darío yin reyal, a yet tu' max k'anjab Jehová bay Hageo is chekbej; max yalon axca ti':

¹¹ K'anlej bay eb sacerdote tzet chi yal ley.

¹² K'inalok ta ay junok winak ibil oc jabok chibej yuj, tol pichan oc yul is pichil, tol wet yayji jab chibej tu', yujtol max ak'lay yin xajanbalil. Ta a ti' is pichil tu' chi low tennaj yin ixim pan, yin junok tajnak loj, yin vino, ma yin aceite, ma yin tzanc'al tzet lojal. ¿A mi yuj tu' wet-xac'al chi yuncan juntzan loj tu'? cachi bay eb sacerdote, ẍi Cham. C'amak, ẍi eb sacerdote.

¹³ Max occ'al ijan Hageo tu' k'anjabi: K'inalok ta ay junok mactxel man watx'ok yul sat ley, yujtol max mitx' junok mimanil camnak, cax chi mitx'on c'apax juntzan tzet yetal maxax jal tu': ¿Chi mi cancan juntzan tu' yin man watx'ok, atac'ala' ley? ẍi Hageo. Axa max tak'wi eb: Yel toni, ẍi eb sacerdote tu'.

¹⁴ Lajwi tu', max yalon Hageo: Caywal ti' yalon Jehová: Axca wal tu' yayji juntzan anima ti'; a masanil tzet chi yun eb, c'al tzet chi yak' eb ayin, junelnej man watx'ok.

¹⁵ Naek wali, tzetbil yayji yet c'amto che chail yich e ca watx'nen aj in templo ti'.

¹⁶ Ilab yet ay mac max toj ion 20 echbal trigo yaloni, axa yet max apni bay c'uan, asanxanej 10 echbal ixim ayic'ok. Ta ay c'apax mac max toj bay chi watx'ji vino yet chi toj yiajtek junok 50 moc vino yaloni, axa yet max yion ajtek, asannej 20 moc max ajtek.

¹⁷ Ayin caw max wak' lajwok masanil sat e yawoj yetok yabil, c'al yetok sakbat; palta ayex ti', maj ex meltzojtek ayin.

¹⁸ A yet jun c'u ti' 24 waay yet is baloneb xajaw, a ton yet jun c'ual ti', max e yaytok yich in templo.

¹⁹ Axa tinani' xin, chi cam wal e yilon tzet ok yun e yeloc yet ok ex beyc'altok. Caxc'al c'amxa trigo chi can bay c'uan, c'al an uva, yetokc'al te higo, yetok te granado, c'al te olivo, c'amto chi yak' te' sat, palta a wal tinani', c'al yet ok beyc'altok, ok wak' wal yaxilal e yiban, ẍi Jehová, ẍi Hageo.

Is ti' Jehová max yak' bay Zorobabel

²⁰ Ac'ala' yet jun c'u tu' max k'anjab Jehová bay Hageo:

²¹ Max yaloni, tol chi yal bay Zorobabel is gobernadoral Judá axca ti': Ayin ok wak' bil satcan, c'al tx'otx' tx'otx' ti'.

²² Ok wak' lajwok ay masanil is yipalil juntzan nacionlak yulyibank'inal ti', cax ok in k'okon ay masanil is yikbej. Ok wak' aj pac'lajbok masanil carruaje yet owal, c'al yetok eb ayoc yul. Ok cam no chej, yetokc'al mac ayoc yiban no'; junjunc'al ok tzoc'lay cam yuj mac ajun yetok.

²³ Ayin Jehová Yajaw in yin Masanil chi wal ayach, ach in chekbej Zorobabel, c'ajol Salatiel, tol a yet jun c'ual tu', ok waoc opiso axca yopiso in sello, yujtol ayin max ach in siq'uilok, ẍi Jehová, cachi bay, ẍi Cham bay Hageo.