Gn 46 - A Txꞌan Biblia Yin Kꞌanjobal 1989

Max apni cham Jacob bay Egipto

¹ Lajwi tu xin, max oc beyil yuj cham Jacob, yetok masanil tzet ay bay. A yet max apni oc cham bay Beerseba, max yak'on xajanbal bay is Diosal, a ton is Diosal Isaac is mam.

² A yet jun ak'bal tu' max k'anjab Dios bay yin wayichejal, max awtelay is bi yuj Dios: Jacob, ẍi Cham. Max tak'wi cham Jacob: —Tix in ti' Mamin, ẍi cham.

³ Max yalon Dios bay axca ti': —Ayin ton a Diosal in yetok a mam, manchak ach xiw a toj bay Egipto. A yet ok ach ayjok ec' bay tu', ok in watx'nej jun miman conob yin enatil.

⁴ Chin tojc'al etok bay Egipto tu', axa yet chi ajapnok is tiempoal xin, ok in occ'al yetok eb enatil yet ok meltzojtek eb junelxa bay lugar ti'. Axa yet ok ach cam xin, tutun wal ok ayjok ec' a c'ajol José tu' a c'atan, ẍi Dios bay cham Jacob.

⁵ Max lajwi tu xin, max yaon ajtok eb nak is c'ajol cham Israel tu' is mam, c'al eb unin yetokc'al is yistzil eb nak yul carreta max yatek cham reyal Egipto, cax max el eb bay Beerseba tu'.

⁶ Max toj eb bay Egipto cax max yiontok eb is calnel, c'al wacax, yetokc'al masanil tzet max yi' eb yet ayic' eb bay Canaán.

⁷ Max yiontok cham Jacob masanil is c'ajol, c'al eb is cutz'in yetok c'al is yitxiquin.

⁸ A ton wal is bi eb yuninal, c'al eb yitxiquin cham Jacob max toj yetok bay Egipto ti': Rubén, nak is babel c'ajol.

⁹ Eb is c'ajol nak Rubén tu', a ton Hanoc, Falú, Hezrón, c'al nak Carmi.

¹⁰ Eb is c'ajol Simeón, a ton Jemuel, Jamín, Ohad, Jaquín, Zohar, c'al nak Saúl, yune' jun ix aj Canaán.

¹¹ Eb is c'ajol Leví: a ton Gersón, Coat c'al nak Merari.

¹² Eb is c'ajol Judá: a ton Er, Onán, Sela, Fares, c'al nak Zara. (Nak Er c'al nak Onán, a tu' max cam eb nak bay Canaán). Eb is c'ajol nak Fares tu': a ton Hezrón c'al nak Hamul.

¹³ Eb is c'ajol nak Isacar: a ton nak Tola, Fúa, Job c'al nak Simrón.

¹⁴ Eb is c'ajol nak Zabulón: a ton nak Sered, Elón, c'al nak Jahleel.

¹⁵ A eb nak ti' is c'ajol Jacob yetok xal Lea, max alji eb nak yet ayic' cham bay Padan-aram, yetok c'apax ix Dina is cutz'in cham. Masanil eb tu', 33 eb yin masanil, ayoc eb winak c'al eb ix is bisilok.

¹⁶ Eb is c'ajol nak Gad, a ton Zifión, Hagui, Ezbón, Suní, Eri, Arodi, c'al nak Areli.

¹⁷ Eb is c'ajol Aser, a ton Imna, Isúa, Isúi, Bería, c'al is yanab eb nak chi yik Sera. Eb is c'ajol nak Bería, a ton Heber, c'al nak Malquiel.

¹⁸ A ton eb yinatil Jacob yetok ix Zilpa; xal is chekbej xal Lea max yak' cham Labán. Is yinatil eb tu' waklajonwan eb yin masanil.

¹⁹ Eb is c'ajol Jacob yetok yistzil chi yik Raquel, a ton José c'al nak Benjamín.

²⁰ Eb is c'ajol José yetok ix Asenat, a ton Manasés yetok nak Efraín, a tu' max alji eb bay Egipto. A pax Asenat is yetbi tu', is cutz'in jun cham chi yik Potifera, sacerdote cham bay jun conob chi yik On.

²¹ Eb is c'ajol nak Benjamín, a ton Bela, Bequer, Asbel, Gera, Naamán, Ehi, Ros, Mupin, Hupim, c'al nak Ard.

²² A ton is yinatil cham Jacob yetok xal Raquel 14 eb yin masanil.

²³ Eb is c'ajol nak Dan, asan nak Husim.

²⁴ Eb is c'ajol nak Neftalí, a ton Jahzeel, Guni, Jeser, c'al nak Silem.

²⁵ A ton is yinatil cham Jacob yetok xal Bilha, is chekbej xal Raquel max yak' cham Labán is mam, ukwan eb yin masanil.

²⁶ 66 eb is yinatil Jacob yin masanil, a ton eb ti' ajun yetok yet max apni oc cham bay Egipto; a ton wal juntzan ti' is yinatil cham, tx'ok pax yel eb ix alibej.

²⁷ Tx'ok pax yayji José yetok cawan is c'ajol max alji bay Egipto, xan 70 is bisil cham Jacob yetok eb yinatil yet ayxa ec' cham bay Egipto.

²⁸ Max babjitok nak Judá yuj cham Jacob, yet chi toj nak yal yab José, ta chi tit chawal bay Gosén. Axa yet max apni oc cham bay Gosén tu xin,

²⁹ max chekon José tu' watx'nelay is carro yet chi toj chaon is mam bay Gosén tu'. Axa yet max apni oc bay satak is mam, max toj lak'naj yin is mam tu', cax c'uc'al max ay nojan yok'i yiban jolom xic' is mam tu'.

³⁰ Max yalon is mam tu' bay axca ti': —A tinani xin, mayal wiloc en, ti' wal tol iquis achto, chixa je' in cam tinani', ẍi cham.

³¹ Lajwi tu xin, max yalon José bay eb is yuẍtak, c'al bay masanil eb yinatil cham Jacob: —Ti' chin toj wal bay cham rey: Masanil eb wuẍtak c'al masanil is yinatil in mam ay bay Canaán, mayal wal jay eb wetok.

³² Ibil oc masanil is calnel, c'al is wacax, c'al masanil tzet ay bay, yujtol a is mulnajil, a ton iloj calnel, c'al iloj wacax, quin chi.

³³ Yuj tu xin, a yet ok ex awtelay yuj cham rey, cax ok k'anlen ayex tzetak yetal che yunej,

³⁴ che yaloni tol ilom calnel, c'al ilom wacax ex; asan no calnel chi co job yintax jach'ejal axca wal jichmam on, quex chi. Yuj tu' xan ok ex cancan bay tx'otx' Gosén ti', yujtol a eb nak aj Egipto ti' ay yowalil junanen ba eb nak yetok eb jobom calnel, ẍi cham José.