Gn 15 - A Txꞌan Biblia Yin Kꞌanjobal 1989

Is trato Dios yetok Abram

¹ Max lajwi juntzan ti', max k'anjab Jehová yetok Abram yin esalil, cax max yalon bay axca ti': —Manchak ach xiw Abram, ayin ok ach in colo', caw wal miman a paktzebal ok a cha', ẍi Cham.

^2-3 Axa tak'wi Abram bay Cham axca ti': —Ach Wajawil Jehová, ¿tzet wal yopiso jun paktzebal tu' wuj? Ojtak sic'libil tol c'am junok wuninal max ak'a', yet chi sataknej masanil tzet ay ayin, xan a mac ok sataknencan masanil in tzet yetal ti', a ton nak in chekbej Eliezer aj Damasco.

⁴ Axa yalon Cham bay Abram tu': —C'amak, a caw a c'ajol ok sataknenok, cax manak nak comon anima tu' ok ion canok, ẍi Cham bay.

⁵ Axa yilay eltok Abram tu' yina yuj Cham, cax max yalon bay axca ti': —Ilab wal yili ajtok satcan; bisto wal juntzan waycan tu', ta chi bischaj oj. Axca ton tu' ok yun bisil eb enatil, ẍi Cham.

⁶ Max yaon oc Abram yin c'ul tzet max yal Jehová bay, xan watx' max yun cancan yul sat Cham.

⁷ Max yalon c'apax Cham bay axca ti': —Ayin ton Jehová in, ayin max ach wieltek bay conob Ur yul yet Caldea yuj wak'on jun tx'otx' ti' a sataknej, ẍi Cham bay.

⁸ —Palta ach Wajawil Jehová, ¿tzet wal chi yun wojtaknen sic'libil, ta yel tol ok in sataknej jun tx'otx' ti'? ẍi Abram tu'.

⁹ Axa yalon Cham bay: —Itek junok no k'opoj wacax ayin, c'al junok no chiwo, yetok junok no icham calnel; oxeb abilokab is k'inal junjun no', cax cheon c'apaxtek junok cuajte', c'al junok no paloma, ẍi Cham.

¹⁰ Max yiontek Abram masanil juntzan no no' tu' satak Cham, cax pojon ay nan junjun no'. Ac-'omba max yut nannan no' tu', axa no tz'iquin xin, maj pojay cham nan no'.

¹¹ Chi ayc'ay no ostoc yiban no chibej tu', palta chi uktelay el no' yuj Abram.

¹² Axa yet max c'oli yay numumok xin, chi c'ayil c'ul Abram tu' wayi, max jay miman xiwilal yin yuj caw wal k'ekk'olinak.

¹³ Lajwi tu' max yalon Jehová bay axca ti': —Yowalil chojtaknej elok tol a eb enatil, ok tok cajan eb bay junokxa tx'ok conobal, cax yin mosejal ok ayjok ec' eb, ok etax eb sic'libil yin 400 abil.

¹⁴ Palta ayin, ok waoc yailal yiban jun conob bay ok oc eb mosejal tu'. Lajwi tu xin, cax ok eltek eb enatil bay tu' yetok xiwil beyomal.

¹⁵ Asan tzet ok on ach ti', tol ok ach cam yin junc'ulal; yinxa echamwinakil.

¹⁶ Can makanxa inatilej mayal eq'uelok, catatu' ok meltzoj paxtek eb junelxa cayti', yujtol c'amto chi tz'aknaj ajapnok is yobtakil eb amorreo cayti', ẍi Jehová.

¹⁷ A yet ak'balilxa, cax max tx'oxon aj ba jun miman k'ak'ej tol chi aj wacacok mubal, toxanej chi culxi xak. Chi ec' nan xol chibejal no no' ac-'omba, a ton no mak'bil cam tu'.

¹⁸ A ton yet jun c'ual tu' max yak' Jehová is trato yetok Abram, max yalon axca ti': —A jun tx'otx' ti' ok wak' bay enatil, chita tit tx'otx' bay a' elom aej bay Egipto,*fn* masantac'al bay a' miman Éufrates.

¹⁹ Chi yal elapnok, a ton tx'otx' yet eb ceneo, eb cenezeo, c'al eb cadmoneo,

²⁰ tx'otx' yet eb hitita, eb ferezeo, eb refaíta,

²¹ c'al tx'otx' yet eb amorreo, eb cananeo, eb gergeseo c'al eb jebuseo, ẍi Jehová.