Gn 1 - A Txꞌan Biblia Yin Kꞌanjobal 1989

Yichbanil masanil tzet yetal

¹ A yet yichbanil, max yesnej aj Dios satcan c'al tx'otx' tx'otx'.

² A yet jun tiempoal tu', uchquiltak yayji yiban tx'otx' tx'otx' ti', cax tz'inini yili, naba aejlakc'al el masanil, cax k'ekk'olinak yili masanil yiban. Axa Yespíritu Dios, chi ec' yiban a'.

³ Lajwi tu' max yalon Dios axca ti': Ayokab sakk'inal, ẍi Cham. Cax max jaycan sakk'inal.

⁴ Max yilon Dios xin, tol watx' ton wal sakk'inal tu'. Max pojon el sakk'inal xol k'ekk'inal.

⁵ A sakk'inal tu' c'ualil max yikcan yuj Cham, axa k'ekk'inal, ak'balil max yikcanok. Max ec' jun ak'bal yetok jun c'ual, caytu' max yun tz'aknaj jun babel c'ual.

⁶ Lajwi tu' max yalon pax Dios axca ti': Ayokab junok tzet yetal jenantok yiban yulyibank'inal ti', cax pojokab ba a' aej yuj, ẍi Cham.

⁷ Cax max watx'nen Dios jun pojbanil ay nan a' tu', ca makan max yuncan el a', jun makan a' max can yalan yuj pojbanil a' tu', junxa makan a' max can yiban. Axca ton tu' max yunej.

⁸ A jun jenantok yiban yulyibank'inal ti', satcan max yikcan aj yuj Cham. Max ec' junxa ak'bal yetok junxa c'ual, caytu' max yun tz'aknaj yet is cab c'ual tu'.

⁹ Lajwi tu' max yalon pax Cham axca ti': Wajnajokab oc a' aej ay yalan satcan, yin junxanej chi yuncan a', cax chi txecloj can aj tx'otx' tx'otx' yin takinal, ẍi Cham. Axca ton tu' max yunej.

¹⁰ A bay max txeclojcan aj yin takinal tu', tx'otx' max yikcanok; axa a' aej max wajnaj oc tu xin, mar max yikcan aj a' yuj Cham. Cax max yiloni tol caw wal watx' max yunej.

¹¹ Lajwi tu' max yalon Cham axca ti': Yalnejokab aj ba sat tx'otx' tx'otx' ti' masanil an ac'un, c'al an tol ay yinatil, c'al te te' chi yak' sat, tol a yul sat tu' a tu' ay yinatil, atac'ala' tzet makanil te', ẍi Cham. Axca ton tu' max yunej.

¹² Cax max yalnen aj ba bay sat tx'otx' tx'otx' ti' masanil an ac'un, an tol chi yak' sat atac'ala' tzet yinatil, c'al te te' tol chi yak' sat atac'ala' is makanil. Max yilon Dios tol caw wal watx' max elocok.

¹³ Max ec' junxa ak'bal yetok junxa c'u, caytu' max yun tz'aknaj yet is yox c'ual.

^14-15 Max yalon pax Dios axca ti': Ayokab tzektebalej bay satcan, yet chi tzektanej sat tx'otx' tx'otx' ti', yuj pojon nan c'ualil yetok ak'balil, yuj c'apax tx'oxon junjun c'u c'al abil, c'al tiempolak, ẍi Cham. Axca ton tu' max yun yelocok.

¹⁶ Max watx'nej Cham cab mimek tzektebalej. A jun tzektebal yel miman, chi oc yopiso yet c'ualil, axa jun tzektebal tol txennej k'ak'al, chi oc yopiso yet ak'balil; max watx'nen c'apax masanil waycan.

¹⁷ Cax max yaon oc Cham juntzan tzektebal tu' bay satcan yet chi tzektanej sat tx'otx' tx'otx' ti'

¹⁸ yet c'ualil c'al yet ak'balil, yetok c'apax yuj pojon nan sakk'inal yetok k'ekk'inal. Max yilon Dios tol caw wal watx' max elocok.

¹⁹ Max ec' junxa ak'bal yetok junxa c'u, caytu' max yun tz'aknaj yet is can c'ual.

²⁰ Max yalon pax Cham axca ti': Yalnejokab aj ba no no' bay yulak a' aej, c'al masanil no tz'iquin chi ec' jenenok, ẍi Cham.

²¹ Max watx'nen Dios no mimek no' ay yulak a' mar, yetokc'al masanil pojanil no no' ay yulak a' tu', c'al masanil pojanil no tz'iquin. Caw wal watx' max yil Cham.

²² Max yak'on Cham yaxilal yiban masanil no no' tu', max yalon axca ti': Uninwokokab no', ajokab can bisil no', cax nojokab el yul a' mar yuj no'. Ac'ala' c'apax no tz'iquin, ajokab can bisil no' yulyibank'inal ti', ẍi Cham.

²³ Max ec' junxa ak'bal yetok junxa c'ual, caytu' max yun tz'aknaj yet is so' c'ual.

^24-25 Lajwi tu' max yalon pax Cham axca ti': Pitzc'ojokab aj masanil pojanil no no', bay sat tx'otx' ti', no jobbejal no', c'al no xolakteal no', yetok c'apax no' chi jutx ba sat tx'otx', ẍi Cham. Axca ton tu' max yunej. Max watx'nej Cham masanil pojanil no no' ay sat tx'otx' tx'otx' ti'. Caw wal watx' max yil Cham.

²⁶ Lajwi tu xin, max yalon Cham axca ti': A tinani xin, co watx'nej anima axca jayji ti', yet watx' ay yikbej yiban no txay ay yul a' mar, c'al yiban masanil no tz'iquin, c'al yiban no jobbejal no', c'al yiban no xolakteal no', yetok c'apax yiban no' chi jutx ba sat tx'otx' tx'otx' ti', ẍi Cham.

²⁷ Cax max watx'nen Dios anima tu', axca yayji oc Cham max yutej. Max watx'nej Cham nak winak c'al ix ix.

²⁸ Lajwi tu xin, cax max yak'on Dios yaxilal yiban eb. Max yalon Dios bay eb axca ti': Ayokab e yuninal, ajokab can e bisil, nojokab el sat tx'otx' tx'otx' ti' e yuj, cax chex yajawbi yin yulyibank'inal ti'. Ayokab e yikbej yiban no txay yul a' mar, c'al yiban no tz'iquin chi ec' jenenok, c'al yiban masanil no no' chi ec' sat tx'otx' ti', ẍi Cham.

²⁹ Lajwi tu xin, max yalon Cham bay eb anima tu' axca ti': Ayin chi wak' masanil makanil an ac'un tol ay yinatil, yetok masanil sat te te' e lobejok.

³⁰ Masanil no jobbejal no', c'al no xolakteal no', c'al no' chi jutx ba sat tx'otx', c'al no tz'iquin, ayin chi wak' an ac'un c'al xaklak te' lobejok no', ẍi Cham. Axca ton tu' max yunej.

³¹ Max yilon oc Dios masanil tzet max watx'nej tol caw wal watx' masanil. Max ec' junxa ak'bal yetok junxa c'ual, caytu' max yun tz'aknaj yet is wak c'ual tu'.