Gl 6 - A Txꞌan Biblia Yin Kꞌanjobal 1989

Co col-lejek co ba

¹ Ex wuẍtak, ex wanab, ta ay junok mac chi oc yobtakil chi jila', a mac on yikem on bay Yespíritu Dios, ayon chi jaoc is nabal yin mansoc'ulalil, yet watx' chi watx'ji oc is nabal. Caw chi jilc'al co ba junjun on, yet watx' c'am chon ikbelaytok yin yobtakil yetok, cax c'am chon ayc'ayi.

² Co col-lejek co ba, yet watx' chi techaj yail juj co masanil. Ta chi co col-lej co ba, lanan jiken ley Cristo masanil.

³ Ta ay mac miman yelapnok naoni, c'am pax jabok yelapnok, ac'al oc chi yetnej ba naon tx'oklil.

⁴ Yowalil chi co beyc'ulnej co beybal yul jet junjun on. Ta chi jut axca tu', ok je' yaj can co tzalojc'ulal yuj co beybal junjun on. Man yowalilok ok co na' yin is beybal junokxa mactxel, ta yel watx' on yintak.

⁵ Yujtol junjun on, yowalil ok jak' co cuenta bay Dios, atac'ala' tzet abilcan oc yul co k'ab.

⁶ A eb chon cuyon yin k'anej Dios, yowalil chon colwaj jak'on masanil tzet watx' bay eb.

⁷ Manchak jetnej co ba co naoni tol chi je' jion aytek sat Dios. C'am junok mac chi je' yion aytek sat Cham. A tzet chi jawa', a' chi co waj sat.

⁸ Ta chi jun tzet chi yochej co yob ochwanilal, ok co cha' is pak yuj co yob ochwanilal ti', a ton camich. Palta ta a tzet chi yochej Yespíritu Dios chi jun xin, ok co cha' is pak bay Cham Espíritu tu', a ton co k'inal tol ayc'al yin tojbalk'inal.

⁹ Yuj tu', watx'okabc'al chi jut co beybal, c'amokab chi ispay aj juj. Ta c'am chi co bekek ay co watx' beybal ti', ok co cha' is pak yet ok jay tiempoal paktzelayi.

¹⁰ A tinani', yak'ban chi je' co colwaj bay eb jet animail, yowalil watx'okab chi jut co c'ul yin eb. Mawal bay eb jet creyenteal, yelokab watx' chi jut co c'ul yin eb.

C'amxa yelapnok circuncisión

¹¹ Ilek wal juntzan mimek letra chin tz'ibejtok ayin caw ayex ti'.

¹² Ay eb chi ochen chex yak' pural e yak'on circuncidar e ba; palta toc'al chi yochej eb watx' chi can eb yul sat eb yet animail. C'am chi yochej eb chi ajc'ulnelayi, axca chi yun yajc'ulnelay eb tol asan yin is camichal Cristo yin te curus ayoc is nabal.

¹³ Caxc'al chi ak'lay circuncidar eb, palta c'am chi ikchaj masanil tzet chi yal ley Moisés yuj eb, palta chi yochej eb che yak' circuncidar e ba, yet watx' chi maynej ba eb e yin, yujtol max pol-lay oc jun yechelej tu' yin e mimanil.

¹⁴ Palta ayin ti', c'am junok tzet chi wi' can in ba yin. Asan camichal Cham Jajawil Jesucristo yin te curus chi wiaj can. Yuj is camichal Cham tu', xan c'amxa yalon yet yulyibank'inal ti' win, axca tol camnakxa el yul in sat. Cax axca tol camnak inxa c'apax el bay yulyibank'inal ti', yujtol c'amxa walon wet yin.

¹⁵ Ta chi co junanej co ba yetok Cristo Jesús, c'amxa yelapnok, ta ak'bil on circuncidar ma c'amak. Ta q'uexchajnakxa co nabal, a wal jun tu' caw miman yelapnok.

¹⁶ Masanilc'al mac chi beybalnen juntzan cuybanilej ti', a ton eb tu' yel wali, israel eb yul sat Dios, yujtol is conob yayji eb. Yak'okab Dios junc'ulal bay eb, cax ok'okab c'ul yin eb c'apaxok.

¹⁷ A tinani', c'amokab junok mac chin etneni, yujtol a juntzan yechel yas ayoc win ti', a' chi tx'oxk'abnen elok, tol yak'omal in serbil Cham Jajawil Jesús.

¹⁸ Ex wuẍtak, ex wanab, yak'okabc'al Cham Jajawil Jesucristo is watx'c'ulal ayex e masanil bay tu'. Yunokabi.