Gl 5 - A Txꞌan Biblia Yin Kꞌanjobal 1989

Jet-xac'al co ba yetok Cristo tinani'

¹ A Cristo max on colon el yul k'ab ley Moisés, yet watx' jet-xac'al co ba yetok. Yuj tu xin, caw tec'an che yut e ba. A jun ley bay colbil onxa el tu', lajan wal axca junok ikatz caw wal al. Manchakxa e chaoc e yiban e yak'lay cuenta yuj.

² Abek tzet ok wala'. Ti chi waltok ayin Pablo in ti' junxa ti' ayex. Ta che chaoc jun yechelej chi yik circuncisión yin e mimanil, c'am jabok tzet ok e cha' bay Cristo.

³ Tix junxa chi waltok ayex ti'. Tzanc'al mac chi ak'lay circuncidar, yowalil chi yikej masanil tzet chi yal ley Moisés.

⁴ Axa ex mac ex txel che na' tol watx' ex satak Dios, yujtol che yikej tzet chi yal jun ley tu', c'amxa jabok e yalon e yet yin Cristo. C'amxa watx'c'ulalil Dios ok e cha'.

⁵ Axa ayon ti xin, yuj Cham Yespíritu Dios, xan chi jaoc yipok co c'ul tol ok on yal Dios watx'il. A ton jun ti' lanan jechbanen tinani', yujtol chi jaoc co c'ul yin.

⁶ Ta chi co junanej co ba yetok Cristo Jesús, c'amxa yelapnok ta ak'bil on circuncidar ma c'amak. Asannej wal jun ti' caw ay yelapnok, ta max jaoc co c'ul yin Cham sic'libil, xan chi co tx'oxil co camc'ulal bian.

⁷ Caw watx' max e yutlej e beybal yet yalantok. Palta, ¿mac xam wal max ak'on e c'ul, yuj tu' xan mayexxa yikemok bay jun cuybej a caw yel?

⁸ Manak Cham awtenej ex oc yetok, max ak'on e yunej.

⁹ Naektek, tol a jabok yich pan, pilan chi jumbi ec' xol ixim harina.

¹⁰ A Cham Jajawil chi waoc yipok in c'ul e yuj, tol man ok e yaxac'altok e nabal yin junokxa tx'ok cuybanilej. Palta tzanc'al mac chi ak'on e c'ul tu', a Dios ok aon oc yailal eb.

¹¹ A pax ayin ti' ex wuẍtak, ex wanab, k'inalok ta ac'ala'to waloni tol yowalil chi ak'lay circuncidar junok mactxel, maj mi inc'alta' yuktej ec' eb wet israelal. K'inalok ta caytu' chi wut cuywaj in ba axca tu', c'am mi chi chichon oc c'ul eb yin yabixal Cristo yin te curus.

¹² A eb chi ec' ak'on e c'ul, tol che yak' circuncidar e ba, matawal chi polxac'al eltek eb is yetbeyom is mimanil tu' junelnej.

¹³ Ex wuẍtak, ex wanab, awtebil ex yuj Dios, yet watx' munil e yet e ba jetok. Palta caxc'al munil jet co ba, man yujok tu', ok je' jak'balnen co yob ochwanilal. Yelxac'al watx' chi jak'lej serbil co ba, yuj co camc'ulal.

¹⁴ Masanilc'al tzet ayay yul ley Moisés, pilan chi txecloj el yin jun chekbanil ok waltek ti': Che ya'ilnej e yet animail axca che yut e ya'ilnen e ba junjun ex, ẍi.

¹⁵ Palta ta ac'al owal naan e yuj e nan e xol, caw wal ay is may ok e yak'lej c'ayil e ba.

Cham Espíritu Santo, yetok co yob ochwanilal

¹⁶ Chi wal c'apaxtok junxa ti' ayex. Co beybalnejek wal tzet chi yochej c'ul Cham Yespíritu Dios. Catatu' bian, man ok co beybalnej tzet chi yochej co yob ochwanilal.

¹⁷ Yujtol a jun co yob ochwanilal ti', yajc'ul ba yetok Cham Yespíritu Dios. Axa Cham Espíritu tu', ajc'ul c'apax oc yin co yob ochwanilal, xan caw yajc'ul ba. Yuj tu', ijan wal c'am chi je' watx' chi jut co beybal axca chi jochej.

¹⁸ Palta ta lanan co beybalnen axca chon yut yikban Cham Yespíritu Dios, c'amxa yalon yet ley jin.

¹⁹ A eb chi beybalnej is yob ochwanilal, caw miman txequel tzet chi el yunen eb: Chi say eb yix yul k'ab yistzil, ma chi say eb yob yul k'ab yichamil, yetok juntzanxa tzet c'am watx'il chi el yunen eb yetok is mimanil. Asanc'al tzet q'uixwiltak chi el yunen eb.

²⁰ Chi yal ba eb bay juntzan tzet chi yaoc eb is diosalok. Chi balnej eb junokxa mactxel. Chi yajc'ulnej aj ba eb, owalc'al ay eb. Chi yak' eb sawenal yin junok mac watx' ay. C'un tit yowal eb. Chi yochej eb tol asannej eb ay yelapnok. Chi pojchajtok eb, tx'ok tx'okxac'al bay chi el botzan eb.

²¹ Chi yochej oc eb tzet ay junokxa mactxel. Chi uc'wi an eb. Chi wekeki eb, cax chi el yunen eb juntzanxa axca ton juntzan ti'. Caxc'al max wal jun ti' ayex yet yalantok, palta ti' chi waltok ayex junelxa: A eb chi el yunen juntzan chi waltek ti', tutun wal c'am jabok yalon eb yet yoc yul k'ab Dios.

²² A pax Cham Yespíritu Dios xin, a' chi ak'on junej tol chi co camc'ulnen co ba, chon tzaloji, chon ayji ec' yin junc'ulal. Chi yak'on c'apax jak' techaj tzanc'al tzet chi jay jiban. Yuj Yespíritu tu' xan ay co yabenc'ulal bay eb jet animail, watx' chi jut co nabal yin eb. Yuj c'apaxok, xan yikem on.

²³ Yaynakil chi jut co ba. Yuj Cham, xan chi je' co mitx'on oc waan co ba. A juntzan watx' beybalej ti', c'am junok ley chi aloni tol c'am chi el juneni.

²⁴ A mac on txel yetonxa Cristo Jesús, axca tol curusnebilxa co yob ochwanilal yul co sat, c'amxa yelapnok juntzan tzet man watx'ok chi jochej ocok.

²⁵ A Cham Yespíritu Dios chi ak'on co k'inal tol ayc'al yin tojbalk'inal. Yuj tu', yowalil chi co beybalnej axca chi yochej Cham.

²⁶ Manchak co maynejek co ba, yet watx' c'am chi co tx'emlejek co ba. Manchak jochejek oc tzet ay junokxa jet creyenteal.