Gl 4 - A Txꞌan Biblia Yin Kꞌanjobal 19891 Chi wochej chi wal c'apaxtok junxa ti' ayex. K'inalok ay junok unin tinani', tol ok yi' can masanil tzet ay is mam. Caxc'al ok yi' can masanil, palta a yet yaliẍto, lajanc'al axca junok mosejal, 2 yujtol ay mac chi ak'on cuenta. Ak'biltoc'al mandar masantac'al chi jay jun c'ual, cax chi yalon is mam tol ok yi' can tzet ay is mam tu'. 3 A yet yalan, axca tol unin on, yujtol a beybal jun yulyibank'inal ti' chon ikbani. 4 Palta a yet max ajapnok tiempoal, max yaontek Dios is C'ajol, max ul aljok yin jun ix ix axca chi yun jalji ayon anima on ti'. Max ul yuten ba israelal. Ayoc yul k'ab ley Moisés. 5 Caytu' max yun yulic'ok, yet max con ul colon el yul k'ab jun ley tu', cax chon yion oc Dios yuninalok. 6 Max yatek Dios Cham Yespíritu is C'ajol jin junjun on, yet watx' chi txecloj elok, tol yuninal onxa. A Cham Espíritu ayoc jin, a yet chi aj yaw Cham: Mamin, Mamin, ẍi Cham. 7 Yuj tu', manxa mosejalok jayji oc tinani', yujtol yuninal onxa Dios. Yuj Cristo xan aj satakwom onxa c'apax yin is tzet yetal Dios. Is cusc'ulal Pablo yuj eb creyente 8 A yet yalan, manto e yojtakok Dios. Max e yak' serbil juntzan chi al-lay oc diosal; palta man diosok. 9 Axa tinani xin, e yojtakxa Dios, yel watx' ta chi jala' tol a Dios ojtaknen exxa. Yuj tu', ¿tzet yuj xan chex meltzoj pax bay cuybej c'am yelapnok tol c'am tzet chi oqui? ¿Tzet yuj xan chito wal e yochej che yak' serbil, cax chex oc pax mosejal bay junelxa? 10 Ilab tol aytoc'al juntzan c'u miman yelapnok yul e sat, yet chi ec' junjun xajaw. Aytoc'al tiempolak miman yelapnok yul e sat, c'al abil. 11 Caw chin oc wal il talaj nabac'al max in ec' mulnaj e nan e xol bay tu'. 12 Ex wuẍtak, ex wanab, chin tewitok ayex, tol lajanokab che yut e nabal wetok, yujtol ayin ti', lajan max wut in nabal e yetok yet max in ec' ayex tu'. Watx'c'al max e yut e ba ayin. 13 E yojtak, tol a yet max quin ec' ayex tu' yet babelal, yuj jun yailal ayoc win, xan max walcan el k'anejal yet colbanilej e nan e xol. 14 Caw wal yob max e yab yuj jun in yailal tu', palta maj quin e yintaknej el yuj. C'am tzet max e yala', ta c'am welapnok yul e sat. Axca chi jut co chaon jay junok yángel Dios, c'al Cristo Jesús chi jayi, caywal tu' max quin e yut e chaoni. 15 Palta ¿tzet yayji e tzalojc'ulal tu' tinani xin? Wal yel chi waltok ayex, caw xiwil e tzalojc'ulal wetok yet max in betic' tu'. Ilabi k'inalok ta max je', max e yieltek e bak' sat, cax che yak'on ayin, palta maj je' e yuj. 16 A tinani xin, ¿xin ta chi jajc'ulnej aj co ba e yetok yujtol chi waltok juntzan k'anej caw yel ti' ayex? 17 Ay eb chex tz'ak camc'ulneni, palta man yinok masanil c'ul eb, yujtol toc'al chi yochej eb che yiel e nabal jin, cax che yaon oc e nabal yin eb. 18 Watx' toni, ta ay mac chi co camc'ulnej, palta yinokab masanil co c'ul. Matawal caytu' che yut e ba ayin masanil tiempo, cax mannejokabc'alnak yet ayin ec' e yetok bay tu'. 19 Ex camc'ulnebil wuj, axca yaben yail junok ix ix yet chi alji yune', axca tu' waben yail e yuj, masantac'al ok lajtx'oj oc e nabal axca yet Cristo. 20 Matawal ayin ec' e yetok bay tu' tinani', yet watx' chi wal yin bayc'al ijanil, yujtol a tinani' c'am chi nachaj el wuj tzet chi wal ayex. Ix Agar yetok xal Sara 21 Che yochej ayex ti', tol a ley Moisés che yikej, palta, ¿tom c'am che natek xin, tzet chi yal jun ley tu'? 22 Yujtol a' chi alontek yuj Abraham, tol ay cawan is c'ajol. Ay jun max alji bay ix mosejal yayji, ix chi yik Agar. Ay junxa max alji bay xal is yetbi. A xal acaw yetbi Abraham tu', c'am mac bay ayoc xal yin mosejal. 23 A nak aljinak bay ix mosejal yayji tu', axcac'alta' yalji anima max yun yalji, palta jun chi yik Isaac, aljinak yin xal yet ba yetok yichamil tu'. Yuj yipalil Dios xan aljinak, yujtol albil yuj Dios yin ayokto. 24 A jun yabixal eb xal ti', tx'oxbanil yayji. A cawan xal chi binajtek ti', a cab is trato Dios chi tx'oxtek eb yenel. A xal Agar, yenel jun is trato Dios chabilcan bay tzalan Sinaí. Axca wal tol yune' xal eb ay yet jun trato tu', yujtol ayoc eb tu' yin yak'omal serbil. 25 A xal Agar tu', yenel jun tzalan Sinaí yul yet Arabia yayji oc xal, yenel c'apax conob Jerusalén yayji, yujtol a eb aj conob bay tu', yak'omalto serbil ley yayji eb. 26 Axa xal yet ba, yenel junxa Jerusalén ay bay satcan yayji, a' ayon yet. Yuj tu', jetc'al co ba co tx'oklil, c'am onxa oc yalan jun ley tu'. 27 Chi yal tx'an Un Tz'ibbilcan axca ti': A Jerusalén, lajan wal axca junok ix ix tol c'amc'alta' yune', cax bekbilcan yuj yichamil. Axa tinani' moj tol chi awji, chi bitni yin tzalojc'ulal, yujtol xiwilxa yune' ok yila' yintak junok ix ix c'amc'al bay max beklaycan yuj yichamil, ẍi yul tx'an Un tu'. 28 Ex wuẍtak, ex wanab, lajan on axca nak Isaac, yujtol yak'nak Dios is ti', xan max con occan yuninalok. 29 Palta a yet payxa tu', a nak toc'al aljinak axcac'al yalji anima tu', yak'nak nak ajc'ulal yin nak aljinak yuj is yipalil Cham Espíritu Santo. Axca ton max utlay nak tu', caytu' chon yut eb chi yikej ley tinani'. 30 Palta chi yal tx'an Un Tz'ibbilcan axca ti': Uktej el ix mosejal ti' yetok is yune tu', yujtol man ok je' yion nak yune' ix mosejal yayji tu' is satak yetok nak yune' xal tol yet ba yetok yichamil, ẍi yul tx'an Un tu'. 31 Yuj tu' ex wuẍtak, ex wanab, mayon lajanok axca nak yune' ix mosejal tu', palta lajan on axca nak yune' xal yet ba yetok yichamil tu'. |
Kanjobal (Q’anjob’al) © Sociedad Bíblica de Guatemala 1989
Bible Society in Guatemala