Gl 3 - A Txꞌan Biblia Yin Kꞌanjobal 1989

C'am chi je' jaon oc ley yipok co c'ul

¹ Ex aj Galacia, caw wal c'am jabok e nabal. Tekan ay junok mac max ak'on etax el e nabal axca chi yun yetnelay el nabalej yuj eb ajtxum. Yuj tu' xan mayexxa yikemok bay jun cuybanilej caw yel. A yet max con ec' ayex bay tu', max jalcan ayex, tol camnak Jesucristo yin te curus. Axca wal tol caw yel max e yil cami.

² Mata che yal ayin, ¿tom yuj max e yikej ley Moisés, xan max e cha' cham Espíritu Santo? C'amak. Ato yet max e yaon oc yin e c'ul jun k'anejal yet colbanilej max al-lay ayex, max e chaon Cham.

³ ¿Tom wal junelnej c'am jabok e nabal xin? A Cham Espíritu Santo max chaon el yich yak'on e k'inal. Axa tinani', ¿tom che yochej che tz'aktzej e k'inal tu' yuj e yunben yul e yet?

⁴ Xiwil yailal e yilnak yujc'al Cristo, palta ijan wal tol nabac'al. Matawal man nabaok max e yil yailal tu'.

⁵ Max yak' Dios Cham Espíritu Santo ayon, max tx'ox c'apax milagro co xol. Palta ¿tzet yuj xan che na'? Man yujok jiken ley Moisés, palta yuj jaon oc co c'ul yin jun k'anejal yet colbanilej max al-lay ayon.

⁶ Axa yaon oc Abraham yin c'ul tzet max yal Dios bay, xan watx' max yun cancan yul sat Cham.

⁷ Yuj tu xin, nachajokab el e yuj tol a mac chi yaoc c'ul yin Dios, a ton eb tu' caw yel yinatil Abraham eb.

⁸ Ayokto max al-laycan yul tx'an Un Tz'ibbilcanok, tol ayex mayex israelok, ok ex oc watx'il yul sat Dios, asan yuj che yaoc e c'ul yin. Yettax payxa albilcan jun watx' abix bay Abraham axca ti': Ojc'al ok wak' in watx'c'ulal bay masanil nacionlak, ẍi.

⁹ Yuj tu', ta chi jaoc co c'ul yin Dios, lajan chi jut co chaon is watx'c'ulal tu' axca yutnak chaon Abraham tu', yujtol yanak oc yin c'ul.

¹⁰ A eb chi yaoc yikemal bay ley Moisés yipok c'ul, aytek yowal c'ul Dios yiban eb. Yujtol chi yal tx'an Un axca ti': Catabnelayokab mactxel c'am chi ikenc'al masanil tzet tz'ibbilcan yul ley, ẍi yul tx'an.

¹¹ Palta caw miman txequel, tol c'am junok mac watx' yul sat Dios, yujc'al tol chi yikej eb ley tu'. Yujtol chi yal c'apax axca ti': A eb watx' yul in sat, ok ayjokc'al ec' eb, yujtol chin yac'al oc eb yin c'ul, ẍi Dios yul tx'an.

¹² A jun ley tu', c'am tzet chi yala' ta yowalil chi jaoc co c'ul yin Dios, palta chi yal axca ti': A eb chi iken masanil juntzan chekbanil ti', ok iquisbokc'al eb yuj, ẍi.

¹³ Aytek yowal c'ul Dios jiban yuj jun ley tu', palta a Cristo max on colon eltek yalan jun yowal c'ulej tu', yujtol max chaoc yowal c'ul Dios tu' yiban co q'uexelok. Yujtol chi yal yul tx'an Un axca ti': Ayoc catab Dios yiban tzanc'al mactxel chi aj locan yin junok te te', ẍi.

¹⁴ Caytu' max utlay Cristo Jesús yuj tx'oxon Dios is watx'c'ulal ayex, ex mayex israelok jetok ti', axca yutnak tx'oxon is watx'c'ulal bay Abraham yet payxa. Ac'ala' yuj Cristo ti', xan chabilxa Cham Espíritu Santo juj co masanil, yujtol max jaoc Dios yin co c'ul, axca max yun yaloncanok.

Is ley Moisés, yetok jun yalben Dios

¹⁵ Ex wuẍtak ex wanab, chi wochej ok wak' binaj co beybal ayon anima on ti'. A yet chi co watx'nen junok co trato yetok junok jet animail, chi co watx'nejcan yunal, cax chi jaoncan ay co k'ab yin jun un tu'. Yuj tu', c'am junok mactxel chi je' yetnentok, cax c'am c'apax mac chi je' yaon oc tz'ak.

¹⁶ A Dios max yak' ti' bay Abraham, c'al bay yinatil Abraham tu': A eb enatil, man ẍiok yul tx'an Un Tz'ibbilcanok. Yujtol man xiwilok eb yinatil bay max yala'. Palta chi yal axca ti': Bay enatil, ẍi, yujtol junnej yinatil Abraham tu' bay max yala', a jun tu' a ton Cristo.

¹⁷ A ton jun ti' chi wochej chi waltok ayex, tol a Dios, yak'nak is trato yetok Abraham, tx'oxk'abnejnak elok tol yowalil ok yunej. 430 abilxa yak'on jun is trato tu', cax max ak'lay ley Moisés, palta maj etax el jun trato tu' yuj jun ley tu'. A jun tzet albilcan yuj Dios yet max yak'on is ti' tu', maj c'ayil yuj jun ley tu'.

¹⁸ K'inalok ta yuj max yikej Abraham jun ley tu', max mi cha tzet yaltejnak Dios bay, man xam yujok tol yak'nakcan Cham is ti' bay. Palta a Cham max yak' is ti' saon watx'ilal tu' bay Abraham.

¹⁹ Palta, ¿tzet pax yopiso jun ley tu' che na'? Ak'bil jun ley tu', yet watx' chi txeclonej eltek yobtakil junjun anima. Txequelnej jantak tiempo t'inan yoc yopiso jun ley tu', masantac'al yet jaynak jun yinatil Abraham, jun mac bay yak'nak Dios is ti'. A eb ángel alnejcan jun ley tu'. Axa Moisés max occan yin ajtial nan xol Dios yetok eb conob.

²⁰ Palta a tinani', manxa yowalilok ay junok mac chi oc ajtial, yujtol junnej mac max yak' is trato, a ton Dios.

Is yopiso ley Moisés

²¹ Palta a ley Moisés tu', man yajc'ulok ba yetok juntzan tzet albilcan yuj Dios yet max yak'on is ti'. K'inalok ta ak'bil junok ley bay chi je' jion co k'inal tol ayc'al yin tojbalk'inal, k'inalok ta axca tu', chi mi yal Dios tol watx' on yul sat, yujc'al chi jikej jun ley tu'.

²² Palta chi yal yul tx'an Un, tol masanil anima, ayic' eb xol yobtakil. Caytu' yaloni, yet watx' a ayon mayal jaoc co c'ul yin Jesucristo ti', chi co cha' jun yalben Dios max yal yet max yak'on is ti' tu'. Asan yuj chi jaoc Cham yin co c'ul, xan chi co cha'.

²³ A yet c'amto chi jayoc jun mac yin chi jaoc co c'ul tu', ayonto oc yul k'ab jun ley tu'. Axca wal tol mitx'bil on tzakay yuj, masantac'al max txecloj aj mac bay chi jaoc co c'ul tu'.

²⁴ Yujtol a yopiso jun ley tu', tol chon yak' cuenta, masantac'al max jay Cristo. A tinani', watx' on yul sat Dios, yujtol a yin chi jaoc co c'ul.

²⁵ C'am onxa oc yul k'ab jun chon ak'on cuenta tu', yujtol ayxa oc Cristo yin co c'ul tinani'.

²⁶ Yujtol chi jaoc Cham yin co c'ul, yuj tu' xan yuninal onxa Dios, junxanej jayji yetok Cristo Jesús co masanil.

²⁷ A yet chon ak'lay bautizar, junxanej chi juncan el yetok Cristo. Jantak onc'al chon ak'lay bautizar, axca tol chi oc Cristo co pichilok.

²⁸ C'amxa yelapnok ta israel on, ma griego on. Caxc'al mosejal on, caxc'al jet co ba, caxc'al winak, caxc'al ix, c'am yelapnok, yujtol junxanej jayji co masanil yetok Cristo Jesús, axca wal tol junxanej animail jayji co masanil.

²⁹ Yujtol yet onxa Cristo xin, xan yinatil exxa Abraham jetok, xan a jun tzet max yalcan Dios, yet max yak'on is ti' tol ok co cha', jet-xa ok yunej.