Ez 48 - A Txꞌan Biblia Yin Kꞌanjobal 1989

Pojbanilal ec' jun nación tu' xol tribual Israel

^1-7 A is mojonail tx'otx' yet Israel bay norte, chi tojtac'al bay a' Mediterráneo chi ec'tok bay Hetlón, yetok bay chon octok bay Hamat, c'al bay Hazar-enán, axa bay sur yet tx'otx' yet Damasco, c'al Hamat. Junjunc'al tribual Israel chi cha' junok makan tx'otx' tx'otx' is satakok chi tojtac'al bay mojonail bay yetc'ulal yichcan, masantac'al chi apni oc bay a' Mar Mediterráneo, bay yetc'ulal yayub c'u. Caytu' yayji is txolilal, chi chael yich bay norte cax chi beyc'altoj bay sur: Dan Aser Neftalí Manasés Efraín Rubén Judá

⁸ A bay is tz'eyil tx'otx' yet Judá, a tu' ay jun tx'otx' sic'bil elok: ay nan is yoxlajoneb kilómetro is sat. Axa is tel, lajan yetok yet junjun tribu, chi tittac'al bay yetc'ulal yichcan, cax chi apni bay yetc'ulal yayubc'u. A bay nan xol tx'otx' tu', a tu' ay templo.

Tx'otx' tx'otx' yet Jehová yayji ocok

⁹ A jun makan tx'otx' tx'otx' wet yayji oc tu', ay nan is yoxlajoneb kilómetro is tel, yetok lajoneb kilómetro is sat.

¹⁰ A bay jun makan tx'otx' tu', ay junok makan tx'otx' tol yet eb sacerdote yayji ocok. Nan is yoxlajoneb kilómetro is tel, axa sat, oyeb kilómetro. A bay nan yul tu', a tu' ay in templo.

¹¹ A jun tx'otx' tu', yet eb sacerdote ayoc yin in yak'on serbil, a ton eb yinatil Sadoc, maj tzakloj eb yintak eb yet israelal, yet max yion el ba eb wintak, axca max yut ba eb yet levitail eb.

¹² Yuj tu' xan a bay jun makan tx'otx' tol wet yayji ocok, tx'otx' junej ay yetok yet eb levita, a bay tu' ay jun makan tx'otx' tol asan eb sacerdote ay yet.

¹³ A bay ti' tx'otx' yet eb sacerdote, a tu' ay c'apax tx'otx' yet eb levita. A tx'otx' tu' ay nan is yoxlajoneb kilómetro is tel yetok oyeb kilómetro is sat. Axa pax tx'otx' wet yayji oc xin, ay nan is yoxlajoneb kilómetro is tel yetok lajoneb kilómetro is sat.

¹⁴ A ton wal jun makan tx'otx' tu' yelxac'al watx' bay yul nación tu'. C'am junok makan tx'otx' tu' chi je' txonlay elok. C'am c'apax chi je' q'uexlayi, tamwal chi je' yak'lay bay junokxa mactxel, yujtol junelnej wet yayji ocok.

¹⁵ Axa janic'xa tx'otx' xin, ay nan is yoxlajoneb kilómetro is tel yetok nan yox kilómetro is sat manxa wetok yayji ocok. A bay nan yul tx'otx' tu', a tu' ay miman conob. Axa jantakto colan, chi je' cajay anima c'al yoc lobalok no no'.

¹⁶ A jun conob tu' ay 2,250 metro junjun paq'uil.

¹⁷ A bay yinlak conob tu', a tu' ay lobal no no'. A jun makan tx'otx' tu' ay 125 metro is sat bay can paq'uil conob tu'.

¹⁸ A bay tz'eyil-lak jun conob tu', junej ay yetok tx'otx' wet yayji ocok. Ay jun makan tx'otx' tx'otx' tu', ay oyeb kilómetro is tel bay yetc'ulal yichcan bay conob tu', ac'ala' oyeb kilómetro is tel bay yetc'ulal yayubc'u. A jun tx'otx' tu' chi oc mulnajil yiban, axa sat awoj chi wajlay bay xin, a' chi lo' eb anima chi mulnaj bay yul conobal.

¹⁹ A eb chi mulnaj bay yul conobal tu', tzanc'al mac tribual yet Israel, chi je' mulnaj bay jun makan tx'otx' tu'.

²⁰ Masanil tx'otx' tx'otx' sic'bilcan elok, a ton tx'otx' wet yayji ocok, yetokc'al tx'otx' yet conobal yayji. A masanil juntzan tu' ay nan yoxlajoneb kilómetro junjun pac'.

A tx'otx' yet yajaw

^21-22 A mac ayoc yin yajawil, a chi ion tx'otx' aycan yul nan tx'otx' yet Judá, yetok tx'otx' yet Benjamín; chi yal elapnok, a ton tx'otx' tz'eyil tx'otx' wet yayji ocok, c'al tz'eyil tx'otx' yet conobal. A tx'otx' tu', ay nan is yoxlajoneb kilómetro is sat, cax chi beyc'altoj bay yetc'ulal yichcan, masantac'al chi apni oc bay mojonail nación Israel bay tu'. Axa pax bay yayubc'u xin, masantac'al bay a' Mar Mediterráneo chi apni ocok. Axa bay nan yul, a tu' chi cancan tx'otx' wet yayji ocok, bay ay templo. A tu' ay c'apax tx'otx' yet eb sacerdote, c'al yet eb levita, c'al tx'otx' bay ayay miman conob.

Is tx'otx' juntzanxa tribu

^23-27 A is tx'otx' juntzanxa tribu, chi tojc'al bay sur. Junjunc'al tribu, chi cha' junjun makan is tx'otx' chi tojtac'al bay mojon, bay yetc'ulal yichcan, masantac'al chi apni oc bay mojon bay yetc'ulal yayubc'u. Caytu' yayji yin txolilal axca ti': Benjamín Simeón Isacar Zabulón Gad

²⁸ A bay yetc'ulal sur a tu' ay tx'otx' yet Gad, a is mojonail, chi tojtac'al bay Tamar, chi ec'tok bay nuk' aejlak yet Meriba-cades, c'al bay a' elom aej yet Egipto, masantac'al chi apni oc bay a' Mar Mediterráneo.

²⁹ A ton jun tx'otx' tu' ok cha' eb is tribual Israel. Caywal tu' ok yun e pojon ec' tx'otx', ẍi Jehová Cham Yajaw.

Puertail-lak conob

^30-34 A jun conob nan yul tx'otx' tu', ayoc muralla yinlak. 2,250 metro yayji junjun is paq'uil, cax lajanc'al can paq'uil. A bay junjun paq'uil ay oxeb puerta. A yin junjun puerta chi binaj junjun tribu yin, axca ti' yayji txolilal. A juntzan puerta bay norte chi yik: Rubén, Judá c'al Leví; axa bay yetc'ulal yichcan chi yik: José, Benjamín c'al Dan; axa pax bay sur chi yik: Simeón, Isacar c'al Zabulón; axa bay yetc'ulal yayubc'u chi yik: Gad, Aser c'al Neftalí.

³⁵ A jun muralla tu' baloneb kilómetro yayji oc yinlak miman conob tu', axa is bi jun conob tu' yet ok beyc'altok: A Jehová ayic' cayti', ok yika', ẍi Cham.