Ez 45 - A Txꞌan Biblia Yin Kꞌanjobal 1989

A tx'otx' tx'otx' tol yet Jehová yayji ocok

¹ A yet chi oc suerte yin pojlay ec' tx'otx' tx'otx' yin junjun tribu, yowalil chi pojlaycan el janic' tx'otx' ti', nan is yoxlajoneb kilómetro is tel, yetok lajoneb kilómetro sat; a jun tx'otx' tu' wet yayji. Masanil jun makan tx'otx' tu', wet chi yuncanok.

² A bay nan yul tx'otx' tu', a tu' chi pojlay can el jun makan yet templo, 250 metro chi yuncanok. Lajanc'al chi yun yechel junjun pac'. A bay yinlak tu' chi can c'apax junxa 25 metro sat tol colan chi yuncanok.

³ A yul jun makan tx'otx' tx'otx' tol wet chi yuncan tu', ay jun makan, nan is yoxlajoneb kilómetro is tel, yetok oyeb kilómetro is sat. A nan yul jun makan tu' yowalil chi ayji templo tol wet yayji ocok.

⁴ A jun makan tx'otx' tu' yet eb sacerdote chi mulnaj bay templo chi yunej, a ton eb chi oc in satak yin in yak'on serbil. A bay tu' chi je' watx'nen aj eb yatut, c'al watx'ji aj in templo.

⁵ Ac'ala', ay c'apax junxa makan tx'otx' tx'otx' tu' nan is yoxlajoneb kilómetro is tel, yetok oyeb kilómetro is sat. A jun tu', yet eb levita chi yuncanok, a ton eb chi mulnaj bay templo, yet watx' ay bay chi watx'nej aj eb is conobal bay chi cajay eb.

⁶ Axa yin is lajubal xin, yowalil chi can junxa makan tx'otx' tx'otx' bay c'atan tx'otx' wet yayji ocok. A jun makan tu' yet conobal chi yuncanok. Nan is yoxlajoneb kilómetro chi yun is k'atil yetok nan is yox kilómetro chi yun sat, yet conob Israel chi yuncanok.

A tx'otx' tx'otx' yet cham yajaw

⁷ Yetok c'apaxok, ay cab makan tx'otx' tx'otx' yet yajaw chi yuncanok. Ay jun makan tx'otx' ay bay yetc'ulal yichcan, axa junxa makan tx'otx' xin, a tu' chi can bay yetc'ulal yayubc'u, chi yal elapnok a ton bay jun tz'eyil tx'otx' wet yayji ocok, c'al tz'eyil tx'otx' yet conobal yayji. Lajanc'al is tel yetok junok makan tx'otx' tx'otx' yet junok tribu.

⁸ A jun makan tx'otx' tu', yet yajaw bay Israel yayji ocok. Yuj tu xin, manxa ok yiec' eb is tx'otx'al conob, palta tol chi can tx'otx' bay junjun makan tribu.

Ley yin eb cham yajaw

⁹ Ayin wal caw Jehová in chi wala': K'okbilxa ex yajaw bay Israel. C'amxa che yetnej eb anima; palta watx'c'al che yut e ba, tojolc'al che yun yin e beyc'ulal. Ayin wal caw Jehová Yajaw in chi wala': Bekek e tok'on ec' tx'otx' eb in conob.

¹⁰ A wal echbal caw tz'akan che k'ana'.

¹¹ A e yechbal che k'an yin tzet yetal tol yin bak'ejal, a' che yak'balnej c'apax yin aejal. A jun echbal tu' chi yik homer, ay 220 litro yul. A' chi ak'on yechel masanil echbal. A junok homer, chi yi' lajoneb bato tzet yetal yin aejal, ma lajoneb efa tzet yetal yin bak'ejal.

¹² Ac'ala' c'apax tzet yetal tol chi echelayi: A 20 gera, lajan axca jun siclo;*fn* axa pax 60 siclo lajan axca jun mina.

¹³ A ton juntzan ofrenda ti' yowalil che yak'a': A ixim trigo, c'al ixim cebada che yi', 60 makan che yutej. A junok makan tu' che yak' yin ofrendail.

¹⁴ Cay c'apax tu' che yun yetok aceite, 100 makan che yutej; jun makan che yak' c'apax yin ofrendail.

¹⁵ Axa pax yin no calnel chi low bay yax ac'un yul yet Israel, jun no' che yiel yin 200. Ayin wal caw Jehová in chi wala', tol a masanil juntzan ti' ok k'anlay yin ofrendail yin ixim trigo, c'al yin xajanbal chi tz'a'i, c'al yin xajanbal yet junc'ulalil, yuj yak'lay tan is mul in conob Israel.

¹⁶ Yowalil chi yak' masanil conob Israel juntzan ofrenda tu' bay mac yajaw yayji xol eb.

¹⁷ A mac yajaw tu' chi ak'on no no' chi tz'a yin xajanbalil, yetokc'al ofrenda yin ixim trigo, c'al yin vino chi ak'lay yet unin xajaw, yetok yet c'ual xewilal, c'al yet juntzan mimek k'in. Yowalil chi yak' c'apax xajanbal yuj yak'lay tan yobtakilal, c'al ofrenda yin ixim trigo, yetok xajanbal chi tz'a'i, c'al xajanbal yet junc'ulal, yet watx' chi ak'lay tan yobtakilal eb yinatil Israel.

K'in Pascua

¹⁸ Ayin wal caw Jehová Yajaw in chi wala': A yet babel c'ual, yet babel xajaw, yowalil che yak' junok no ach'ej wacax c'am is tacnakil yet chi tancan el yobtakilal bay templo.

¹⁹ A cham sat sacerdote ok yiaj janic'ok is chiq'uil no no' tu', a ton no' max ak'lay yin xajanbalil yuj yak'lay tan yobtakilal. Ok bonon oc yin marcoal is puertail templo, yetokc'al yinlak is canebal txiquin yet yox makan yich altar tol can ayajok, yetokc'al yin is marcoal puertalak yet is cab amak'.

²⁰ Ac'ala' caytu' chi yun c'apax yet is suk c'ual, yuj tzanc'al mactxel chi oc is yobtakilal yin tol man yinok c'ul chi tita, ma yin tol man yojtakok, ta lanan yoc is yobtakilal. Caytu' chi yun sakbican el templo.

²¹ A yet 14 waay yet babel xajaw, cax che chaon el yich e chaon k'in Pascua. Ukeb c'u che lo' ixim pan tol c'am yich ay ocok.

²² A yet jun c'ual tu', a jun ayoc yin yajawilal, yowalil chi yak' junok no toro yin xajanbalil yuj is yobtakilal, yuj c'apax yet masanil conob.

²³ A yet junjun c'u yin ukeb c'ual k'in tu', yowalil chi yak' jun yajaw tu' ukc'on no ach'ej wacax, c'al ukc'on no icham calnel, a ton wal no' tol c'am jabok is tacnakilal. Chi ak'lay tz'a no' yin xajanbalil ayin. Yetok c'apax no' tu', chi ak'lay junok no' mam chiwo yin xajanbalil yuj yak'lay tan yobtakilal.

²⁴ A yetok junjun no wacax tu' yetokc'al junjun no calnel tu', chi ak'lay c'apax 20 litro ixim trigo, yetok nan is can litro aceite.

K'in yet chinama

²⁵ Ac'ala' pax yet ukeb c'ual k'in yet Chinama, a ton jun tu' chi chalay yet 15 waay yet is suk xajaw. A jun yajaw tu' yowalil chi yak'c'al xajanbal. Ok yak' no no' yin lajanc'al bisil, axca yet k'in Pascua, a ton no' chi ak'lay yin xajanbalil yuj yobtakil, c'al no' chi ak'lay tz'a yin xajanbalil, yetok ofrenda yin ixim trigo c'al aceite.