Ez 41 - A Txꞌan Biblia Yin Kꞌanjobal 1989

¹ Lajwi tu xin, max wiloni tol max in yioctok jun winak tu' bay yul templo, cax max yechen is paredal bay puertail bay yul, oxeb metro is pimal.

² Axa is puertail, ay oyeb metro is sat; axa janic' pared ti' puerta tu', nan yox metro ayiltek bay junjun paq'uil. Lajwi tu' max yechen c'apax jun babel cuarto; a jun tu' ay 20 metro is k'atil, yetok 10 metro is sat.

³ Lajwi tu', max toj yechen junxa cuarto bay yichocok. Max yechen is paredal bay ti' puerta, jun metro is pimal, axa puerta tu', ay oxeb metro sat, axa janic' pared bay junjun paq'uil ti' puerta tu', nan is can metro ayiltek.

⁴ Lajwi tu', max yechen jun cuarto bay yich tu', 10 metro junjun pac'. Max yalon ayin: A jun cuarto ti', asan Dios ay yet, ẍi ayin.

Juntzan cuartolak watx'nebil aj yetok is paredal templo

⁵ Lajwi tu', max yechen jun winak tu' is paredal jun templo tu', ay oxeb metro is pimal. A bay yinlak templo tol junej yayji yetok, ay cuartolak cab metro yayji yich junjun.

⁶ A juntzan cuarto tu', ayoc jun yiban junxa, oxeb piso yayji, axa yin junjun piso, ay 30 cuarto. Axa is paredal templo, lac'anxac'al oc yin junjun piso. A yiban juntzan tu', a tu' chi octok is patzabil junjun cuarto; yuj tu' xan c'am chi octok yul pared.

⁷ A juntzan cuarto ayoc yinlak tu', a juntzan ay bay yet is cab piso, miman yul yintak juntzan ay bay babel piso. Axa juntzan bay yox piso, miman yul yintak juntzan bay is cab piso. Ay jun k'och be chi toj bay babel piso, chi ec'aj bay is cab piso, masantac'al chi ajapnok bay yet yox piso.

^8-11 Max wilon jun templo watx'nebil aj yiban is yich, tol oxeb metro ayaj can; ac'al oc jun tu' ayoc yichok juntzan cuarto ay bay yinlak templo. A jun pared ay yin juntzan cuarto tu', ay nan yox metro is pimal, nan yox metro etxan can eltok jun yich tu' yinlak templo. Ay jun amak' bay yinlak templo, 10 metro is sat nan xol templo yetok is cuartolak eb sacerdote. Ay puerta yet juntzan cuarto bay yinlak templo chi elol bay amak' ay bay yinlak tu'. Ay jun puerta bay yetc'ulal norte, ay c'apax junxa bay yetc'ulal sur.

Jun na bay yetc'ulal yayubc'u

¹² A bay yetc'ulal yayubc'u bay yetc'ulal jun amak', yinlak templo ay jun na ay 35 metro is sat yetok 45 metro is k'atil yul. A is paredal ay nan yox metro is pimal.

Yechel templo yin masanil

¹³ Max yechej jun winak tu' is k'atil templo. Chi tojtac'al bay yintak templo. Masanil sat amak', yetok jun na bay yetc'ulal yayubc'u c'al yetok pimal is paredal, ay 50 metro yin masanil.

¹⁴ A is satak jun templo tu', chi cancan bay yetc'ulal yichcan, yetok jun amak' ay yinlak tu', ay 50 metro.

¹⁵ Lajwi tu', max yechen is k'atil jun na ay bay yintak templo, acantek bay amak' yetok is paredal, ay c'apax 50 metro. A cab cuarto bay yul templo, yetokc'al is tentail acantok yin amak',

A tzetbil yayji templo

¹⁶ ayoc chemte' bay yinlak. Ayc'al is wentenail yoxebal, txennejc'al sat wentenail. Chi tojtac'al chemte' bay ti' puerta, masantac'al bay yul, ayc'al oc chemte' yinlak sat pared masanil. Chi tojtac'al bay pisoal, masantac'al chi ajapnok bay wentenail. A juntzan wentena tu' ay is makil.

¹⁷ Ay c'apax oc chemte' satlak is paredal yul babel cuarto yiban puerta chi octok bay yul is cab cuarto.

¹⁸ Nojnakxac'al el yin sat masanil chemte' tu' yuj yechel querubín c'al yetok yechel an palma. Ayoc jun yechel an palma, c'al jun yechel querubín, cac'al tu' yayji oc masanil. Cabcabc'al is sat junjun juntzan querubín tu'.

¹⁹ A jun is sat, lajan yili axca sat anima t'anan oc yin yechel an palma tu'. Axa junxa xin, lajan yili axca sat no coj, t'anan c'apax oc yin junxa yechel an palma. Cayc'al tu' yili yul templo tu' masanil.

²⁰ Chi tojtac'al bay piso masantac'al bay jolomlak puerta.

²¹ A is marcoal puertail jun babel cuarto can tzalan yayji. A bay satak jun cuarto tol asan Jehová ay yet, ay jun tzet yetal lajan wal yili

Jun te altar

²² axca junok te altar, jun metro yayji elok, nan is cab metro yayji aj is tel. Ay is tzeyil-lak, ay c'apax yich. Axa yinlak xin, te'c'al elok. Max yalon jun winak tu' ayin: A ton jun meẍa ayoc satak Jehová ti', ẍi.

Juntzan puerta

²³ A puertail babel cuarto, yetokc'al puertail jun cuarto asan Dios ay yet, cabcab jenan yayji juntzan puerta tu'.

²⁴ Axa junjun jenan xin, cab ijan yayji, ayoc bisagra nanlak.

²⁵ A yin satlak puertail jun babel cuarto tu', ayc'al oc yechel querubín, yetokc'al yechel an palma. Lajan yili yetok juntzan ayoc bay yinlak pared. A yiban puertail bay tenta', ay is patil tol naba te'ej.

²⁶ A bay junjun pac' is tentail tu', ay wentena tol txennej sat. Ay c'apax oc yechel an palma yin sat pared.