Ez 38 - A Txꞌan Biblia Yin Kꞌanjobal 1989

A Gog mitx'k'ab Dios yayji ocok

¹ Max k'anjab Jehová ayin, max yalon axca ti':

² Ach anima, a tinani' meltzojantok acan yin yetc'ulal conob Magog. Alil in k'anej bay Gog, sat yajaw bay Mesec c'al bay Tubal.

³ Ala': Axca ti' yalon Jehová Cham Yajaw: Ach Gog yajaw ayji bay Mesec, c'al bay Tubal, ayin wal chi wala', tol ajc'ul in oc en.

⁴ Ok ach wak' meltzojok, ok waoc junok ch'en yin a ti'. Ok ach wiel cayti' yetok masanil no a chej, yetok masanil eb ayoc yiban no' tol ibil oc is mitx'k'ab, yetok jun miman bulan soldado ibil oc yespada, c'al makbal julbalej yuj eb.

⁵ A xol eb tu' ayoc eb soldado aj Persia, eb aj Etiopía c'al eb aj Libia. Masanil juntzan tu', ibil oc is makbal julbalej eb yetokc'al ch'en toctor eb.

⁶ Ay c'apax masanil eb soldado aj Gomer, c'al eb aj Bet-togarma, atac'al bay norte bay najat chi tit eb yetokc'al eb max tit bay juntzanxa conoblak, c'amxa chi bischaj eb ayoc etok.

⁷ Watx'nej a ba, iaj a mitx'k'ab yet owal; itok masanil eb soldado ayic' yalan ekbej.

⁸ A wal yet ok eq'uel xiwilok abil, cax ok ach ilaytok ak'on owal yul is makbej jun conob tol max ec'lej yin owal, palta mayal aj pax can junelxa; a ton jun conob tol sakleminakta' yayji xolak conob, palta mayal wajbaj oc ba junelxa bay tzalan yul yet Israel, a ton juntzan tol miman tiempo max can tz'inanok. Axa tinani' xiwilxa eb mayal meltzoj bay is conobal, yinxac'al tzalojc'ulal cajan ec' eb.

⁹ Axca wal junok miman asun ok yun apni oc bay jun conob tu' yetok juntzanxa nación ayoc etok, ok ach oc axca wal junok miman yax nab yetok masanil a soldado c'amxa chi bischaj tu'.

¹⁰ Ayin wal caw Jehová in chi wala': A wal yet jun c'ual tu', axac'al yobal nabalej ok a na'.

¹¹ Ok ala': Ok in oc wak'on owal yin jun conob c'am is colbalba, a ton yin eb anima tol yinc'al tzalojc'ulal ayic' yaloni. A is conobal eb, c'am is murallail, c'am is puertail tamwal yijul.

¹² Ok welk'anej is tzetak yetal eb, ok in oc yin conoblak tolto max ca watx'nelay ajok, a ton jun conob toltoc'al max wajlaytek xolak nación bay xiwil is jobbejal no' eb, c'al juntzanxa tzet yetal ay bay eb. A tu' cajan eb bay nan yulyibank'inal ti', cachi.

¹³ A eb anima cajan bay Sabá, bay Dedán, yetokc'al eb txonjom chi tit bay Tarsis, yetokc'al bay juntzanxa conoblak, ok k'anlej eb ayach: ¿Yin mi elk'an chach jayocok, toxac'al mi max a wajbajtek masanil a soldado yet chi ul e yuchtok c'al e yiontok ch'en plata c'al ch'en oro, yetok no jobbejal no', yetokc'al xiwilxa beyomal che yitok? ẍi mi eb, cachi.

¹⁴ Yuj wal tu' ach anima, alil in k'anej bay Gog, cax chalon axca ti': Caywal ti' yalon Jehová Cham Yajaw: A yet caw wal watx'xac'al yayji in conob Israel, catatu' ok aonxac'al oc a sat yin.

¹⁵ Ok ach tittac'al bay a tx'otx'al bay najat, bay norte yetok xiwil nación, ajun eb soldado caw wal tec'an, c'amxa chi bischaji tol ayoc yiban chej,

¹⁶ cay wal tu' ok yun oc yin ak'on owal yin in conob Israel. Ach Gog, toxac'al ok makay el sat tx'otx' tx'otx' oj axca asun. A yet juntzan lajub c'ual tu', ok ach watek yin jun in tx'otx' ti'. Ojc'al wal ach ti', xan ok in yojtaknej el juntzanxa nación, yet ok in tx'oxon in mimanbilal satak eb.

¹⁷ Ayin wal caw Jehová Yajaw in chi wala': A ton ach ti' max ach wak' binajok, yettaxc'al payxa, yet max in chekon k'anjab el eb in chekbej xol conob Israel. Max al-lay el yettax jun tiempoal tu', tol ach ok ach witek yin ak'on owal yin, ẍi Jehová, cachi.

Yailal yiban Gog

¹⁸ Ayin wal caw Jehová Yajaw in chi wala': A yet ok yak'on owal Gog ti' yin Israel, a wal yet tu' c'amxa yalbanil ok yun tit yowal in c'ul.

¹⁹ Yetok wal yowal in c'ul chi waloni, tol a yet jun c'ual tu', caw wal ow ok yun yec' jun quixcab bay Israel.

²⁰ A no txay bay yulak a' mar, c'al no tz'iquin chi ec' jenenok, yetok no chiwajwom no', c'al yetok no' chi jutx c'ul, caw wal ok bilaj masanil no' yuj xiwc'ulal ayin. Axca ti' ok yun c'apax masanil anima bay yulyibank'inal ti'. Ok el jotx' yinlak witz, c'al yel weklabok ch'en mimek ch'en, c'al pojay weklabok murallail conob.

²¹ Ayin wal caw Jehová Yajaw in chi wala': A bay siquilal tx'otx' yul makbej in conob, ok watok camich yin eb is soldado Gog. Junjunc'al ok meltzoj oc yin yet soldadoal yetok yespada.

²² Ok waoc yailal yiban Gog yetok ilya' c'al camich, cax ok waon c'apax ay owal yax nab yetok sakbat, c'al azufre tol ok chaw k'ak'al yiban, yetok is soldado, c'al yetok masanil nación ajun yetok.

²³ Caywal tu' ok yun in tx'oxon el satak conoblak in mimanbilal, tol asannej in ocok. Axca tu' ok yun wak'on in ba yojtaknej el xiwil nacionlak, xan ok yojtaknej el eb tol ayin ton Jehová in.