Ez 35 - A Txꞌan Biblia Yin Kꞌanjobal 1989

K'anej albilcan el yin siquilal tx'otx' Seir

¹ Max k'anjab Jehová ayin, max yalon axca ti':

² Ach anima, meltzojantok t'anan bay yetc'ulal siquilal tx'otx' Seir, cax chalon el in k'anej yin.

³ Al axca ti': Caywal ti' yalon Jehová Cham Yajaw: Ayin chi wala' tol ajc'ul in oc e yin ex cajyom bay siquilal tx'otx' Seir. Ok wawal oc yailal e yiban, tz'ininixac'al ok wutcan e conob, ok uchchajxac'al can ayok.

⁴ A e conobal tu', junelnej ok wak' lajwokcan ayok. Tz'ininixac'al ok wutcantok. Caywal tu' ok yun nachaj el e yuj tol ayin ton Jehová in.

⁵ Payxatax max ex occ'al ajc'ulal yin conob Israel, max e yaoc eb yul k'ab camich, yet wal ayoc lajub yailal yiban eb yuj is yobtakil.

⁶ Yuj tu xin, ayin Jehová Yajaw in chi wak' in ti', tol ok ex wacan oc yul k'ab camich, axa camich tu' ok ex ukten ec'ok, yujtol max ex tzaloj yuj is camichal in conob, yuj tu' xan a camich ok jayoc e yiban.

⁷ Tz'ininixac'al ok wutcantok siquilal tx'otx' Seir, ok wak' cam mactxel chi ec' bay tu'.

⁸ A wal ok wutej, tol a bay tzalanlak, bay jobelak, c'al bay yulak aej, toxac'al ok nojcan el yuj mimanil camnak, a ton eb ok cam xol owal.

⁹ Junelnej ok wak'can e tx'otx'al yin tz'inanil, c'amxa mac ok cajay ec' bay e conoblak tu'. Caywal tu' ok yun e yojtaknen elok tol ayin ton Jehová in.

¹⁰ Caxc'al ayin Jehová in cajan in ec' bay tu', ayex ti' che yala': A conob Israel, yetok conob Judá yetokc'al is makbej, jet ok yuncanok, quex chi.

¹¹ Palta ayin wal caw Jehová Yajaw in chi wak' in ti', tol axca wal yowal e c'ul, c'al e chichonc'ulal yin Israel, caywal tu' ok ex wut c'apaxok. Yuj wal tu' ok nachaj el yuj eb tol ayin ton Jehová in.

¹² Caywal tu' ok yun e yojtaknen el ayex ti', tol ayin Jehová in ti', max wab wal e buchwal k'anej yet max e yalon axca ti': A siquilal tx'otx' yul makbej Israel, tz'ininixac'al max yuncanok. Mayal cani, yet watx' ayonxa chi ji' canok, quex chi.

¹³ Caw wal mimektakxac'al max e yut e ba ayin, max e yalon yobal k'anej win, max wab wal tzet max e yala'.

¹⁴ Ayin wal Jehová Yajaw in chi wal juntzan ti': Masanilxac'al yulyibank'inal ok tzalojbok ajok, yet ok ex wak'on lajwok ayok.

¹⁵ Yujtol ayex ti', yelxac'al max ex tzalojbi yet max lajwi ay conob Israel; yuj tu' xan ok in paktzej ayex axca max e yut e ba. Tz'ininixac'al ok yun siquilal tx'otx' Seir, a ton makbej Edom. Caywal tu' ok yun yojtaknen el eb tol ayin ton Jehová in, ẍi Cham, cachi.