Ez 31 - A Txꞌan Biblia Yin Kꞌanjobal 1989

Yabixal te c'ute'

¹ A yet babel c'ual yet is yox xajaw, yet 11 abilxa joc yin presoal, a yet tu' max k'anjab Jehová ayin, max yalon axca ti':

² Al bay reyal Egipto yetokc'al bay masanil eb anima ay yul is makbej: ¿Mac yetok chi je' co lajban a mimanbilal?

³ Lajan ach wal yetok junok q'uisis, ma axca junok te c'ute' ay bay Líbano, a k'ablak te', xiwil watx'il yenel bay k'aktelak, caw wal can ayajok, cax chi ec'tac'al aj tel yiban juntzanxa te'.

⁴ Caw wal watx' ch'ib yuj nab, c'al yuj yal sat tx'otx' tx'otx' tu'; caw wal chi bey xiwil nuk' aejlak bay yich te'. Caytu' chi yun yoc yal juntzanxa te' bay tu'.

⁵ Yuj xiwil aej, xan caw wal miman max yun is tel yintak masanil te te' ay xol k'aktelak. Caw wal xiwil max yun yel k'uyan is k'ablak.

⁶ Masanil pojanil no tz'iquin, chi watx'nej oc no' is wayub bay yinlak is k'ablak te'. Masanil no no' ay xolak te', a bay yich tu' chi cajay ec' no', c'al yalji yune' no'. A bay yalan yenel k'ablak te' tu', chi je' yayji ec' xiwilok nacionlak.

⁷ Asannej oc jun miman te' tu' manxa watx'ilok, caw wal najat tel is k'ablak, yujtol ay jun miman aej chi ec' yich.

⁸ C'am junok te c'ute' bay xol te' yawoj te' Dios chi je' lajlen ba yetok. C'am junok te' taj lajan is k'ablak yetok. C'am c'apax junok te castaño lajan is xak yetok. C'am junok te te' bay yawoj Dios chi je' lajlen ba yetok jun te' manxa watx'ilok yili tu'.

⁹ A Cham max uten axca tu', xan xiwil is k'ablak; yuj tu' xan yelxac'al watx' yintak juntzanxa te te' ay bay yawoj Dios.

¹⁰ Yuj tu' xan axca ti' yalon Jehová Cham Yajaw: A jun te' tu', caw wal miman max yun tel. Max ec'tac'al aj is tel yiban juntzanxa te'. Miman max yun ch'ibaj jun te' tu', axca tol chi maynej ba.

¹¹ Yuj tu' xan ayin wal ok wak' ayc'ayok. Ok waoc yul k'ab jun yajaw tx'ok conobal, ok utlay wal axca is mojalil is yobtakilal.

¹² A juntzan eb tx'ok conobal, c'am yabenc'ulal ok tzoc'on ayok, toxac'al ok can telanok. A is k'ablak ok k'ajtok, yuj yayc'ay xolak te te' bay jolomlak witz, c'al bay jobelak yul nación tu'. Masanil conoblak cajan bay yenel ok tok elajok, ok beklaycanok.

¹³ Masanil pojanil no tz'iquin, ok jayoc no' yin is k'ablak te' mayal ayc'ay tu', c'al masanil pojanil no xolakteal no', ok ayjok no' bay tu'.

¹⁴ C'amxa junok te te' yelxac'al can ok yun is tel, tol ok ec'aj yiban juntzanxa te', caxc'al xiwil aej chi low yin; yujtol masanil ok k'aklay ajok. A jun ti' chi yal elapnok, tol a masanil eb mimek yajaw bay yulyibank'inal ti', ok cam eb axcac'al chi yun cam comon anima. Cayc'al tu' ok yun tojcan eb bay chi tojcan eb camnak.

¹⁵ Ayin wal Jehová Yajaw in chi wala': A yet ok aytok jun te' tu' bay ayic' eb camnak, ok wak' yunej tol a yuj cusc'ulal, cax ok tanaj a' aej ay yul tx'otx', cax ok in mitx'on oc waan a' aej chi bey yakan. Yuj wal jun tu' xan a jolom witz Líbano, axca tol ok cusajok, axa masanil te te' ok takaj te'.

¹⁶ Ok waaytok bay cambal, cax ok apnok can yetok juntzan camnakxa ayxa ec' bay tu'. A yet ok bil yayc'ay tu', ok bilaj conoblak yuj. Axca tu xin, toxac'al ok tzalojbok aj te te' caw ay c'al oc yal yet yalantok, axa tinani' tol ayxa ec' bay chi tojcan eb camnak, a ton te' ay bay Edén, yetok c'apax te' manxa watx'ilok bay Líbano.

¹⁷ A mactxel max cajay ec' bay yalan yenel, a ton nacionlak ay oc yetok, ajun c'apax eb ok aytok bay cambal yetok, ẍi Jehová, cachi.

¹⁸ A jun te' chi binaj ti', a ton reyal Egipto, yetok eb yet conob. Maj apnok canil is tel, c'al watx'il yili te te' bay Edén yintak. Ayin Jehová Yajaw in chi wala', tol ok aytok bay cambal, axca juntzan te te' bay Edén tu', tol tojnakxa xol eb c'am Dios yul sat, a ton eb camnak xol owal, ẍi Cham.