Ez 28 - A Txꞌan Biblia Yin Kꞌanjobal 1989

K'anej albilcan yin reyal Tiro

¹ Max k'anjab Jehová ayin, max yaloni:

² Ach anima, al bay reyal Tiro axca ti': Caywal ti' yalon Jehová Cham Yajaw: Caw wal cha maynej a ba cax chaloni: Ayin ti' dios in, ay wikbej yiban a' mar axca junok dios, cachi. Palta ach ti' anima achc'al, man diosok ach, caxc'al cha na tol jelan ach axca junok dios.

³ Tokwal yelxac'al jelan ach yintak Daniel, ¿tom c'amxac'al junok tzet yetal ewantak, tol man ojtakok?

⁴ Yuj a jelanil, c'al aj nabalil xan xiwil a beyomal; max ak' noj a caẍa yetok oro c'al yetok plata.

⁵ Yuj a jelanil yin txon, xan max aj can a beyomal; yuj a beyomal tu' xan xiwil a luesal.

⁶ Yuj wal tu' ayin Jehová Yajaw in chi wala': Yujtol cha na tol lajanxa a nabal wetok,

⁷ ok witek eb tx'ok conobal en, anima tol caw wal c'am is yabenc'ulal, tol ok yiajtek eb yespada en. Ok ak'lay lajwok ay a mimanbilal yetokc'al tzet yetal manxa watx'ilok yili max e' yetok a jelanil.

⁸ Atac'al yul xab olan ok ach tokcanok. Ok'bal c'ul ok yun a cam bay najatil yich a' mar.

⁹ Tokwal ok al satak eb ok ach mak'om camok tol Dios ach. A pax yul k'ab eb ok ach mak'on cam tu', lajan achc'al axca junok comon anima.

¹⁰ Ayin wal caw Jehová in chi wal juntzan k'anej ti', tol a yul k'ab eb tx'ok conobal ok ach camok, axca chi yun cam eb yobtakwom, cachi bay reyal Tiro, ẍi Cham.

Bital camich yin reyal Tiro

¹¹ Max k'anjab Jehová ayin max yalon axca ti'

¹² Ach anima, bitnej bit yet camich yin reyal Tiro, cax chalon axca ti': Caywal ti' yalon Jehová Cham Yajaw: Asanxanej ach watx'xac'al eli, caw wal aj nabal ach.

¹³ A bay Edén, a tu' max ach ayji ec'ok, bay jun awoj yet Dios. Elbub yayji ch'en ch'en manxa watx'ilok: a ton ch'en rubí, crisólito, jade, topacio, cornalina, jaspe, zafiro, granate c'al ch'en esmeralda. A ch'en mitx'banil ch'en tu' naba oro, watx'nebil yuj yoc yopiso oj yet jun c'ual yet max ach esnelay ajok.

¹⁴ Ak'bil opiso yin querube taynewomal. Max ach wak' ayjok bay tzalan tol wet yayji ocok. Xolak ch'en ch'en jopopi yili max ach ec'jabi.

¹⁵ Caw wal watx' a beybal yettaxc'alta' jun c'ual max ach wesnej ajok, masantac'al max yal tx'oxon aj ba yobtakil en.

¹⁶ Yujtol caw wal max aj can a txon, caw wal max ach aj can yin etnewomal c'al yin yobtakilal. Yuj tu' xan max ach in k'okil in satak, max ach wuktej el bay in tzalan. Ach querube taynewom ach, max ach wuktej el xol ch'en ch'en jopopi yili.

¹⁷ A yuj watx'ilal eli tu', xan max a maynej aj a ba. A yuj watx'ilal eli, xan max etax el a jelanilal. Ayin max ach in k'okay sat tx'otx', max ach wawal oc yin tx'oxbanilal satak eb rey.

¹⁸ Xiwilxa a mul max aocok, max etnejtok mactxel chi txonji c'al manji ayach, xan max etnejtok a templo. Yuj tu' xan max wak' eltek jun k'ak'ej en, max ach ak'on tz'aayok. Tanxac'al max ach wutcan sat tx'otx' satak mactxel chach ilon ocok.

¹⁹ A masanil nacionlak ojtaknej ach, toxac'al ok xiwaj eb ach yiloni. Xol ayxamay xiwc'ulalil max ach lajwi ayok. C'amxa yechel ok achto ayjok ec'ok, ẍi Jehová, cachi bay, ẍi Cham.

A tzet max al-lay yin conob Sidón

²⁰ Max k'anjab Jehová ayin, max yaloni:

²¹ Ach anima, meltzojantok acan bay yetc'ulal conob Sidón cax chalon el in k'anej yin.

²² Al yin axca ti': Caywal ti' yalon Jehová Cham Yajaw: Ayin chi wala' tol ajc'ul in oc yin conob Sidón. Ok in ilay aj can xol nacionlak yuj tzet ok wun yin. A yet ok waon oc yailal yin, caywal tu' ok yun txecloj elok tol asannej in ocok, yuj tu' xan ok yojtaknelay elok tol ayin ton Jehová in.

²³ Ok watek ilya' yiban, tol ok el nuk' chic' bay yulak calle. Ok camay masanil eb cajyom; tzanxac'al bay ok tit espada ok tzoc'on cam eb. Caywal tu' ok yun yojtaknelay elok tol ayin ton Jehová in.

²⁴ A xol juntzan nacionlak bay cawilal max intaknen el eb israel, c'amxa junok okto yut ba bay axca q'uix caw wal el ye, manxa yailok bay chi lowi. Caywal tu' ok yun yojtaknelay elok tol ayin ton Jehová in, ẍi Cham, cachi bay.

²⁵ Ayin wal caw Jehová Yajaw in chi wala': Ok in wajbajtek eb israel ti' bay xolak nacionlak, a ton bay sakleminaktok eb. Caywal tu' ok yun txecloj elok tol asannej in ocok satak juntzan nación ti'. Axa Israel xin, ok tz'un pax ba junelxa bay is tx'otx'al, a ton jun tx'otx' max wak' bay in chekbej Jacob.

²⁶ C'amxac'al tzet ok on eb bay tu', junc'ulalxac'al ok yun cajay eb. Ok watx'nej aj eb yatut, c'al yawon eb yawoj uva. Ayin ok waoc yailal yiban juntzan nación max etnen eb. Caywal tu' ok yun yojtaknen el eb tol ayin ton Jehová in, is Diosal eb, ẍi Cham.