Ez 18 - A Txꞌan Biblia Yin Kꞌanjobal 1989

A mactxel chi oc is mul, a' chi cami

¹ Max k'anjab Jehová ayin max yalon axca ti':

² ¿Tzet yuj xan ac'ala' e yalubtanen jun k'anej yin conob Israel: A eb mamej chi lo' eb paj uva, axa eb uninalej jululixac'al toj yichlak ye eb? quex chi.

³ Ayin wal caw Jehová Yajaw in chi wala' tol a jun k'anej tu', c'amxa yechel ok e yalubtanej ayex Israel ex ti'.

⁴ Yujtol wet yayji masanil anima, eb mamej c'al eb uninalej c'apaxok. A mactxel chi oc is mul, a' chi cami.

⁵ K'inalok ta ay junok winak tojol is nabal, tojolc'al tzet chi yunej.

⁶ C'am chi oc yetok eb chi chaon k'in bay jolomlak witz yet chi oc eb ayilal bay yechelej. C'am chi yaoc eb is lek'ti diosal eb yet israelal tu' yipok c'ul. C'am chi mulji yetok yistzil yet animail, cax c'am chi junanej ba yetok yistzil yet ayoc ix yin is bisbal xajaw.

⁷ C'am chi yetnej junok yet animail. A ti' yet tol chi yak' meltzoj is majanbilal tumin bay eb ay tzet chi majanej bay. C'am chi yelk'anej is tzet yetal junok mactxel. Chi yak' is lobej eb c'am is lobej, cax chi yak'on is pichil mac c'am is pichil.

⁸ C'am chi yak' ch'en tumin yin majanil yin k'anon el miman yuca'. C'am chi yetnej junok yet animail. Caw wal watx' chi yun watx'nen el junok k'anej yiban cawanok ay owal xol.

⁹ Chi yi wal aj can yiken axca yalon in ley, c'al in chekbanil. A junok winak axca tu', wal yel tojol ton yayji oc yin is beybal, ayin wal caw Jehová in chi wala' tol ok najatilbok is k'inal.

¹⁰ K'inalok ay junok is c'ajol jun winak tu', caw wal yaxc'ayinak, ma mak'om cam anima chi eloc xin. Chi beybalnej juntzan tzet yetal

¹¹ maj beybalnej is mam. A ti' yet, chi cha' k'in bay jolomlak witz, c'al yoc ayilal bay yechelej, c'al mulji yetok yistzil yet animail.

¹² Chi yetnen eb meba', c'al eb ok'bal c'ul yayji yuj is cawxinakil. Chi elk'an bay eb anima, c'am chi yak' pax is majanbilal tumin bay eb chi oc majan bay. Asanxanej is lek'ti' diosal tu' chi yaoc yipok is c'ul, cax chi yunenc'al tzet yetal tol yajbejtak in satak.

¹³ Chi yak' tumin majanil yin k'anon el miman yuca'. A jun anima axca tu', c'amxa chi je' yiquisbi ec'ok. Yujtol max yun masanil juntzan tzet yetal tol chin yaj tu', ok cam yin tol c'amxac'al yabenc'ulal. A is camichal tu', ac'al oc yiban chi cancanok.

¹⁴ Talaj c'uxan ay junok is c'ajol jun yob beybal tu', max ilon yunen masanil juntzan tzet yetal max yun is mam tu', palta c'am chi tzakloj yintak is beybal tu'.

¹⁵ C'am chi chawi k'in bay jolomlak witz yet chi oc ayilal bay yechelej, tamwal chi yaoc is nabal yin lek'ti diosal eb yet israelal. C'am chi mulji yetok yistzil yet animail.

¹⁶ C'amc'al junok mac chi yetnej. C'am junok tzet yetal chi k'ancan ec' bay eb chi oc majan tumin bay. C'am chi elk'ani. A ti' yet tol chi yak' is lobej eb c'am is lobej, cax chi yak'on is pichil eb c'am is pichil.

¹⁷ C'am junok mactxel chi yetnej; c'am chi yak' tumin majanil yin k'anon el miman yuca', tol chi yikej in ley, cax chi beybalnen axca yalon in chekbanil. A jun anima axca tu', man ok cam yuj is mul is mam; a ti' yet, ok najatilbok is k'inal.

¹⁸ Axa is mam tu' ok cam yuj is mul tu', yujtol etnem anima, elk'om, caw wal yob tzet max yun yul is conobal.

¹⁹ Ayex ti' ok e k'anlej axca ti': ¿Tzet yuj xan c'am chi tojlanej el eb c'ajolej mul is mam? quex chi mi. Ta a c'ajol tu' asan tzet yetal watx', c'al tojolal chi yunej, cax chi yikeni, c'al beybalnen in ley, yuj wal tu' xan ok iquisbokc'al ec'ok.

²⁰ A mac chi oc is mul, a' ok camok. C'am chi tojlanej el eb uninalej mul is mam, tamwal eb mamej chi tojlanen el mul yuninal. A mac tojol, ok cha' paktzil is tojolal; axa mac yobtakwom, ok cha' paktzil is yobtakwomal tu'.

Tojol yayji oc is beyc'ulal Jehová

²¹ Ta a jun yobtakwom chi pojil ba yin masanil yobtakil chi yunej, cax chi yiken masanil in ley, c'al beybalnen tojolal, wal yel a jun tu', man ok camok.

²² Ayin ti', manxa ok in natek masanil yobtakil max yun tu', axa najatilbi is k'inal yujtol a tojolal chi yunej.

²³ Ayin wal caw Jehová in chi wala', tol c'am chi wochej tol chi cam eb yobtakwom, palta chi wochej tol chi q'uex eb is beybal cax chi iquisbi ec' eb.

²⁴ Palta ta a jun tojol chi yut ba, chi bekcan yunen tojolal, cax chi yunen masanil tzet yetal yajbejtak chi yun eb yobtakwom, ¿ok mi iquisbokc'al ec' jun tu' che na? C'amak. Tokwal okto in natek tzet yetal watx' max el yunen tu'. Asan tol chi cam yuj yobtakil chi el yuneni.

²⁵ Ok mi e yal ayex ti' tol man tojolok yayji oc tzet chi wunej. Palta xin, abek ex conob Israel: Chi mi e na' tol manak yayji tzet chi wunej; palta man cayok tu', ayex che yun man tojolalok.

²⁶ Ta a jun anima watx' is nabal chi bekcan yunen watx'il cax chi yunen yobtakil, ok cam yuj yobtakil chi yun tu'.

²⁷ Palta ta a junok yobtakwom chi pojil ba yin is yobtakil, cax chi yunen watx'il c'al tojolal, chito colchajcan elok.

²⁸ Ta chi jay is nabal cax chi pojon el ba yin yobtakil tu', wal yel man ok cam yuj is yobtakilal tu'.

²⁹ Axa ayex conob Israel ex ti', ok e yala' tol manak yayji oc in beyc'ulal. Tokwal ayin manak yayji oc in beyc'ulal. ¿May ex minak ayex ti' manak yayji oc e beyc'ulal?

³⁰ Ayin wal caw Jehová Yajaw in chi wala', tol ok ex in beyc'ulnej el junjun ex, atac'ala' e yunben. Bekekcan yin junelnej e yob beybalil, naek e ba. Ta c'amak, a e yob beybalil tu' ok ex ak'on c'ayilok.

³¹ Pojek el e ba yin masanil e yobc'ulalil max e yun xin, cax ac'xa che yut e nabal c'al e beybal. Ex conob Israel, ¿tzet yuj xan ok ex camok?

³² Ayin wal caw Jehová in chi wala', tol c'am chi wochej tol ay mac chi cami. Pojek el e ba yin yobtakil xin, cax chex iquisbic'al ec'ok, ẍi Cham.