Ez 16 - A Txꞌan Biblia Yin Kꞌanjobal 1989

Yabixal conob Jerusalén yin tx'oxbanilejal

¹ Max k'anjab Jehová ayin, max yalon axca ti':

² Ach anima, tx'ox yil eb aj Jerusalén tzet yetal yelxac'al yajbejtak max el yunen eb.

³ Al bay eb yabixal Jerusalén chi wal yin tx'oxbanilejal ti': A Jerusalén tu', axca wal junok ix tol a bay Canaán max alji. A is mam amorreo, axa is txutx xin, hitita.

⁴ A yet c'ual max alji, maj c'uplay el is muxuc, maj achinelayok, tamwal max alay oc atz'am yin, maj c'apax pichlayok.

⁵ Tok ay mactxel max ok' c'ul yunen juntzan tu' yin. A yet max alji tu', max cancan c'otan yuj eb bay sat tx'otx', caw wal yajbil yuj eb.

⁶ Max in ec' bay is c'atan tu', max wiloni tol lanan tec'lab ay bay xol is tz'ilal, max in naoni tol moj wal chi iquisbi ec'ok.

⁷ Max wak'on ch'ibaj axca junok awoj. Max ch'ibajok, caw wal k'opoj ixxa, max ch'ib c'apax aj yim c'al xil is jolom. Palta tol t'iranc'al elok.

⁸ Max in ec' pax junelxa bay is cawilal tu', max wiloni tol mojxa chi nupayi. Xan max watok jun k'ap yiban. Caywal tu' max yun in pichoni, yujtol t'iranc'al elok. Ayin wal caw Jehová in chi wala' tol max wak' in trato yetok, yet chi occan yul in k'ab.

⁹ Max wachinej, max in sakbanej el xol is tz'ilal, axa waon oc perfume yin tu'.

¹⁰ Max waoc jun pichilej manxa watx'ilok yili tz'ibbil yin. Max waon oc is tz'um xanab caw wal watx'; yetok c'apax jun is c'alil tol naba lino, yetok c'apax jun is pichil caw wal watx' chemlayi.

¹¹ Caw wal watx'xac'al max yun waon oc yelbub yin. Max waoc brazalete yinlak is k'ab, yetok c'apax jun uej yin is nuk'.

¹² Max waon c'apax oc jun ch'en uej yin is txam, yetok yu' is txiquin, c'al yetok jun corona manxa watx'ilok yili yin is jolom.

¹³ Pichichixac'al max yuncan yetok oro c'al yetok ch'en plata. A is pichil tu', a ton wal lino caw wal watx', a ton juntzan k'apej caw wal watx' chemlayi, yetok k'ap manxa watx'ilok yili tz'ibil. Max wak'on pan manxa watx'ilok bay yet chi lo', yetok yal cab c'al yetok aceite yet olivo. Caw wal watx'xac'al max yun yili, max oc wal yin reinail.

¹⁴ Caw wal binajbil max yun xolak nación yuj watx'ilal yili. Ayin wal caw Jehová in chi wala' tol tz'akakixac'al max yun in watx'nen el yetok yelbub.

¹⁵ Axa wal max yun xin, max yaon oc is nabal yin watx'ilal yili tu', c'al yuj binajbilxac'al max yunej, axa yin ajmulal max tojcanok, max yak'on ba bay tzanc'al mactxel chi ec' bay tu'.

¹⁶ A yetok is pichil max watx'nej aj mantiado bay chi oc yin ayilal bay comon dios bay tzalanlak. A bay tu' max oc yin ajmulal. A juntzan tzet max yun tu', man is mojok tol max yunej, tamwal okto yunc'al.

¹⁷ Max yion el masanil ch'en ch'en caw wal watx' yili, ch'en oro, c'al yetok ch'en plata ak'bil bay wuj. A yetok ch'en max watx'nen aj yechel winak yet chi oc yin ajmulal yetok.

¹⁸ Max yaoc is pichil manxa watx'ilok yili tz'ibil tu' yin. Lajwi tu' max yak'on aceite c'al incienso max wak' bay.

¹⁹ A ixim pan watx'nebil yetok harina caw wal watx', yetok aceite, c'al yetok no yal cab max wak' is lobejok, max yak' yin xajanbalil tol chabejtakxac'al bay yechelej tu'. Ayin wal caw Jehová in chi wala' tol caytu' max yut ba.

²⁰ Yetok c'apaxok, a eb wuninal max wil yetok, max yak' tz'a yin xajanbalil bay juntzan yechelej tu', axcaxac'al tol loj max yun eb unin tu' bay yechelej tu'. Man k'okbilok tol max oc yin ajmulal,

²¹ palta tol max yitok eb wuninal, max yak' tz'a eb yin xajanbalil bay juntzan yechelej tu'.

²² Yuj juntzan is mul caw wal yajbejtak chi yun tu', xan majxa natek tzetbil max yun tit yin uninal, tol t'iranc'al elok, toxac'al chi tec'lab ay xol is tz'ilal.

²³ Ayin wal caw Jehová Yajaw in chi wala': Ok'bal c'ul yuj juntzan yobtakilal chi el yuneni.

²⁴ Tzanc'al bay mayayi, a tu' max watx'nej aj bay chi oc yin ayilal bay juntzan comon dios.

²⁵ A bay chi apnican junjun calle max watx'nej aj juntzan bay chi oc ayilal tu'. A watx'ilal yili, max yutcan aj yin yajbejtakil. Max yak'on ba yin ajmulal bay tzanc'al mactxel chi ec' bay tu'.

²⁶ Max oc yin ajmulal yetok mactxel cajan is cawilal, axca eb aj Egipto tol caw wal pek' yin ajmulal. Yuj wal tu' xan mayal tx'em yowal in c'ul yuj chi ajc'alcan yin ajmulal.

²⁷ Yuj wal tu' xan max in oc ajc'ulal yin, max waon oc yailal yiban. Max wiaytek yel is lobej, max waon c'apax oc yul k'ab eb ajc'ul, a ton eb filisteo. A eb tu' max c'ayaj c'ul yuj is beybal tol q'uixwiltak yoqui.

²⁸ Palta man k'okbilokc'al axca tu', palta tol max yaoc ba yin ajmulal yetok eb aj Asiria. Tamwal yuj axca tu' watx' chi yabej.

²⁹ Max occ'al ijan yak'on ba yin ajmulal bay Babilonia, a ton is conob eb txonjom; tamwal yuj axca tu' watx' chi yabej.

³⁰ Ayin wal caw Jehová in chi wala': Caw wal pek' ix yin ajmulal, xan max yut ba axca junok ix ajmul ix tol c'amxa chi q'uixwi.

³¹ Max watx'nej aj juntzan bay chi oc ayilal bay junjun calle, a ton bay mayayi yili, max yaonxac'al oc ba yin ajmulal. Palta man lajanok max yut ba axca juntzanxa eb ix ajmul ix, yujtol maj k'an is tojol.

³² Axca juntzan ix caw wal yob chi yut ba bay yichamil tol chi chaoc junok tx'ok winakil yin, caytu' max yut ba Jerusalén.

³³ A masanil eb ix ajmul ix, chi ak'lay tojol eb ix; axa pax ix ti xin, max yak' sabalej bay eb ay is camc'ulal yin. A' max tojlanen eb tzanc'al bay max tit eb yoc yin ajmulal yetok.

³⁴ Yuj tu' xan tx'ok yel ix yintak juntzanxa ajmul ix. C'am mac chi sayon ec'ok yet chi mulji yetok, tamwal chi tojlanej eb, palta tol a ix chi tojlanej mac chi oc yin ajmulal yetok, yuj tu' xan tx'ok yel yintak juntzanxa eb ajmul ix.

³⁵ Yuj tu', abek wal tzet chi wal yin ix ajmul ix ti':

³⁶ Ayin Jehová Yajaw in chi wala': Yin c'am q'uixwilal max t'irban el ba yin yaon oc ba yin ajmulalil yetok eb chi camel c'ul yin, max ay jajan bay juntzan comon dios tol yajbejtak. Max yak'on pulay chiq'uil eb yune' yin yak'on yin xajanbalil.

³⁷ Yuj wal tu' xan ok in wajbaj oc masanil juntzan eb camc'ulnebil yuj, a ton eb max yak' tzalojbok c'ul yetok, juntzan camc'ulnebil yuj, c'al juntzan c'am chi yochej. Ok in wajbaj oc oyan eb yin; satak wal eb ok in t'irban elok, yet watx' ok yil eb yin t'iranil.

³⁸ Ok in beyc'ulnej ix, axca chi yun beyc'ulnelay junok ix ix ay yajaw chi yut ba yin ajmulal, ma junok ix mak'om cam anima. Yetok wal yowal in c'ul, c'al yetok in chichonc'ulal ok waon oc yul k'ab camich.

³⁹ Ok wacan oc ix yul k'ab juntzan winak tu', yet ok yak' lajwok eb juntzan bay can ay ajok bay max oc ix yin ajmulal, c'al bay max oc yin ayilal bay juntzan comon dios tu'. Ok yiel eb pichil, yetokc'al juntzan yelbub ayoc yin, toxac'al ok elcan t'iranok.

⁴⁰ Ok aj wan eb conob yin, axa k'okch'ennen eb tu', axa yak'on cam eb ix yetok espada.

⁴¹ Ok yaoc eb k'ak'al yatut; satak wal juntzanxa eb ix ix, ok oc yailal yiban. Caywal tu' ok yun wak'on lajwok yajmulalil tu', c'amxa bak'in ok tojlanej mac chi yochej.

⁴² Caywal tu' ok yun yel yowal in c'ul yin, c'amxa in chichonc'ulal. Ok in canxac'al yin tzalojc'ulal, c'amxa yowal in c'ul.

⁴³ Max toj c'ayc'ulal yuj, tzetbil yayji yet uninto, xan max tx'emwaltek yowal in c'ul yuj is beybal tol yajbejtak yoc tu'. Yuj wal tu' xan ayin wal caw Jehová in chi wala' tol ok waoc yailal yiban yuj is beybal tu'.

Axca wal yayji oc ix txutxej caytu' yayji oc ix uneej

⁴⁴ Masanilxac'al eb anima ok alon jun k'anej ti' yin Jerusalén. Ok yalon eb: Axca wal yayji oc ix txutxej, caytu' yayji c'apax oc ix uneej, ẍi mi eb.

⁴⁵ A Jerusalén ti', axca tol yune' junok txutxej tol chi chichon c'ul yin yichamil, c'al yin yune'. Cay c'apax tu' eb ix is nuej, chi chichon c'ul eb ix yin yichamil, c'al yin yune', yujtol a is txutx eb masanil, hitita ton ix, axa is mam eb xin, amorreo.

⁴⁶ A bay yetc'ulal norte, a tu' ay ix is nuej babel ix, a ton Samaria yetokc'al yaldealakil. Axa bay sur, a tu' ay ix is nuej tzunan ix, a ton Sodoma yetokc'al yaldealakil.

⁴⁷ Ac'ala' yintak beybal eb tu' max tzakloj Jerusalén, max yaoc is mul tol yajbejtak. Man k'okbilok juntzan tu' max yabej, yelxac'al ec'ban max yun yoc yin ajmulal yintak eb tu'.

⁴⁸ Ayin wal caw Jehová Yajaw in chi wala': Tol a Sodoma, yetokc'al is yaldealakil, maj yun axca wal tzet max yun Jerusalén yetokc'al yaldealakil.

⁴⁹ A ton wal juntzan is mul Sodoma ti', yetok masanil yaldealakil: Caw wal max maynej ba eb, yujtol caw wal xiwil is lobej eb, chi yak'on tzalojbok eb c'ul, yujtol watx'xac'al yayji eb; palta maj colwaj eb bay eb meba', tamwal bay eb ayoc yin majilal.

⁵⁰ Max oc eb yin maynejbail, max oc c'apax ijan eb beybalnen juntzan tzet yetal tol chin yaja'; yuj wal tu' xan max wak' wal lajwok ay eb, axca wal chi yun e yilon oc tinani'.

⁵¹ Ilab c'apax Samaria, maj oc nanok is mul, axca wal is mul Jerusalén max yaocok. Caw wal xiwil tzet yetal yelxac'al yajbejtak max yun Jerusalén ti'. A juntzanxa eb ayic' is cawilal, a eb tu' watx'takto wal eb.

⁵² A tinani', a Jerusalén ti' yowalil ok yak' techaj q'uixwilal, yujtol a is yobtakilal yelxac'al yob yintak yet Sodoma, c'al yintak yet Samaria. A juntzan tu', a yet chi co lajban yetok yet Jerusalén, watx'takto wal eb.

⁵³ Ok wiaj can Sodoma, c'al Samaria yetok yaldealakil; yetok c'apax Jerusalén.

⁵⁴ Palta xin, yowalil ok techaj yuj Jerusalén is yaynakilal, c'al is q'uixwilal, yuj tzet yetal max el yuneni, yuj tu' xan watx'tak wal juntzanxa tu' yintak.

⁵⁵ A yet chi meltzoj Sodoma, c'al Samaria yetokc'al yaldealakil axca yayji yet yalantok, cay c'apax tu' ok yun Jerusalén yetokc'al yaldealakil.

⁵⁶ A Jerusalén max buchwaj yin Sodoma, yet ayoc yin maynejbail,

⁵⁷ a ton yet c'amto chi ilchaj eltek is yobtakilal. Palta a tinani' xin, a eb aj Edom, yetokc'al eb aj Filistea yetokc'al masanil eb cajan is cawilal, chi buchlay Jerusalén yuj eb. Masanilxac'al anima bay yulyibank'inal ti' chi intaknen elok.

⁵⁸ A tinani' xin, ayin wal caw Jehová in chi wala', tol yowalil ok yab yail Jerusalén yuj is beybal tol yajbejtakxac'al.

⁵⁹ Ayin Jehová Yajaw in chi wala': Ok in paktzej bay Jerusalén, axca wal is mojalil, yujtol max yak' tac is ti', maj yikej yunen axca max yun yak'on is trato wetok.

⁶⁰ Palta ayin ti', ok in natek in trato max wak' yetok yet uninto, cax ok in watx'nej junokxa in trato yetok tol ayc'al yin tojbalk'inal.

⁶¹ A Jerusalén, ok natek is yob beybalil, c'al q'uixwi ajok yet ok wak' pax meltzoj eb is nuej tu' yul k'ab; a ton Samaria c'al Sodoma. Axca tu' ok wutej, palta man axcaok tu' t'inan chi yun in trato yetok.

⁶² Ok in watx'nej in trato yetok junelxa. Caywal tu' ok yun nachaj el yuj, tol ayin ton Jehová in.

⁶³ Ok wak' tanil masanil tzetak max el yuneni; palta a Jerusalén tu xin, man ok tok c'ayc'ulal yuj. Ayin wal caw Jehová in chi wala', tol ya'c'al yoc q'uixwilal ok yabej, xan c'amxac'al bak'in ok maynej ba, ẍi Jehová, cachi, ẍi Cham.