Ez 14 - A Txꞌan Biblia Yin Kꞌanjobal 1989

Ow Jehová yin ayilal bay yechelej

¹ Ay eb yicham winakil conob Israel max jayoc ayin yet chin k'anlej bay Jehová yuj eb.

² Yuj tu xin xan max k'anjab Jehová ayin axca ti':

³ A juntzan anima ti' mayal yaoc eb nabal yin comon dios, cax chi yaon oc ba eb yul k'ab yobtakilal yuj juntzan tu'. ¿Tom wal okto yal in c'ul ok in paktzej k'anlebal eb?

⁴ Al bay eb: Caywal ti' yalon Jehová Cham Yajaw axca ti': Tzanc'al mac Israelal tol chi yaoc nabal yin comon dios, cax chi yaon oc ba yul k'ab yobtakilal yuj juntzan tu', lajwi tu' chi jayoc eb ul k'anlen bay junok in chekbej, ok cha eb paktzil. Ayin wal ok in paktzej eb, axca wal is mojalil yuj xiwil is diosal eb tu', cachi.

⁵ Axca tu xin, ok wak' meltzoj is nabal eb israel ayin, a ton eb pojnak el ba wintak yujc'al is comon dios.

⁶ Yuj tu' xan al bay eb israel tu': Caywal ti' yalon Jehová Cham Yajaw axca ti': Meltzojanektek ayin, bekekcan juntzan comon dios c'al juntzan e beybal tol yajbejtak che yun tu', cachi bay eb.

⁷ Ta ay junok Israel, ma junok tx'ok conobal, cajan ec' xol eb, chi pojxac'al el ba wintak, cax chi yaon oc nabal yin comon dios, cax chi yaon oc ba yul k'ab yobtakilal yuj juntzan tu', chi lajwi tu' cax chi jayoc eb bay junok in chekbej yin k'anlen ayin yuj eb, ayin wal caw ok wak' paktzebal bay.

⁸ Ok in oc wal ajc'ulal yin jun anima tu', ok in c'ayil xol in conob yet chi oc yin tx'oxbanilejal chi binaj yuj eb anima. Caywal tu' ok yun nachaj el e yuj tol ayin ton Jehová in ti'.

⁹ Tatol ay junok chi yaloc ba in chekbejok, chi ilay aytek sat cax chi yak'on paktzebal yul yet, ayin Jehová in max wak' ilay aytek sat. Ok in oc ajc'ulal yin jun tu', ok wak' c'ayil xol in conob Israel.

¹⁰ Yowalil chi jayoc yailal yiban jun winak chi k'anlej yab is nabal tu', yetokc'al yiban jun chekbej max paktzej yul yet tu'.

¹¹ Yuj tu' xan a in conob Israel manxac'al ok pojcan el ba wintak, tamwal toj yintak yobtakil. Ayin wal caw Jehová Yajaw in chi wala' tol in conob yayji ocok, ayinxa is Diosal in, ẍi Cham.

Noé, Daniel c'al Job

¹² Max k'anjab Jehová ayin, max yalon axca ti':

¹³ Ach anima, ta ay junok conob chi ec' yiban yaon oc mul ayin, ok waoc yailal yiban, ok wiec' is lobej, xan ok cam eb anima c'al no no' yuj wajil.

¹⁴ K'inalok ta a bay xol eb tu', a tu' cajan Noé, Daniel c'al Job, ayin wal caw Jehová Yajaw in chi wala' tol asan mi eb oxwan tu' chi colchaji, yujtol watx' is nabal eb, c'am junokxa mac chi colchaji.

¹⁵ Ta ok watok no chiwajwom no' bay jun conob tu' yet ok mak'lay cam masanil eb cajyom bay tu' yuj no', tz'ininixac'al ok yunej. C'amxa mactxel ok ec' bay tu' yuj xiwc'ulalil bay no'.

¹⁶ K'inalok ta cajan eb oxwan tu' bay jun conob tu', asan mi eb chi colchaji. A pax yuninal eb xin, c'amxa mi chi colchajcan elok. Ayin wal caw Jehová in chi wala', tol tz'inan tx'otx'xac'al ok yuncan jun conob tu'.

¹⁷ Ta chi wak' jayoc owal yiban jun conob tu', yet chi cam eb anima, c'al no no',

¹⁸ k'inalok ta a tu' cajan eb oxwan winak tu' bay tu', asan mi eb chi colchajcan elok. Ayin wal caw Jehová Yajaw in chi wala', tol c'amxa mi chi je' colchaj yuninal eb yuj.

¹⁹ Ta chi watok ilya' yiban jun conob tu', yetok wal yowal in c'ul cax chi waontok camich yiban eb anima, c'al yiban no no';

²⁰ k'inalok ta a bay tu' cajan Noé, Daniel c'al Job, asannej mi eb chi je' colchajcan elok yujtol watx' is nabal eb. Ayin wal caw Jehová Yajaw in chi wala', tol a pax yuninal eb xin, c'amxa chi je' colchajcan elok.

²¹ Ayin wal Jehová Yajaw in chi wala': Yelxac'al ay is may ok ujok, yet ok waontok caneb yailal yiban Jerusalén: a ton owal, wajil, no chiwajwom no', c'al ilya', tojolc'al cam anima, c'al no no' yuj juntzan tu'.

²² Jaywannej eb ok colchajcan elok, a ton eb ok je' yel bay tu' yetok yuninal. A yet ok jayoc eb ayach ti', ok el beybal eb, c'al jantak yobal chi yun eb. Caywal tu' ok yun yoc wanaj a naon yin yailal ok wak' jayoc yin Jerusalén.

²³ Ayin wal caw Jehová Yajaw in chi wala', tol caywal tu' ok yun nachaj el oj tol c'am tzet yetal tol man is mojok max wun bay Jerusalén, ẍi Cham.