Ez 11 - A Txꞌan Biblia Yin Kꞌanjobal 1989

Yailal yiban eb yajawil conob Israel

¹ Max wilon xin tol a Yespíritu Dios max in iontok, cax max in apnitac'al oc bay chon octok bay yul templo Jehová bay yetc'ulal yichcan. A bay jun puerta tu', ay 25 winak ayic'ok, max wilon xol eb tu', max txecloj eltek Jaazanías, c'ajol Azur, yetok Pelatías c'ajol Benaías, a ton eb tu' yajaw yayji xol conob.

² Max waben yalon Jehová ayin axca ti': A ton wal juntzan ti' chi naon yunen yobtakil, c'al yak'on eb yobal nabalej bay jun conob ti'.

³ Chi yalon eb: Man mojok co watx'nen aj co na tinani'. A jun conob ti' lajan axca junok xij; axa ayon ti' lajan on axca no chibej, ẍi eb.

⁴ Yuj tu' xan al in k'anej bay eb, ẍi Jehová ayin.

⁵ A Yespíritu Jehová max ak'on wunej, tol chi wal axca ti': Tix wal max yun yalon Jehová ti': A wal juntzan tu' che na' ayex israel ex ti'; wojtak wal tzet chi ec' yin e nabal.

⁶ Ayex ti', xiwilxa anima max e mak' cam bay jun conob ti', toxac'al max nojil yulak calle e yuj, yuj is mimanil eb anima tu'.

⁷ Yuj tu' ayin wal caw Jehová in ti' chi wal ayex: A Jerusalén ti', lajan wal ok yun axca wal junok xij. Palta a no chibej tu', mayexnak ayex ti', palta tol a ton eb e yet conob max e mak' cam tu'. A pax ayex ti xin, ok ex wiel yul conob ti'.

⁸ Yuj ay e xiwc'ulal bay owal, xan ayin wal caw Jehová in chi wala', tol ok watek owal e yiban.

⁹ Ayin ok waoc yailal e yiban; ok ex wiel yul conob ti', cax ok ex waon oc yul k'ab eb tx'ok conobal.

¹⁰ Ok ex ak'lay cam yetok espada; ayin ok ex in beyc'ulnej sataktok mojonail Israel ti'. Caywal tu' ok yun nachaj el e yuj tol ayin ton Jehová in.

¹¹ A jun conob ti', man lajanok ok yun axca junok xij ayex, tamwal ayex ti' lajan ok e yun axca no chibej. A bay sataktok is mojonail Israel ti', a tu' ok ex in beyc'ulnej.

¹² Caywal tu' ok yun nachaj el e yuj tol ayin ton Jehová in. Yujtol ayex ti', c'am wal jabok max e beybalnej in chekbanil ti', tamwal max e yikej in ley; palta tol max e beybalnej is beybal juntzan nacionlak ayic' e cawilal ti', quin chi, ẍi Jehová.

¹³ Yak'ban lanan in k'anjab el yuj Jehová tu', max ayc'ay Pelatías, is c'ajol Benaías cami. Max in ay paknaj sat tx'otx', cax max in wek'on el waw, max waloni: Ay Mamin Jehová, ¿tom wal ok ak'xac'al lajwok el jaywanxa chito cancan bay Israel ti'? quin chi.

Junxa trato Dios yetok eb israel

¹⁴ Max k'anjab pax Jehová ayin, max yalon axca ti':

¹⁵ Ach anima, a eb cajan bay Jerusalén, chi yal eb e yin ayex max ex ilaytok yin presoal: A eb tu', caw wal najat ayil eb bay Jehová, xan a tx'otx' tx'otx' ti', mayal ak'lay can tx'otx' co sataknej, ẍi eb. Palta a eb caw wal yinatil Israel etok, a ton eb ayto oj a ba yetok, a ton eb ibiltek yin presoal etok ti'.

¹⁶ Yuj tu' xan al bay eb cajyom bay Jerusalén axca ti': Tix wal yalon Jehová Cham Yajaw ti': Max wiel eb bay is tx'otx'al, cax max in saklemnentok eb bay juntzan tx'ok nacional. Palta yak'ban ayic' eb bay tu', yin txennej tiempoal ayin ec' yetok eb axca tol ayic' in templo xol eb, ẍi Jehová, cachi.

¹⁷ Cax chalon c'apax bay eb ibiltok yin presoal etok: Caywal ti' yalon Jehová axca ti': Ayin ok ex wak' meltzojtek junelxa, ok ex wiel bay juntzan nacionlak bay max ex in saklemnejtok. Ok ex in wajbaj ocok, axa wak'on e tx'otx' ayex junelxa.

¹⁸ Ok ex meltzoj junelxa bay e conob, cax ok e c'ayon el masanil juntzan yechelej tol yajbejtak.

¹⁹ Ok wiel jun nabalej ayoc e yin tol caw axca ch'en, cax ok wak'on jun ac' nabalej ayex tol watx'.

²⁰ Caywal tu' ok yun yayjok ec' eb axca wal yalon in ley, c'al beybalnen eb in chekbanil; in conob wal ok yun eb, ayinxa is Diosal eb ok wunej.

²¹ A pax eb tol oktoc'al beybalnen juntzan beybalej tol yajbejtak yoc tu xin, ayin wal caw Jehová in chi wala', tol ok waoc yailal yiban eb yuj, ẍi Jehová, cachi, ẍi Cham ayin.

Max elcan is mayk'ak'al Jehová bay Jerusalén

²² Axca tu xin max wil yajwan eb querubín, axa toj jenenok eb tu'. Max toj c'apax juntzan rueda tu' yetok eb, a pax mayk'ak'al Diosal Israel ayoc yiban eb,

²³ max aj wanok, axa yel bay conob Jerusalén. Axa tu' max apni oc bay jolom witz bay yetc'ulal yichcanil jun conob tu'.

²⁴ Lajwi tu', max wiloni tol chin ilay meltzojtek bay Babilonia yuj Yespíritu Dios, a ton bay ayic' juntzanxa eb max ilaytek yin presoal. A juntzan ti' max tx'ox Jehová wila'. Lajwi tu xin, c'amxa tzet max wila'.

²⁵ Max wal masanil juntzan tzet yetal max tx'ox Jehová ayin tu' bay eb ibiltek yin presoal tu'.