Ez 10 - A Txꞌan Biblia Yin Kꞌanjobal 1989

Max beklaycan templo yuj is mayk'ak'al Jehová

¹ Lajwi tu' max wilon bay yiban jun jenantok yiban is jolom eb querubín. A bay tu' max tx'oxaj ba jun tzet yetal axca junok trono, lajan wal yili axca ch'en zafiro.

² Cax max yalon Jehová bay jun winak ayoc lino is pichilok tu' axca ti': Ocantok nan xol juntzan rueda bay yalan juntzan querubín tu', cheon eltek junok wokan tzak'ak' tol ayoc k'ak'al, a ton juntzan ay bay nan xol juntzan querubín, cax cha tiẍontok bay yiban jun conob ti', ẍi Jehová bay. Axa max wilon xin, tol max octok jun winak tu' bay tu'.

³ A eb querubín tu', ayic' eb bay sur bay yetc'ulal templo, axa jun asun max ak'on nojil bay yamak'il cawilal templo tu'.

⁴ Caytu' max yun yaj wan is mayk'ak'al Jehová bay yiban juntzan yechel querubín, bay ayc'alta' ec'ok, cax max oc waan bay puertail templo. Max nojil bay yul templo yuj jun asun tu', axa bay amak' xin, toxac'al jopopi yili yuj is mayk'ak'al Cham.

⁵ Chitac'al ablay bil is xic' eb querubín tu' tac'al bay junxa amak' bay yina. Lajanxac'al axca wal yoc yul is nuk' Dios, Cham chi je' yuj masanil, yet chi jaben bil c'u.

⁶ A yet max yalon Jehová bay jun winak ayoc lino is pichilok tu', tol chi yieltek k'ak'ej bay xol juntzan rueda bay nan xol eb querubín tu', max toj jun winak tu xin, max oc lecan c'atan junok rueda tu'.

^7-8 A bay yalan is xic' eb querubín tu', ay jun tzet lajan wal axca k'ab anima. A junok querubín tu' max yatok is k'ab yin k'ak'ej ayic' bay nan xol eb tu', max yion eltek jabok k'ak'ej tu', max yaon oc yul is k'ab nak ayoc lino is pichilok. Max chaon ec' nak jun k'ak'ej tu', axa yiontok tu'.

⁹ Max wilon c'apax caneb rueda yetok eb querubín tu', junnejc'al yayji yetok junjun eb. Toxac'al chi jopopi yili juntzan rueda tu' axca yili ch'en topacio.

¹⁰ A juntzan rueda tu', caw wal lajanc'al, axca tol a junjun rueda tu' ay jun junokxa rueda chi k'axpoj eq'uel nan yul.

¹¹ A yet chi toj eb querubín tu', t'inanc'al chi yuttok ba eb satak; c'am chi yoy ba eb, palta tol chi je' tojc'al eb bay can paq'uil bay t'anantok eb.

¹² A is mimanil eb masanil, toltax yichin eb, k'ab eb, c'al xic' eb, nojnak el yuj bak' satej, cay c'apax tu' is rueda eb.

¹³ Max waben c'apaxok tol max al-lay bay juntzan rueda tu': Ec'anek suyuyok, ẍi.

¹⁴ A eb querubín tu', canebc'al sat junjun. A jun is babel sat lajan wal axca sat junok querube; axa jun yet is cab, lajan axca sat anima; axa jun yet is yox, lajan wal yili axca sat no coj; axa jun yet is can, lajan wal yili axca sat no águila.

¹⁵ A eb querubín ti', ac'al ton a eb max wil bay a' miman Quebar. Max aj wan eb.

¹⁶ A yet max toj eb, max toj c'apax juntzan rueda tu' yetok eb. A yet chi yion aj eb xic' yet chi aj jennaj eb bay sat tx'otx', c'am chi elcan juntzan rueda tu' yin eb.

¹⁷ A yet chi oc wanaj eb, chi oc c'apax waan juntzan rueda tu'. A yet chi aj wan eb xin, chi toj c'apax juntzan rueda tu' yetok eb, yujtol a yin juntzan rueda tu' ayoc yanimail eb querubín tu'.

¹⁸ Caywal tu' max yun yaj wan is mayk'ak'al Jehová bay yiban templo, axa yoc yiban eb querubín.

¹⁹ Max yion aj eb tu' is xic' xin, max el eb bay sat tx'otx' ti'. Max wil wal tzetbil max yun yaj wan eb, yetok juntzan rueda tu', max wilon c'apax tzetbil max yun yoc waan eb bay puertail templo Jehová bay yetc'ulal yichcan. A is mayk'ak'al Cham Diosal Israel max ayji ec' yiban eb.

²⁰ Ac'al oc juntzan ti' max wila', tol ayic' eb bay yalan is trono Cham Diosal Israel bay ti a' miman Quebar. Caytu' max yun nachaj el wuj tol querubín eb.

²¹ Yujtol junjunc'al juntzan eb tu', ay caneb sat, ay c'apax caneb xic' junjun. A bay yalan xic' eb tu', ay juntzan tzet yetal lajan wal yili axca k'ab anima.

²² A is sat eb, lajanc'al yili axcac'al wal yili sat eb max wil bay ti a' miman Quebar; junjunc'al t'inanc'al chi yuttok ba satak.