Ex 40 - A Txꞌan Biblia Yin Kꞌanjobal 1989

Watx'jubal aj cajlobal Dios

¹ Max k'anjab Jehová bay cham Moisés, max yalon bay axca ti':

² A babel c'ual yet babel xajaw, a yet tu' cha watx'nej aj in cajlobal bay chin chalej in ba e yetok.

³ Chi lajwi tu' cax chaon octok te caẍa bay yul tu', bay ayaytok mandamiento tu', cax chaon oc an cortina yenelok.

⁴ Chaon c'apax octok te meẍa, yetok batxlub candil bay yul tu', watx' chi yun a watx'nen ay jun meẍa tu', cax chaon oc k'ak'al candil tu'.

⁵ A bay satak caẍail in trato cha octok altar naba oro bay chi tz'a incienso, cax cha locban aj an cortina bay ti' mantiado tu'.

⁶ Cax cha watx'nej c'apax ay jun altar bay chi tz'a xajanbal bay satak octok ti' mantiado, bay chin chalej in ba e yetok,

⁷ cax chaon ay jun miman palangana nan xol mantiado yetok altar, chi ak'lay noj yetok aej.

⁸ Chi lajwi tu', cha watx'nej oc an cortina makilok yinlak yamak'il, cax chi aj locan an cortina bay ti' yamak'il tu'.

⁹ Cax cheon aj aceite chi k'anlay yet chi sic'lay el junok mactxel, ma tzet yetal; cax cha secon ay yiban in cajlobal, yetok yin masanil tzet yetal ayoctok yul. Caytu' chi yun yoccan yin yopiso masanil is mitx'k'abil, yet watx' wet-xa chi yuncanok.

¹⁰ Cha secon c'apax ay aceite tu' yiban altar bay ok tz'a xajanbal, yetokc'al masanil is mitx'k'abil. Axca tu' chi yun yoccan yin yopiso, xan a jun altar tu' wet-xa chi yuncanok.

¹¹ Cha secon c'apax ay aceite tu' yiban jun miman palangana, yetokc'al is batxlubal; wet chi yun yoc canok.

¹² Chi lajwi tu', cax cheontok Aarón, yetokc'al eb is c'ajol bay ti' mantiado bay chi co chalej co ba, cax cha chekon achinwok eb bay tu'.

¹³ Chi lajwi tu', chi yaon oc Aarón tu' is pichil tol ya' yili. Cax chaon oc aceite yin yet chi occan yikbej yin sacerdoteal ayin.

¹⁴ Chi jay c'apax oc eb is c'ajol tu' a cawilal, cax chaon oc is pichil eb.

¹⁵ Chaon c'apax oc aceite yin eb, axca max ot Aarón, yet watx' chi occan eb yin sacerdoteal ayin. A yuj chi alay oc aceite yin eb tu', xan caytu' chi yun cancan jun ikbej tu' yul k'ab eb, cax ok beyc'altok yin yinatil eb yin tojbalk'inal, ẍi Jehová.

¹⁶ Caytu' max yun watx'nen cham Moisés, axca wal max yun yalon Jehová.

¹⁷ A wal yet max chaon el yich yet is cab abil wal yel eb bay Egipto, yet wal babel c'ual yet babel xajaw, a ton wal yet tu', max watx'ji aj is cajlobal Dios.

¹⁸ Max chekon cham Moisés tol chi alay ay is batxlubal, max alay oc te chemte', max alay c'apax oc is reglail, max ilay aj wan te oy yiban is batxlubal ayxa ay tu'.

¹⁹ Cax max jenbalaytok mantiado yiban is cajlobal Dios tu', cax max alaytok juntzanxa yiban mantiado axca yalon Jehová bay cham Moisés.

²⁰ Max lajwi tu xin, max yaon aytok cham Moisés ch'en cab jenan ch'en yul caẍa, a ton ch'en bay tz'ibbil oc lajoneb mandamiento, a ton is trato Dios, cax max alay oc te' is reglail te caẍa tu', max alay c'apax oc is makil te' yuj cham bay chi ak'lay tan mulej.

²¹ Lajwi tu' max ilaytok te' yul is cajlobal Dios, max alay oc an cortina bay yul nan cajlobal tu' yet chi oc yenelok te caẍa, axca max yut yalon Jehová.

²² Max alay c'apax octok te meẍa yul mantiado bay chi co chalej co ba yetok Dios, bay yetc'ulal norte.

²³ Watx' max yun yalay ay ixim pan bay yiban te meẍa bay satak Jehová, axca max yun yalon Cham bay.

²⁴ Max alay c'apax octok ch'en batxlub candil bay satak meẍa yul mantiado bay chi co chalej co ba yetok Jehová, bay yetc'ulal sur,

²⁵ cax max alay oc is k'ak'al candil satak Cham axca max yun yalon Cham bay.

²⁶ Max alay octok altar naba oro bay satak eltek an cortina.

²⁷ Max yak'on tz'a cham Moisés incienso yiban altar tu', axca max yut yalon Jehová bay.

²⁸ Max lajwi tu' max alay oc an cortina is makilok bay chon octok yul cajlobal tu'.

²⁹ Max alay ay junxa altar bay chi ak'lay tz'a xajanbal bay is ti', bay chon octok yul mantiado bay chi co chalej co ba yetok Cham. Lajwi tu' max yak'on tz'a cham no' xajanbal yetok ixim harina axca max yun yalon Cham bay.

³⁰ Max alay octok ch'en miman palangana bay nan xol mantiado yetok altar; max ak'lay noj yetok aej bay chi tx'ajlay k'abej.

³¹ A bay a' aej tu' max tx'aj cham Moisés is k'ab c'al yakan yetok cham Aarón c'al yetok eb is c'ajol

³² yet chi octok eb yul mantiado, c'al yet chi apni oc eb bay altar, axca wal max yun yalon Jehová bay cham Moisés.

³³ Yinxa tzunanil max watx'nelay oc is yamak'il yinlak is cajlobal Dios c'al bay altar. Lajwi tu' max yaon oc an k'ap is makilok bay chon octok bay is yamak'il tu'. Axca wal tu' max yun watx'jican el masanil tzet max al-lay bay Moisés yuj Jehová.

Max ayji mayk'ak'al Jehová yiban is cajlobal

³⁴ A yet max lajwi watx'jican masanil, max ayol asun yiban mantiado bay chi co chalej co ba yetok Jehová, cax max ayji ec' is mayk'ak'al Cham yiban is cajlobal tu', yetokc'al yul.

³⁵ Yuj wal tu xin, c'am chi je' yoctok cham Moisés yul tu', yujtol max ayji ec' jun asun yiban, caw wal nojnak yul yuj is mayk'ak'al Jehová.

³⁶ A yet chi aj lenaj asun tu' yiban is cajlobal Cham, cax chi yion aj eb israel is mantiado, cax chi bey eb toji.

³⁷ Ta c'am chi aj lenaj asun tu xin, c'am chi yi aj eb is campamento; atoc'al yet chi aji, cax catatu' chi toj eb.

³⁸ A yet ayoc eb israel yulak be, caw wal chi yil eb jun asun tu' yiban is cajlobal Jehová yet c'ualil, axa yet ak'balil xin, ayoc is k'ak'al.