Ex 4 - A Txꞌan Biblia Yin Kꞌanjobal 1989

¹ Max tak'wi Moisés bay Jehová: —Man ok yaoc eb yin c'ul tamwal ok yikej eb tzet ok wala'; axa ok yut yalon eb ayin: Ma tol wal yel max tx'ox ba Jehová tu' ayach, ẍi mi eb ayin, ẍi Moisés.

² —¿Tzet jun lacbil oj tu'? ẍi Cham bay. —A in k'okoch, ẍi Moisés.

³ —Bekay te' sat tx'otx' tinani', ẍi Cham. Cax max bekon ay is k'okoch tu' sat tx'otx', ayman max oc yin labajil; axa yet max yilon axca tu' max el lemnaj bay.

⁴ Max yalon Cham: —Mitx' is ne no labaj tu', ẍi Cham. Axa mitx'on is ne no tu' cax max oc pax yin k'okochejal.

⁵ —A yuj tzet mayal el ti' xan ok yaoc eb yin is c'ul tol max in tx'ox in ba ayach, ayin ton Jehová a Diosal in, Diosal in c'apax eb e yichmam, a ton Abraham, Isaac, c'al Jacob, ẍi Cham.

⁶ Max yalon pax Cham: —A tinani', aytok a k'ab bay txam a c'ul, ẍi Cham. Cax max yaon aytok Moisés is k'ab bay txam is c'ul, axa yet max yion eltek is k'ab tu', ayxa oc lepra yin, toxac'al sakwekinak yili.

⁷ Max yalon pax Cham: —A pax aytok a k'ab bay txam a c'ul tu' junelxa, ẍi Cham. Cax max yaon pax aytok Moisés tu' is k'ab txam is c'ul junelxa, axa yet max yion ajtek is k'ab tu', caw wal watx'xa axcac'al is mimanil masanil.

⁸ Cax max yalon pax Cham: —Ta c'am chi yaoc eb anima tu' yin is c'ul tzet chala', yuj jun babel seña tu', axa yuj yet is cab seña ti', ok yaoc eb yin is c'ul.

⁹ Palta ta c'am chi yaoc eb yin is c'ul, cax c'am chi cha c'apax yab eb yuj cab seña ti', cax cheon ajtek a' aej yul a' miman Nilo, cax cha secon ay bay sat tx'otx' tx'otx', asan wal yet chi ayc'ay a' sat tx'otx', cax chi oc a' yin chic'al, ẍi Cham.

¹⁰ —Ay Mamin Wajawil, matawal mayinnak chin a chektok, yujtol caw wal c'am chi je' in k'anjabi, man atook yet chal ayin ti' cax chi waloni, palta toc'alta' tol in c'ulbal, pural chi je' in k'anjabi, ẍi Moisés.

¹¹ Max tak'wi Cham: —¿Mac yuj xan chi je' k'anjab eb anima cha na'? ¿Mayin mi nak tol ayin chi wak' k'anjab aj eb? Cax ayin chi wak' chacanbok eb anima, c'al eb c'am chi je' k'anjabi. Ayin chin but tan is k'ak'al sat eb, cax ayin c'apax chi wak' ilwok eb yin watx'.

¹² Yuj tu xin asi', ayin ok in occ'al etok yet ok ach k'anjabok, cax ayin ok wal tzet ok ala', ẍi Cham.

¹³ Max tak'wi Moisés, max yaloni: —Ay Mamin Wajawil, chi wal wal ayach tol c'am chin a chektok, watx' tol cha say junokxa mac chi toji, ẍi.

¹⁴ Max tit yowal Jehová yin, max yaloni: —A tu' ay oẍtak Aarón, nak levita bay tu', wojtak tol jelan k'anjabi. Ok tit ach chaoni yet toxa chach apni oc bay tu'. Caw wal ok tzaloj ajok yet ok ach yiloni.

¹⁵ K'anjaban yetok, cax chalon bay tzet ok yut k'anjab ba. Ayinxa ok wal ayex yet lanan e k'anjab tu', cax ok wak'on e nabal yin masanil tzet ok e yunej.

¹⁶ Ach chach k'anjab bay Aarón in q'uexelok, axca tol ayin chin k'anjab bay, axa Aarón tu' ok k'anjab bay eb conob a q'uexelok.

¹⁷ Itok a k'okoch tu' yujtol a' ok ak'balnej yet ok a tx'oxon juntzan seña max wal ayach.

Max yikej cham Moisés toj bay Egipto

¹⁸ Max meltzoj cham Moisés bay yatut Jetro is ni', max yalon bay cham: —Ok in meltzoj bay Egipto yet chi toj wil eb ayto wuj in ba yetok, yet chi wila' ta iquisto ec' eb, ẍi Moisés. —Asi', cha taynejc'al a ba yulak be, ẍi cham niej tu'.

¹⁹ A yet ayto ec' cham Moisés bay yul yet Madián, max yalon Jehová bay: —Asi' bay Egipto, c'am chach xiw a toji, yujtol camnakxa eb max yochej max ach mak'on camok, ẍi Cham.

²⁰ Cax max yiontok cham Moisés yetbi c'al eb is c'ajol yetok, max yaon ajtok eb yiban no burro, max toj eb bay Egipto. Ibil oc te k'okoch yuj cham, a ton te' max yal Dios tol ok oc yopiso yuj.

²¹ Cax max yalon Jehová bay cham: —A yet ok ach apnok bay Egipto tu', naanc'al oj tol ok a tx'ox juntzan seña tol c'ayubtakxac'al satak cham rey, juntzan max wal ayach. Palta ayin ok wak' cawbok el is nabal, cax man ok ex chalay el yuj.

²² Lajwi tu', cax ok alon bay cham rey tu': Axca ti' yalon Jehová: A Israel ti', axca wal tol in babel c'ajol yayji.

²³ Mayal wal ayach tol cha chatok in c'ajol yet chi yak' ayilal ayin; palta tutun c'am chochej cha bekilok, xan ok in mak' cam nak a babel c'ajol, ẍi Jehová, cachi bay.

²⁴ Max lajwi tu xin, cax max toj cham Moisés bay Egipto. A yulak be bay t'inan way cham yetok eb ajun yetok, a tu' max tx'oxaj ba Jehová bay cax ijan max mak'lay cam yuj Cham.

²⁵ Yinxac'al aymanil max yion eltek xal Séfora jun cuchillo naba comon ch'en, max c'upon el xal is tz'umal jolom is winakil nak is yune', xan max k'ok oc xal yin yakan cham Moisés, cax max yalon xal: Yujtol wichamil ach, xan ay walon wet yin jun chic' ti', ẍi xal.

²⁶ Axca tu' max yut yalon xal yuj jun circuncisión tu'. Lajwi tu' majxa mak'lay cam cham yuj Jehová.

²⁷ Max yalon Jehová bay cham Aarón: Asi', as cha' oẍtak Moisés bay takin tx'otx', ẍi Cham. Yuj tu xin, max toj chaon Moisés tu' bay jun witz bay max tx'ox ba Dios bay. Axa yet max chalen ba eb cham xin, cax max yak'len eb cawil is c'ul yin tz'ublej el tiejal.

²⁸ Max lajwi tu xin, max oc ijan cham Moisés yalon bay cham Aarón masanil tzet max chek Jehová yala', c'al yetok juntzan seña max cheklay yun yuj Cham.

²⁹ Axa toj eb cham cawanil tu', max wajban oc eb cham eb yicham winakil conob Israel bay Egipto.

³⁰ Cax max oc ijan cham Aarón yalon bay eb masanil tzet max yal Jehová bay cham Moisés, cax max tx'oxon c'apax juntzan seña satak eb conob tu'.

³¹ Max yaoc eb anima tu' yin is c'ul tzet max yal eb cham. Axa yet max yaben eb, tol max il-laytek eb yuj Jehová, yuj jantakxa ok'balc'ulal chi utlay eb, xan max ay nojan eb yin ayilal satak Cham.