Ex 35 - A Txꞌan Biblia Yin Kꞌanjobal 1989

Is leyalil c'ual xewilal

¹ Max wajbaj oc cham Moisés masanil eb conob Israel, max yalon cham bay eb axca ti': Max yak' Jehová juntzan chekbanilej ti' ayin, tol ok e yikej.

² A yin wakeb c'ual chi je' chex mulnaji, axa yet is suk c'ual xin, yet-xa Jehová yayji. Masanil jun c'u tu' chex xewi, cax che yion aj can Jehová. A mac chi mulnaj yet jun c'ual tu' yowalil tol chi cami.

³ Tamwal e k'ak', c'am chi je' e yaon oc yet jun c'ual tu', bay cajan ex, ẍi cham Moisés.

Ofrenda yet cajlobal Dios

⁴ Max yalon cham Moisés bay masanil eb israel: A juntzan ti' max yal Jehová,

⁵ tol che yak' junok ofrenda bay Cham. A mac chi el wal yin c'ul yak'oni, chi je' yiontek oro, plata c'al bronce,

⁶ an yax tx'al, an cak tx'al, an tx'al púrpura yetok an lino caw wal watx', yetok xil no chiwo tol baybil,

⁷ tz'umal no calnel tol cak yanil ayocok, c'al no tz'um caw wal lababi, c'al yetok te acacia,

⁸ c'al aceiteal olivo chi aytok yul candil, yetokc'al perfume chi oc xol aceite chi alay oc yin junok chi occan yetok Jehová, chi oc c'apax xol incienso toxac'al chi suk'uk'i yoc jab,

⁹ yetokc'al ch'en cornalina, c'al yetok juntzanxa ch'en ch'en yelxac'al watx' yili yet chi oc yelbubok is chaleco cham sat sacerdote, cax chi oc c'apax yelbubok jun makil is txamc'ul cham.

Listail tzet yetal max watx'nelayi

¹⁰ Masanil eb winak tol jelan is nabal yin watx'nen tzet yetal tol watx' yili, titokab eb, cax chi watx'nen eb tzet max wala' tol chi watx'ji.

¹¹ Watx'nejokab eb in cajlobal, a ton mantiado, yetokc'al juntzan chi oc yiban, yetokc'al is ganchoal, is chemteal, c'al is reglail, c'al yoyal, c'al yetok yich bay ok ay batxanok,

¹² c'al te caẍail trato, yetok regla chi oc is batxbanilok, yetok is makil bay chi ak'lay tan mulej, yetok jun cortina chi makchen el te';

¹³ c'al te meẍa yetok regla chi oc is batxbanilok, c'al yetok is mitx'k'abil, c'al ixim pan chi ak'lay in satak,

¹⁴ c'al is batxlubal candil, yetokc'al masanil is mitx'k'abil, yetokc'al ukeb candil, c'al yetok aceite chi aytok yul juntzan candil tu'.

¹⁵ Cax chi watx'ji c'apax altar yet incienso, c'al yetok regla chi oc is batxbanilok, c'al yetok aceite chi k'anabax yet chi oc yin junok chi occan wetok, c'al incienso tol suk'uk'i yoc jabil, c'al an cortina yet makil ti' bay chi octok bay in cajlobal,

¹⁶ jun altar bay chi tz'a xajanbal, c'al is rejail naba bronce, yetokc'al is reglail, yetok masanil is mitx'k'abil, c'al yetok jun palangana yetok is batxlubal,

¹⁷ c'al an cortina yet yamak'il in cajlobal, yetokc'al is yoyal, c'al is yich bay chi ay batxanok, c'al an cortina yet is puertail amak',

¹⁸ yetokc'al yestacail c'al tx'anil chi oc yin is tilak jun cajlobal tu' c'al yin yamak'il,

¹⁹ c'al an pichilej tol chembil, chi yaoc eb sacerdote bay yul in cajlobal, a ton pichilej tol ya' yili chi yaoc cham sacerdote Aarón, yetokc'al is pichil eb is c'ajol cham, a' chi yaoc eb yet chi oc eb yin yopiso, ẍi Jehová, ẍi cham Moisés.

Yofrenda eb conob

²⁰ Max lajwi yalon cham Moisés masanil juntzan ti' cax max toj eb masanil bay yulak is mantiado.

²¹ Ay wal mactxel max el wal yin c'ul yak'on ofrenda, max toj eb yak'oncan bay Jehová yuj is watx'jubal jun mantiado bay chi chalej ba Cham yetok eb, c'al masanil tzet chi oc yopiso, c'al an pichilej ya' yili.

²² Eb winak c'al eb ix ix, jantak eb tol max el wal yin c'ul max yiontok eb is yofrenda bay Jehová, max ul yak'on eb bay cham Moisés. Max yiontok eb ch'en yelbub pichilej, ch'en colk'abej, c'al ch'en uej, c'al ch'en yutxiquinej, c'al juntzanokxa tol naba oro, max yak'on eb bay Jehová.

²³ Masanil eb tol ay is yax tx'al, c'al tx'al púrpura, c'al cak tx'al, c'al lino caw wal watx', yetok xil chiwo tol baybil, yetokc'al tz'umal no calnel bonbil yetok cak, yetokc'al no tz'um caw wal lababi; masanil juntzan tu' max yitok eb anima bay Jehová.

²⁴ Ay pax mac max el yin c'ul xin, max yitok eb ch'en plata, c'al ch'en bronce bay Jehová. A mac ay te acacia bay, max yi c'apax tok eb, yet chi k'anabax yin cajlobal Cham.

²⁵ A pax eb ix ix chi je' tx'alwi, max yitok eb an yax tx'al, c'al tx'al púrpura, c'al an cak tx'al, yetok lino caw wal tol watx'.

²⁶ Ay eb ix ix tol jelan, cax chi el wal yin is c'ul max oc ijan eb ix bayon xil no chiwo.

²⁷ Axa eb yicham winakil conob max yitok eb ch'en cornalina, yetokc'al juntzanxa ch'en ch'en caw wal watx', yet chi oc is yelbubok is chaleco cham sat sacerdote, c'al yet chi oc yelbubok jun makil txamc'ul cham,

²⁸ c'al perfume, c'al aceite chi k'anabax yin candil, c'al aceite chi k'anlay yin junok chi occan yetok Jehová, c'al incienso tol sumumi yoc jabil.

²⁹ A masanil eb conob Israel, eb winak c'al eb ix ix tol max el wal yin is c'ul, max yak'on is colwal yin mulnajil max yal Jehová bay cham Moisés.

Eb max watx'nen is cajlobal Dios

³⁰ Max yal cham Moisés bay masanil eb yet conob: Mayal sic'can el Jehová cham Bezaleel, is c'ajol cham Uri, is yitxiquin Hur, max tit yin yinatil Judá.

³¹ Max yak'on Jehová Yespíritu bay, yet chi yak'on is jelanilal, c'al is aj nabalil, c'al ojtakbilal yet chi je' nachaj el yuj

³² yin watx'nen is yechel tzet chi watx'ji, axca yin oro, plata, c'al bronce.

³³ Max ak'lay pax is jelanil, yet chi watx'ji pax ch'en ch'en yelxac'al watx', c'al yet chi watx'ji ay yechel te te' caw wal watx' chi yunej, c'al yoc is yelbub te'.

³⁴ Max yak'on Jehová ikbej bay, yetok bay Aholiab, is c'ajol Ahisamac, max tit yin is yinatil Dan, yet chi cuylay juntzanxa eb colwajwom yuj eb.

³⁵ Max yak'on Jehová is jelanil eb, yet chi watx'nej eb masanil tzet yetal tol yelxac'al watx' yili: yet chi alay oc yechel, c'al yet chi tz'islay oc yelbub yetok yax tx'al, c'al tx'al púrpura, c'al an cak tx'al, c'al yetok lino tol caw wal watx'c'al chemlayi; jelan eb yin watx'nen junok tzet yetal tol watx', c'al yin tx'oxon yechel junokxa tzet mulnajilal.