Ex 33 - A Txꞌan Biblia Yin Kꞌanjobal 1989

Max cus c'ul eb conob

¹ Max yalon Jehová bay cham Moisés: —A tinani' elan cayti', cax cheontok jun conob max eiltek bay Egipto, bay sat tx'otx' tx'otx' max wal bay Abraham, bay Isaac c'al bay Jacob, tol ok wak' bay is yinatil eb.

² Ayin ok in chek babjok wángel e satak. A' ok ex ikbanok; ok wiel eb conob bay sat tx'otx' tx'otx' tu', a ton eb cananeo, eb amorreo, eb heteo, eb ferezeo, eb heveo yetokc'al eb jebuseo.

³ Chex toj bay sat tx'otx' tx'otx' tol caw wal yax sat, palta c'amxa chin toj e xol, yujtol caw wal pit ex, ay is may chex wak' c'ayil yulak be, ẍi Jehová.

⁴ A yet max yaben eb anima jun k'anej cusiltak yali ti', max oc eb yin bilc'ulal, c'amxa mac max yaoc yu txiquin c'al yu'.

⁵ Yujtol a Jehová max alon bay cham Moisés: —Al bay eb et israelal ti': Ayex ti' caw wal tenomtak ex. Ta chin apni oc e xol junok bek, ay is may chex wak' lajwok. A tinani' iek el e yu txiquin tu' c'al e yu yin e nuk' tu', cax ok wilon tzet ok wut in ba e yetok, ẍi Jehová, cachi, ẍi Cham.

⁶ Yuj wal tu xin, yettax max el eb bay yich witz Horeb, c'amxac'al junok max yaoc yu yin is nuk' c'al is yu txiquin.

A mantiado bay chi chalej ba eb anima yetok Jehová

⁷ Max yiaj cham Moisés is mantiado Jehová, cax max jitzon el najat bay campamento. Max yak' yik Jun mantiado bay chi co chalej co ba yetok Jehová. Ta ay junok mac chi toj k'anjab yetok Jehová, yowalil chi toj bay jun mantiado bay tiel campamento tu'.

⁸ A yet chi betic' cham Moisés bay yul mantiado tu', chi eltok waan masanil eb anima bay ti' is mantiado. Junxanej chi yun tojcan t'anan eb yin cham masantac'al chi occantok cham yul mantiado tu'.

⁹ Asan wal chi occantok cham, cax chi ayol boc'naj jun asun bay is ti' mantiado tu', yak'ban chi k'anjab Jehová yetok.

¹⁰ A yet chi yilon eb anima tu' yayol boc'naj jun asun bay is ti' mantiado tu', cax chi ay jajlabok eb masanil bay ti' is mantiado yin ayilal bay Jehová.

¹¹ Yin ac-'omba satil chi yun k'anjab Jehová yetok cham Moisés, axca wal chi yun co k'anjab yetok junok co watx'il anima. Chi lajwi tu xin, cax chi meltzoj cham Moisés bay campamento. Axa pax Josué xin, is chekbej cham Moisés, a ton c'ajol Nun, c'amc'al chi eltek bay yul mantiado tu'.

Chi toj Jehová yetok is conob

¹² Max yalon cham Moisés bay Jehová: —Mamin Jehová, ach max al ayin tol ayin chi wikbaj jun a conob ti', palta maj al ayin mactxel ok a chek colwaj wetok, cax max aloni tol ojtakbil in oj, cax ay a tzalojc'ulal win aloni.

¹³ Yuj wal tu xin, ta yel axca tu', ak' wojtaknej elok tzetbil wal yoc a nabal, yet watx' chi je' ach wojtaknenc'al elok, cax ok wak'onc'al tzalojbok a c'ul. Ojtak wali tol a jun conob chacan oc yul in k'ab ti', tol a conob yayji, ẍi cham Moisés.

¹⁴ —Ayin wal caw ok in tok etok, cax ok ach wak'on xew bay tx'otx' tx'otx' tu', ẍi Jehová bay cham Moisés.

¹⁵ Yuj wal tu xin, max tak'wi cham Moisés: —Ja' yel wal Mamin Jehová, tatol c'am chach toj jetok, watx' tol c'am chon eil cayti'.

¹⁶ Ilab tatol c'am chach toj jetok tinani', ¿tzet wal chi yun yojtaknelay elok, ta ay a tzalojc'ulal win, c'al yin eb a conob ti'? Ta ayachc'al oc jetok xin, chi tx'oxil ba tol a conob ton jayji on, cax sic'bil on el oj xol masanil conob, ẍi Moisés bay Jehová.

¹⁷ —A juntzan k'anej chal ti' ok wunej, yujtol caw wal ay in tzalojc'ulal en, cax ojtakbil ach wuj, ẍi Jehová bay cham.

¹⁸ —Mamin, chin oc wal tean en tol cha tx'ox a mayk'ak'al ayin, ẍi cham Moisés.

¹⁹ Max tak'wi Jehová bay cham: —Masanil in watx'c'ulal ok in tx'ox ayach. A wal a satak ok walil el in bi, tol ayin ton Jehová in, tol ok wak' in yabenc'ulal bay mac chi yal in c'ul, cax ok ok' in c'ul yin mac bay chi yal in c'ul.

²⁰ Palta chi wal ayach tol maj je' oc t'anan yin in sat, yujtol c'am junok mac chi je' yilon in sat; jun bek chi cami, ta chi yila'.

²¹ Ilab bay in cawilal ay wal jun lugar bay ok je' oc waanok bay yiban jun miman ch'en.

²² A yet ok ec'tok in mayk'ak'al bay tu', ok ach wacan octok yul pojilal ch'en ch'en, cax ok ach in makchejcan octok yetok in k'ab yak'ban ok in ec'cantok.

²³ Axa yet ok lajwok wec'cantok, cax ok wion el in k'ab, cax asannej wichin ok je' eloni; a pax in sat xin, c'am wal jabok ok je' eloni, ẍi Jehová.