Ex 32 - A Txꞌan Biblia Yin Kꞌanjobal 1989

Jun ch'en wacax tol oro

¹ Axa yet max yilon eb conob Israel, tol a cham Moisés yelc'ulal chi mayji, cax c'amc'al chi ayol bay ayic' eb tu', max wajban oc ba eb masanil, cax max yalon eb bay cham Aarón: —A tinani xin, chi jochej tol cha watx'nej juntzanok co diosal chon ikbani, yujtol a cham Moisés max on ion eltek bay Egipto, man jojtakok tzet max oni, ẍi eb conob tu'.

² Max tak'wi cham Aarón bay eb conob xin: —A tinani xin, wajbajek oc masanil ch'en yutxiquinej tol oro yet eb ix e yetbi, c'al yet e yuninal, cax che yiontek ayin, ẍi cham.

³ Masanil anima max yiel yu is txiquin, cax max yiontek eb bay cham Aarón.

⁴ Max chaon ec' cham, cax max yak'on uljok cham ch'en xol k'ak'ej, max yaon aytok yul jun is moldeal, cax max oc axca yechel junok wacax. Max occ'al ijan cham lajtx'onen jun yechel wacax tu'. Axa max yun xin, max yalon eb conob tu' masanil: —Ex jet conob Israel, a jun co diosal ti' max on ion eltek bay Egipto, ẍi eb.

⁵ A yet max yilon cham Aarón jun tu', max watx'nen aj cham jun altar bay satak jun ch'en wacax, max yalon cham yin ipejal: —A yet yecal chi co chaonek junok miman k'in bay satak Jehová, ẍi cham.

⁶ Axa yet max k'inibi yet junxa c'ual xin, cax max wajban ba masanil anima, max yak'on eb xajanbal tol chi tz'a'i, c'al xajanbal yet junc'ulalil. Max lajwi tu' max ay chotjab eb, cax max low eb c'al yuq'uena' eb. Lajwi tu xin, max aj bulnaj eb canalwi, c'al yunen eb yobtakil satak is diosal tu'.

⁷ Yuj wal tu xin, max yalon Jehová bay cham Moisés: —Paxan ayok, yujtol a eb conob max eiltek bay Egipto, mayal yetnej el ba eb.

⁸ Caw wal yin aymanil max yiel ba eb bay tzet max wala'. Yinxac'al aymanil max watx'nej eb jun yaliẍ yechel wacax, cax chi oc eb yin ayilal bay. Chi yak'on eb xajanbal, cax chi yalon eb: Ex jet conob Israel, a wal jun ti' co diosal max on ion eltek bay Egipto, ẍi eb.

⁹ Mayal wila' tol a juntzan anima ti', yelxac'al pit is nabal eb.

¹⁰ A tinani' xin, jitz el a ba yul in be, tol lanan in k'ak'bi tit wowal yin juntzan anima ti'. Ok wak' c'ayil eb masanil, asan etok ok in watx'nej jun miman conob yuj eb onenal, ẍi Jehová.

¹¹ Axa cham Moisés max oc ijan k'anon mimanc'ulalil bay Jehová is Diosal yuj is conob; max yaloni: —Mamin Jehová, ¿tzet wal yuj xan chi tit yowal a c'ul yiban a conob, tol ach max eiltek bay Egipto yetok a may a k'ak'al?

¹² ¿Tzet wal yuj xan ok a cha yal eb anima aj Egipto axca ti': Ti tol yob is nabal Dios yin eb, xan max yieltok Dios eb cayti', cax chi toj yak'on cam eb bay xolak witzlak ac'al, chi c'aylay el eb yuj Cham bay sat tx'otx' tx'otx' ti'? ẍi mi eb aj Egipto. Yuj wal tu xin, matawal c'am chi aj can yowal a c'ul yiban eb; cax c'am chaoc yailal yiban eb a conob.

¹³ Matawal cha natek eb a chekbej, a ton cham Abraham, Isaac c'al Israel. Max a locbajtek a ba yin ak'on a ti' bay eb, max alon axca ti': Ok wiaj can e bisil yetok e yuninal. Lajan ok yun bisil eb axca waycan bay satcan. Ac'ala' jun tx'otx' tx'otx' ti', mayal wala' tol ok wak' bay e yinatil yin tojbalk'inal, cachi bay eb xin, ẍi cham Moisés.

¹⁴ Yuj tu xin, max naon Jehová tol c'amxa chi yak' c'ayil is conob.

¹⁵ Cax max meltzoj aytek cham Moisés bay jolom witz, cax ibil oc ch'en cab jenan ch'en yuj cham, bay tz'ibbil oc mandamiento yuj Jehová, yin ca paq'uil ch'en.

¹⁶ A wal caw Jehová max watx'nen ch'en ch'en tu' cabil, cax max tz'iben oc letra tu' yin ch'en.

¹⁷ Axa yet max yaben cham Josué yel yaw eb anima, max yalon bay cham Moisés: —A wal yet chi jaben yel yaw eb anima tu', axq'uijan wal tol ayoc owal bay yul campamento, ẍi cham.

¹⁸ Max tak'wi cham Moisés: —A juntzan aw chi oc chi jab tu', man awok yet tzalojc'ulal yet chi ak'lay ganar junok owal, tamwal aw yet cusc'ulal yet chi ayc'ay anima yuj eb ajc'ul; palta bit chi oc chi wabej, ẍi cham.

¹⁹ Axa yet max jayc'al oc cham Moisés bay cawilal campamento, max yilon oc cham jun yaliẍ ch'en wacax, c'al canal chi uji. Max tit yowal cham, cax max k'okon ay cham ch'en ch'en bay tz'ibbil oc mandamiento tu', xan max pojtok ch'en bay yich witz tu'.

²⁰ Max lajwi tu xin, max bet tzac'on eltek cham jun yechel wacax tu', cax max k'okon ajtok bay yul horno xol k'ak'ej. Lajwi tu' max mak'on pojok, coc'xac'al max yutej, cax max yaon aytok xol a' aej, max chekon yuc' eb anima tu'.

²¹ Max yalon cham bay cham Aarón: —¿Tzet yuj xan max ach monchaj aj yuj juntzan anima ti' cax max ekbaj eb yin yaon oc eb jun miman mulej ti'? ẍi cham.

²² Max yalon cham Aarón: —Mamin, c'amokab chi tit owal win, caw wal ojtak sic'libil tol a jun conob ti', chi yochejc'al eb chi yun yobtakil.

²³ A eb max alon ayin: Watx'nej junok co diosal chon ikbani, yujtol a cham Moisés max on ion eltek bay Egipto, ma txequel tzet max oni, c'amc'al chi jay cham, ẍi eb ayin.

²⁴ Yuj tu' xan max walon bay eb: Mactak ex txel ay oro bay, yiokabtek, ma ch'en yu txiquinej, yiokab elok, quin chi bay eb. Lajwi tu xin, max yiontek eb ayin, max wak'on tz'aok, cax max eltek jun yechel wacax ti', ẍi cham Aarón tu' bay.

²⁵ Max nachaj el yuj cham Moisés, tol a jun conob tu', bekanxac'al c'ul yak'on q'uixwok ba eb satak eb conob ajc'ul oc yin eb, axa pax cham Aarón xin, caw wal c'amxac'al jabok max tenchelay eb yuj.

²⁶ Yuj wal tu' xan max oc waan cham Moisés bay is ti' campamento, max yaloni: —A tinani xin, a mac chi yal c'ul chi yaoc ba yul k'ab Jehová, titokab bay in c'atan ti', ẍi cham. Masanil eb nak levita, max jitztek ba eb nak c'atan cham.

²⁷ Max lajwi tu', max yalon pax cham bay eb: —Max chek Jehová co Diosal wal ayex, tol junjun exc'al, che yitok e yespada, cax chex toj bay campamento, cax chex ec' xolak na, cax che mak'on cam eb e yuẍtak, c'al eb e yamigo, c'al eb e vecino, ẍi Jehová, ẍi cham Moisés.

²⁸ Max yikej eb nak levita chekbanil max yak' cham Moisés. Yuj tu xin, ay mi oxebok mil anima max cami.

²⁹ Max lajwi tu xin, max yalon cham Moisés: —A tinani' maxax e yaoc e ba yul k'ab Jehová, ilab tol ayex max e mak' cam e c'ajol c'al e yuẍtak. Yuj wal tu xin, chi yak' Jehová yaxilal e yiban, ẍi cham bay eb.

³⁰ Axa yet junxa c'ual, max yalon cham Moisés bay eb anima: —Caw wal miman e mul max e yaocok. A tinani', ti' chin toj pax bay jolom witz junelxa bay ayic' Jehová. A bay tu' ok in k'anjab yetok Cham, axtawal xin, ok yak' tan Cham e mul tu' e yiban, ẍi cham Moisés.

³¹ Max lajwi tu', max toj cham bay jolom witz bay ayic' Jehová. Max yaloni: —Wal yel Mamin, caw wal miman mul jun conob ti' max oc a satak, max watx'nej eb jun is diosal tol oro, cax max oc eb ayilal bay.

³² Yuj wal tu xin, chin oc tean en, ta chak' tanil is mul eb tu'. Ta maj ak' tan xin, cax cha joon c'ayil in bi bay yul libro bay tz'ibbil is bi eb tol et-xa yayji, ẍi cham Moisés bay Jehová.

³³ Max tak'wi Jehová bay cham: —A mac chi oc mul ayin, a ton eb tu' chin joc'ay is bi bay yul libro.

³⁴ Yuj tu xin asi', cax cheontok eb conob bay jun lugar max wal ayach. A jun wángel ok ex ikbanok, palta ok apnok jun c'ual yet ok waon oc yailal eb anima ti' yuj is mul eb, ẍi Jehová.

³⁵ Max lajwi tu xin, max yaontek Jehová jun miman ilya' yiban eb conob Israel tol chi cam eb yuj, yujc'al wal tol max oc eb yin ayilal bay jun yechel wacax max watx'nej cham Aarón.