Ex 30 - A Txꞌan Biblia Yin Kꞌanjobal 1989

Jun altar yet incienso

¹ Max yalon Jehová: Ak' watx'jok junok altar bay chi tz'a incienso, a te acacia chi oc yin.

² 45 centímetro chi yun is k'atil, 45 centímetro chi yun c'apax is sat, axa is tel chi aj xin, 90 centímetro chi aji. Ac'ala' juntzan yuc'a' altar chi aji, junejc'al chi yun yetok altar tu'.

³ Chi oc oro yelxac'al watx' yiban, c'al yinlak can paq'uil, yetokc'al yin is yuc'a' tu'; chi aj c'apax tzalan oro tu' yiban is tilak.

⁴ A yalan is tilak tu', a tu' chi oc cabcabok argolla naba oro yin cab paq'uil. A bay yul tu' chi eq'uel te' batxbanil yet chi je' batxlayi.

⁵ A te batxbalej tu', a te acacia chi oqui, cax chi oc oro yin.

⁶ Chaay jun altar tu' bay satak eltek an cortina ayoc yenelok caẍail in trato. A jun caẍa tu', ayoc is makil bay chi ak'lay tan yobtakil. A bay tu' ok in chalej in ba etok.

⁷ A Aarón ok ak'on tz'a incienso sumumi jab yiban altar tu', junjunc'al k'inibalil yet chi watx'nelay oc candil.

⁸ Ok yak'on c'apax tz'a yet ok aycan c'u, a ton yet yorail yet chi oc k'ak'al candil. A jun ti' ok ujc'al in satak yet ok beyc'altok tiempolak.

⁹ C'am junok comon incienso ok ak'lay tz'a bay yiban jun altar tu', tamwal junok xajanbal, tamwal ofrenda yin ixim trigo, tamwal ofrenda yin seclay ay vino.

¹⁰ Asan junel yul abil ok yaoc Aarón chic' yin yuc'a' altar ti', a ton is chiq'uil no xajanbal ok ak'lay cam yuj yak'lay tan yobtakilal. Junjun abil chi yun jun ti' yin tojbalk'inal. A jun altar ti', wet yayji ocok, ẍi Cham.

Tojlabal chi ak'lay yuj is q'uexelok junok mactxel

¹¹ Max k'anjab Jehová bay Moisés, max yalon bay axca ti':

¹² A yet ok eon aj bisil eb et conob Israel ti', junjunc'al eb ok yak' junok tojlabal ayin yuj yiquisal eb, yet watx' c'am junok ilya' chi oc camich yuj ok jayoc yiban eb yuj jun censo tu'.

¹³ A masanil eb ok tz'ibchaj tu', yowalil chi yak' eb nan siclo ch'en plata yin tojlabal ayin, atac'ala' ch'en siclo chi k'anabax bay in cajlobal. (20 gera yalil jun siclo).*fn*

¹⁴ A masanil eb chi tz'ibchaji, a ton eb tol ayxa junc'al abil is k'inal, cax chi beyc'altok, a ton eb tu' chi yak' jun tojlabal tu' ayin.

¹⁵ A yet chi yak'on eb jun tojlabal tu' ayin, yuj yiquisal eb xan chi yak' eb, man mimanok chi yak' eb beyom, cax man txennejok chi yak' eb meba'; nan sicloc'al chi yak' eb masanil.

¹⁶ Catatu xin, cha wajbaj aj masanil ch'en plata chi yak' eb anima tu' tojlabalok yuj yiquisal eb. A tu' chi oc yopiso ch'en bay mantiado bay chin chalej in ba e yetok. A yuj tu', xan ok ex in natek, a ton yuj tzet che yak' yuj e yiquisal tu', ẍi Cham.

Jun ch'en palangana naba bronce

¹⁷ Max k'anjab pax Jehová bay cham Moisés, max yalon bay axca ti':

¹⁸ Ak' watx'jok junok ch'en miman palangana naba bronce, ac'ala' is ch'enal tu' chi oc c'apax yin junok is batxlub yich. A tu' chak' watx'jok ay bay nan xol altar yetok mantiado bay chin chalej in ba e yetok, cax chak'on noj yetok aej.

¹⁹ Axa Aarón yetok eb is c'ajol, ok yiajtek eb aej bay tu' yet ok tx'ajon eb is k'ab c'al yakan.

²⁰ A yet chi octok eb yul mantiado, ma yet chi apni oc eb bay altar yuj yak'on tz'a eb ofrenda in satak, yowalil chi tx'aj eb yakan, c'al k'ab, yet watx' c'am chi cam eb.

²¹ A jun ti' ley chi yuncan yiban Aarón yetok yinatil, yet ok beyc'altok tiempolak, ẍi Cham.

Jun aceite chi k'anabax yin junok chi occan yetok Jehová

²² Max k'anjab pax Jehová bay cham Moisés, max yalon bay axca ti':

²³ Sic'layokab el juntzanok te awoj manxa watx'ilok yoc jabil: Lajcawebok libra k'olal mirra caw wal watx', wakebok libra canela, wakebok libra cálamo caw wal watx',

^24-25 yetok c'apax lajcaweb libra cacia. A echbal chi k'anlay yin juntzan ti', a ton axca echbal chi k'anabax bay in cajlobal. Chi somlay juntzan ti' yetok nan is can litro aceite yet olivo, axca wal chi yun watx'nen c'apax junok watx'nem perfume is perfume. Caytu' chi yun a watx'nen aceite chi k'anabax yet chi sic'lay el junok tol wet chi yuncanok.

²⁶ Chi bonlay oc aceite tu' yin mantiado bay chin chalej in ba e yetok, yin te caẍa yet trato,

²⁷ c'al yin te meẍa c'al yin is mitx'k'abil, yin batxlub candil yetok is mitx'k'abil, yin altar yet incienso,

²⁸ yin altar bay chi tz'a xajanbal yetok is mitx'k'abil, yetokc'al yin jun ch'en miman palangana yetokc'al is batxlubal.

²⁹ Axca tu' chi yun a sic'oncan oc masanil juntzan ti', yet watx' wet chi yuncanok, xan a masanil tzet yetal chi oc tennaj yin, wet-xa chi yuncanok.

³⁰ A jun aceite tu' cha bon c'apax oc yin Aarón, yetokc'al yin eb is c'ajol. Caytu' chi yun sic'chaj can oc eb yin sacerdoteal ayin.

³¹ Cax chalon bay masanil eb et israelal: A yet ok beyc'altok tiempolak, a ton jun aceite tu' ok k'anlay yin tzet yetal tol wet chi yuncanok.

³² Man comonok chi bonlay oc yin junok comon anima, tamwal chi watx'nelay junokxa makan aceite lajan yetok jun ti'. A jun ti', wet chi yuncanok; yuj tu' xan man comonok che mitx'a'.

³³ Ta ay junok mactxel chi watx'nen junokxa makan aceite lajan yetok jun ti', ma chi bonoc yin junok comon anima, a jun tu' yowalil chi c'aylay el xol is yet conob, cachi, ẍi Cham.

A jun incienso

³⁴ Max yalon Jehová bay cham Moisés axca ti': Ilayokabtek masanil juntzan tzet yetal ti', lajanc'al ok yun yechbalil: K'olal estacte, joyal no mich' chi yik uña, k'olal te gálbano watx' yoc jabil, c'al yetok k'olal te incienso caw wal tol watx'.

³⁵ A yetok juntzan tu' chak' watx'jok incienso. Watx' chi yun somlayi, axca wal chi yun watx'ji yuj junok watx'nem perfume. Watx' chi yun toj yatz'amil,*fn* c'amokab tacnakil, yujtol wet yayji ocok.

³⁶ Coc'xac'al chi yun chac'lay poj janic'ok, cax chaon oc yul mantiado bay satak te caẍail in trato, bay chin tx'ox in ba ayex. A jun incienso tu', mimanokab yelapnok yul e sat.

³⁷ C'amxa che watx'nej e k'anbejal axca wal jun max watx'ji ti'. Che natek tol asan in ay wet.

³⁸ Ta ay junokxa mactxel chi watx'nej yul yet, yet chi yab jabil, a jun tu' tojolc'al c'aylay el xol is yet conob, ẍi Cham.