Ex 25 - A Txꞌan Biblia Yin Kꞌanjobal 1989

Ofrenda chi ak'lay yuj cajlobal Dios

¹ Max k'anjab Jehová bay cham Moisés, max yalon bay axca ti':

² Al bay eb et israelal tol chi yiaj eb junok ofrenda chi yak' eb ayin. A jun ofrenda tu', chi ilay aj xol eb tol chi el wal yin c'ul yak'oni.

³ A tzet yetal ok ilay aj tu', a ton juntzan ti': oro, plata, bronce,

⁴ an yax tx'al, yetok an tx'al púrpura, yetok an cak tx'al, yetok lino yelxac'al watx', yetok xil no chiwo tx'albil,

⁵ yetok tz'umal no icham calnel bonbil yuj cak, yetok no tz'um caw wal chi lababi, yetok c'apax te acacia,

⁶ yetok aceite chi k'anabax yul candil, c'al perfume, yetok aceite yet olivo chi k'anabax yet ay junok mactxel, ma junok tzet yetal tol wet chi yuncanok, yetok incienso tol caw wal watx' yoc jabil,

⁷ yetok c'apax ch'en cornalina, c'al juntzanxa ch'en caw wal watx' yili chi oc yin is chaleco, c'al yin an k'ap ayoc yin txamc'ul is pichil junok sat sacerdote.

⁸ Cax che watx'nen c'apax jun in cajlobal, yet watx' chin cajay ec' e xol.

⁹ Palta yowalil ok e watx'nej bay ok in ayjok ec' tu', yetok masanil tzet yetal ok k'anabax yul, axca wal yayji yechel ok in tx'ox ayach.

Te caẍail trato

¹⁰ Watx'jokokab junok caẍa, cax tol a te acacia chi oc yin, tol jun metro yetok 10 centímetro ok yun is k'atil, axa is sat xin, 65 centímetro ok yunej, cax 65 centímetro ok yun yaj is tel can.

¹¹ Cax ok oc oro caw wal watx' bay yul, c'al yin, cax chi oc c'apax oro yin tilak bay yiban bay tzalan ajok.

¹² Cax chi watx'ji c'apax canebok argolla naba oro, chi oc bay canebal yakan, cab bay junjun pac'.

¹³ Cax chi watx'ji c'apax oc is batxbanil. A te acacia chi oqui, chi oc c'apax oro yin,

¹⁴ cax chi jul-lay ec'tok yul juntzan argolla chi oc yinlak c'ul te caẍa tu', a ton yetok juntzan te tu' chi je batxlay aj te caẍa tu'.

¹⁵ C'amxa chi ilay el te' junelxa; palta chi canxac'al bay yul ch'en argolla yin te' tu'.

¹⁶ A bay yul te' tu' ok acan aytok ch'en ch'en bay ayoc in trato ok wak' ayach.

¹⁷ Watx'jokokab is makil yetok oro naba watx' bay chi ak'lay tan yobtakil, jun metro yetok 10 centímetro is k'atil, axa is sat xin, 65 centímetro ok yunej.

¹⁸ Axa bay cab is tilak jun makilej tu', chi oc junjun yechel querubín naba oro, chac'bil yetok martillo.

¹⁹ A jun makilej tu' yetok juntzan yechel querubín tu', junnejc'al ok yunej; junjun juntzan querubín tu', chi cancan bay junjun is ti' jun makilej tu'.

²⁰ Ac-'omba chi yun sat, palta a tu' chi toj t'anjab yiban jun makilej tu'; axa is xic', yowalil a tu' chi tojcan jenan yiban jun makilej tu', axca tol yenelok chi yun yoccanok.

²¹ A ch'en ch'en bay ayoc in trato tu', ok wak' ayach, a bay yul te caẍa tu' ok acan aytok; catatu' chaon oc is makil tu'.

²² A bay yiban jun makilej tu' bay chi ak'lay tan yobtakil, a tu' ok in tx'ox in ba ayach, bay nan xol juntzan yechel querubín ayoc yiban te caẍail trato tu', cax ok wak'on ojtaknej el masanil chekbanilej ok wak' ekej yetok eb et israelal.

Is meẍail ixim pan satak Cham

²³ Watx'jokokab junok meẍa, a te acacia chi oc yin; 90 centímetro ok yun is k'atil, 45 ok yun is sat, 65 ok yun yaj tel can.

²⁴ Cax chi oc oro yin, c'al yin is tilak.

²⁵ Cax chi watx'ji oc oro chi aj oyan yin tilak bay yiban, ukeb centímetro chi aji.

²⁶ Chi watx'ji c'apax canebok argolla naba oro, cax chi oc yin canebal yesquinail bay yetc'ulal yakan.

²⁷ A tu' chi oc juntzan argolla tu', bay cawilal bay ayaj is tilak tu'. A yul juntzan tu' chi eq'uel k'atan is batxbanil; yet chi je' yilaytok te meẍa.

²⁸ A te acacia chi oc yin batxbanilal yet chi ilaytok te meẍa tu', chi oc c'apax oro yin.

²⁹ Chi watx'ji c'apax plato, mimek cucharón, ẍalu, c'al sec' naba oro, bay chi chalay ofrenda yin aejal.

³⁰ Chi watx'ji ay jun meẍa tu' in satak, cax chi ayc'al ixim pan yiban tol wet yayji ocok.

Batxlub candil oro

³¹ Watx'jokokab junok batxlubal candil tol naba oro, tol chac'bil yetok martillo. A yich bay chi ay batxanok, yetok is teal, yetok xumaquil, junnejc'al bijan chi yunej.

³² A bay cab is tz'eyil, a tu' ok oc oxox is k'ab chi eltek, bay junjun tz'eyil.

³³ A yin junjun is k'ab chi eltek bay yin jun tealej tu', yowalil ay oxeb xumaquil lajan axca xumaquil te almendro.

³⁴ Ac'ala' yin jun tealej tu', ay caneb is xumaquil lajan axca xumaquil te almendro.

³⁵ A bay yalan bay ayiltek junjun mojan is k'ab tu', ay junjun xumaquil.

³⁶ A juntzan xumaquil tu', c'al is k'ab tu', junnejc'al yayji yetok jun batxlubej tu'; a jun tu' naba oro chac'bil yetok martillo.

³⁷ Chi watx'ji c'apax ukeb candil, cax chi watx'ji yet chi eltek is sakk'inalil bay is satak.

³⁸ A is mitx'banil chi ion el tanil an mecha, c'al is platoal, cax naba oroc'al elok.

³⁹ Chi oc junok talento*fn* oro yin jun batxlub candil tu', yetokc'al is mitx'k'abil.

⁴⁰ Chi cam wal eloni, tol lajan wal chi yun a watx'nen axca yayji yechel chin tx'ox ayach bay jolom witz ti'.