Ex 24 - A Txꞌan Biblia Yin Kꞌanjobal 1989

Is trato Jehová yetok conob Israel

¹ Max yalon Jehová bay cham Moisés axca ti': —Chach ajtek bay ayin ec' ti' yetok Aarón, Nadab c'al Abiú, c'al yetok 70 eb yicham winakil e conob. A yet c'amto chex jay in c'atan, che yion ay e ba ayin.

² Asannej ach chi je' a jitzontek a ba in c'atan, axa pax eb nak tu', c'am chi jitztek ba eb, tamwal eb conob, c'am chi je' yajtek eb etok, ẍi Jehová.

³ Lajwi tu xin, max paxaytek cham Moisés, max yalon cham bay eb anima tzet leyal max yak' Jehová, c'al tzet max yut yaloni. Axa masanil eb anima xin, junej max yun tak'wi eb: —Masanil tzet max yal Jehová tu' ok jikej, ẍi eb.

⁴ Max lajwi tu xin, cax max tz'iben Moisés masanil tzet max yal Jehová. Axa yet puch k'inibalilto yet junxa c'ual, max aj wanok, cax max watx'nen jun altar bay yich witz tu', max waban aj cham lajcaweb ch'en ch'en. A junjun ch'en ch'en tu', chi tx'ox junjun tribual Israel.

⁵ Yin aymanil, max chek cham juntzan eb nak ach'ejtak israel yet chi mak'cam eb nak no toro yet chi ak'lay tz'a yin xajanbalil, c'al xajanbal yet junc'ulalil chi ak'lay bay Jehová.

⁶ Axa cham Moisés max chaon nanok is chiq'uil no', max yaon aytok yul juntzan net, axa nanxa xin, max tiẍoc cham yin altar tu'.

⁷ Max lajwi tu xin, max yion aj cham tx'an libroal is trato Dios, cax max awtelay aj tx'an bay eb conob Israel. Max yalon eb conob tu' axca ti': —Masanil tzet chi yal Jehová, chi jaoc yin co c'ul jikeni, ẍi eb.

⁸ Max lajwi tu xin, max yiontek cham chiq'uil no no' maxax yacan ay cham yul juntzan net tu', axa tiẍontok cham yiban eb anima tu'. Max yalon axca ti': —A chiq'uil no no' ti' chi aon oc yip is trato Jehová max watx'nej jetok, a ton wal ayoc yichbanilok juntzan k'anej ti', ẍi cham.

⁹ Lajwi tu' max ajpaxtok cham Moisés yetok cham Aarón bay witzal Sinaí, yetok Nadab, Abiú c'al yetok 70 eb yicham winakil conob.

¹⁰ A bay tu' max yil eb is Diosal. A bay yalan yakan, toxac'al chi jopopi axca ch'en safiro caw wal watx'xac'al yili, axca yili yaxil satcan.

¹¹ C'am tzet max utlay eb cham yuj yipalil Jehová. Max il-lay yin Jehová yuj eb, cax max low eb, c'al yuq'uena' eb satak.

Yet ayic' Moisés bay Witz Sinaí

¹² Max yalon Jehová bay cham Moisés: —Ajantek bay jolom witz bay ayin ec' ti', cax chach cancan in c'atan ti', yujtol ok wak' cab ch'en ch'en ayach bay tz'ibbil ay juntzan mandamiento wuj, yet chi oc e cuybanilok, ẍi Jehová.

¹³ Max ajtok cham Moisés yetok Josué is chekbej bay jolom witz tu' bay max tx'ox ba Dios.

¹⁴ A yet c'amto chi toj cham, max yalon bay eb yicham winakil conob: —Cananek can cayti' masantac'al chon meltzoj on. Ayic' cham Aarón c'al cham Hur e yetok. Ta ay tzet chi yochej e c'ul chi watx'ji elok, a eb ti' ok watx'nen el ayex, ẍi cham Moisés.

¹⁵ Max lajwi yalon cham xin, cax max ajtok cham bay jolom witz. Yin aymanil max oc oynaj jun asun jolom witz tu'.

¹⁶ Axa is mayk'ak'al Jehová max jayoc batxan bay jolom witz Sinaí, wakeb wal c'ual max oc oyan asun bay jolom witz tu'. Axa yet is suk c'ual, cax max awtelay cham Moisés yuj Jehová bay xol asun tu'.

¹⁷ Max tx'ox ba Jehová yetok is mayk'ak'al bay jun witz tu' satak eb conob. A is mayk'ak'al tu', lajan yili axca junok k'ak'ej caw wal chon tz'a yuj.

¹⁸ Lajwi tu xin, max toj cham Moisés bay xol jun asun tu'; max ajtok cham bay lajubxac'al chon witz tu'. A tu' max can cham yin cawinak c'u, c'al cawinak ak'bal.