Ex 23 - A Txꞌan Biblia Yin Kꞌanjobal 1989

Ley yiban tzet chi yun watx'ji el k'anej

¹ Manchak e yalil lek'tial k'anej yin e yet animail, tamwal che junanej e ba yetok junok mac yob is nabal, yet che yaon oc e ba yin lek'ti' testigoal.

² Manchak ex oc yin lek'ti' testigoal, yuj e yoc yetok junok bulan anima chi unen yobtakil.

³ Caxc'al meba' junok anima, ta ay is mul, c'am che yaoc e ba yetok.

⁴ Ta chi ilchaj no' is wacax, ma burro nak ajc'ul oc e yin e yuj, no' tol c'aynaktok, iektok no' bay nak.

⁵ Yowalil chex colwaj yin mac chi chichon oc c'ul e yin. Ta che yila' tol chi ayc'ay no is burro tu' yalan yikatz, chex colwaj e yion aj wan no' yetok.

⁶ Manchak e c'ayil is derecho junok anima tol meba', tatol jichan yayji oc is k'anej.

⁷ Manchak e yaoc e ba yin junok anima tol chi nalay aj k'anej yiban, tamwal e yak'on low camich yiban junok anima tol c'am pax is mul, yujtol ayin ok wak' low yin junok tol axca tu' chi yunej.

⁸ Manchak e cha' tumin yet che watx'nen el junok k'anej, yujtol a yuj ch'en tumin tu', axca wal tol c'am is nabal mac chi watx'nen el jun k'anej tu', cax chi yak'on can low yin mac c'am is mul.

⁹ Manchak e yetnej anima tol tx'ok conobal, yujtol ayex ti' najatil max quex ec'jab yin tx'ok conobal bay Egipto, mayal e yila' tol yin yatakil max yun e yec'jab bay junokxa tx'ok conobal.

Yowalil chi xew tx'otx' tx'otx'

¹⁰ Mulnajanek sat tx'otx' tx'otx', cax wajek aj sat e yawoj asannej yin wakeb abil.

¹¹ Axa yet is suk abil xin, cax che yak'oncan tx'otx' xewok. A jantakto tzetak yetal chi ch'ibaj sat tx'otx', c'amxa che mitx'a', yet-xa jantak eb meba' ayic' yul e conobal tu', ac'ala' a no no' ay xolak te', ok loon sat awoj chi yak' tx'otx'. Axca tu' chi yun e yak'oncan e yuva, c'al e yolivo.

¹² Yin wakeb c'ual che yil e mulnajil, axa yet is suk c'ual xin, chex xewi, cax chi xew c'apax e wacax c'al e burro, c'al eb e chekbej chi alji e yintak, c'al eb tx'ok conobal chi mulnaj e yetok.

¹³ Ikejek masanil tzet max wal ayex ti'; c'am chex tewi, tamwal e yalon e ba bay junok tzet yetal chi al-lay oc diosal, tamwal che yak' binajok.

Oxeb mimek k'in

¹⁴ Chaek oxeb k'in yul abil yin in e yion can.

¹⁵ A yet xajaw Abib, che chaon k'inal ixim pan tol c'am yich, axca max wut walon ayex, tol a yin ukeb c'ual che lo' ixim pan tol c'am yich; yujtol a yet jun xajaw tu', max ex el bay Egipto. C'am junok mac chi jay in satak yin tol c'am jabok ofrenda ibil oc yuj.

¹⁶ Che chaon c'apax k'in yet chi elol babel sat e yawoj; ac'ala' che chaon pax junxa k'in yet chi lajwican aj masanil sat e yawoj yet lajub abil.

¹⁷ Ayin Jehová e Yajawil in ti', chi wala' tol a yin oxeb k'in tu', yowalil chi oc masanil eb winak in satak.

¹⁸ A yet che yak'on no no' yin xajanbalil ayin, c'am che yak' is chiq'uil no' yetok ixim pan tol ay yich. C'am che c'ubajtok is seboal no xajanbal tu' yet junokxa c'ual.

¹⁹ A wal e babel sat awoj watx' chi el sat tx'otx' tx'otx', a' che yitok bay in templo. Manchak e txic no yune' chiwo bay xol yal yim is txutx.*fn*

Jun yángel Jehová

²⁰ Wal yel, chin chektok junok wángel e satak, yet watx' chex taynelay yuj bay yulak be, cax ok ex yiontok bay jun lugar bay watx'xa yayji wuj, bay ok ex ayjok.

²¹ Chi cam e yiloni tol manchak e pitnej e ba bay, palta tol che yikej tzet chi yala'. Axca tol a' chi mulnaj yin in q'uexelok, c'am chi yak' mimanc'ulal e yin, tatol c'am che yikej bay.

²² Tatol che yikej bay, cax che yunen bay tzet chi yal in q'uexelok, ok in oc ajc'ulal yin mac ayoc ajc'ulal e yin, ok in oc waan satak mactxel chi yochej chi tec'baj ba e satak.

²³ A wángel tu' ok babjok e satak, cax ok ex yiontok bay sat tx'otx' is tx'otx' eb amorreo, eb heteo, eb ferezeo, eb cananeo, eb heveo c'al eb jebuseo; junelnej ok in c'aycan el eb.

²⁴ C'am chex ay nojan satak is diosal juntzan conob tu'; tamwal chex ay jajan bay, c'am che beybalnej is beybal eb conob tu' yin yion can eb is diosal. A ti' e yet, tol che mak' poj is diosal eb tu', c'al masanil ch'en ch'en ayoc is txajbalok eb.

²⁵ Asannej ayin Jehová e Diosal in chex ay nojan ayin. Ta axca tu' che yutej, ok wak' e lobej, e yuc'a'. Cax najat ok wiel ilya' e xol.

²⁶ Cax najatil ok wut e k'inal. A yul junjun e conobal tu' c'am junok ix ix toc'al ok el yune', tamwal junok eb ix tol man ok unewok.

²⁷ Ok wak' xiwaj c'ul eb anima chex cakoni, ok wak' somchaj is nabal eb conob che yak' owal yetok, c'al masanil eb ajc'ul oc e yin, ok elaj eb ayex.

²⁸ Ok wak' somchaj c'ul eb e yajc'ul e satak yuj xiwilal yet c'amto chex apni ocok, xan ok elaj eb heveo ayex, c'al eb cananeo, yetokc'al eb heteo.

²⁹ Man ok wiel eb e satak yin junnej abil, yet watx' c'am chi etaxtok tx'otx' tx'otx', c'al yajcan no chiwajwom ay xolakilteal bay tx'otx'.

³⁰ C'ojanc'ulal c'al ok yun wion el eb anima tu' e satak, masantac'al yet chi aj can e bisil, cax chi nojcan el sat tx'otx' tx'otx' ti' e yuj.

³¹ Mayal wacan ay is mojonal bay ok ec' e tx'otx' tu'. Chi chail yich bay a' Cakyin Mar masantac'al chi apni oc bay a' Éufrates, cax chi tojtac'al bay a' Mar Mediterráneo bay ayic' eb filisteo, masantac'al bay takin tx'otx'. Cax ok waon oc eb cajan bay sat tx'otx' tu' yul e k'ab; ayexxa ok e yuktej el eb bay sat tx'otx' tu'.

³² C'amc'al junok e k'anej che watx'nej yayji yetok eb, tamwal e yoc yin ayilal bay is diosal eb.

³³ Cax c'amxa che chacan eb yul e conobal, yet watx' c'am chex yikbaj eb e yunen yobtakil ayin. Ta chex ay nojan bay is diosal eb tu', ayex wal che yetnejtok e ba chi yal tu', ẍi Jehová bay cham Moisés.