Ex 22 - A Txꞌan Biblia Yin Kꞌanjobal 1989

Ley yiban tzet yetal tol chi q'uexlonelayi

¹ Ta ay junok mactxel chi elk'anen junok no wacax, ma junok no calnel, cax chi yak'on camok, ma chi txonilok, ta chi michchaj nak yin yelk'an tu', oc'on chi yut yak'on is q'uexel no' wacax tu', cax canc'onxa chi yut yak'on is q'uexel no calnel tu'.

^2-4 A junok mac chi elk'ani, yowalil chi tojlanej tzet chi yelk'anej tu'. Ta c'am is tumin jun elk'om tu', yowalil chi txonlay el yuj yelk'an tu' yet chi tojlanej tzet max yelk'anej tu'. Ta chi ilchaj no no' elk'anebil tu xin, yowalil chi tojlanelay no', cabxa chi yun tojlanelayi, ta junok wacax, ma junok no burro, ma junok no calnel. Ta chi michchaj junok yet lanan yelk'anwi tu', cax chi mak'lay camok, ta yet ak'balil chi michchaji, c'am chi low yin nak max mak'on cam tu'. Ta yet c'ualil chi michchaji, cax chi mak'on camok, mak'oj cam animaxa axca tu'.

⁵ Ta ay junok mactxel chi yitok is jobbejal no' low sat is tx'otx' junokxa mactxel, ma tatol toc'al chi toj no' low xol yawoj junokxa mactxel, yowalil chi yak' mac ay yet no tu' is q'uexel awoj tu', a wal is yawoj caw wal watx' chi yak' is q'uexelok.

⁶ Ta ay mac lanan yak'on tz'a is patan, cax chi nilon tz'a is trigo junok mactxel, ixim tol bulanxa, ma ixim c'amto chi c'uplayi, a mactxel chi bekon el k'ak' tu', yowalil chi tojlanej masanil tzet max tz'atok tu'.

⁷ Ta ay junok mac chi yatok is tumin, ma junokxa tzet yetal tol ay is tojol c'ubaj junokxa, cax chi elk'anelay eltek yul yatut nak chi c'uban tu', ta chi ilchaj nak elk'om tu', cabxa chi yut yak'on nak elk'om tu' is q'uexel.

⁸ Ta c'am chi michchaj nak elk'om tu xin, chi ilaytok nak aj na tu' satak juez, cax chi il-layi ta manak jun aj na tu' max mitx'on ch'en tumin tu', ma jun tzet yetal chi ak'lay c'ubaj tu'.

⁹ Ta ay junok anima chi yaloc junok tzet yetal yetok, junok no wacax, ma junok no calnel, ma junok burro, ma junok pichilej, ma junokxa tzet yetal toc'al chi c'ayajok, cax chi yalon junokxa tol yet, a chi yunej tol chi ilaytok eb cawan tu' satak eb juez. A mac lek'tial chi yala', a jun tu' cab chi yun yak'on is q'uexel bay mac ay yet tu'.

¹⁰ Ta ay junok mactxel toc'al chi el yin c'ul chi chaon junok no burro, ma junok no wacax, ma junok no calnel, ma tzanc'al tzet jobbejal no' yet chi taynej, axa chi yunej, a no no' tu' chi cami, ma chi lajwi, ma chi toj yuj elk'om yul is k'ab nak tu', cax c'am mac chi iloni,

¹¹ ok yak' nak anima tu' is ti' satak Jehová, c'al satak nak ay yet no no' tu', tzetbil tol manak nak max mitx'on no'. A nak ay yet no' tu' chi cha' yab is k'anej nak tu', xan c'am chi tojlanej.

¹² Tatol t'anan oc nak, cax max elk'anelaytok no no' tu', yowalil chi tojlanej bay is yajaw no' tu'.

¹³ Ta max chilaytok no' yuj no coj, ma yuj no ok, yowalil chi yitok nak jabok is tiben no', yet watx' chi yil nak yajaw no' tu', ta axca tu', cax c'am chi tojlanej nak no'.

¹⁴ Ta ay mac chi k'anon junok no mulnajwom no' majanej, no chej ma junok no wacax, ta c'uxan chi cam no', ma chi lajwi no', tol maj yil nak is yajaw no' tu', yowalil chi tojlanej mac max majanen no' tu'.

¹⁵ Palta ta t'anan oc nak yajaw no' tu' yet max cam no' xin, c'am chi tojlanej nak no', yujtol trato yayji eb, asan is majanbilal no' chi yak' nak.

Juntzanxa ley

¹⁶ Ta ay junok winak chi oc nic'an yin junok ix k'opoj tol c'amto bay max yak' is ti', cax chi etnelayxac'al ix yuj nak, yowalil chi yak' nak ch'en tumin yet mojanil bay is mam ix axcata' beybalej, cax yowalil chi yi'xac'al nak ix.

¹⁷ Ta c'am chi je' c'ul is mam ix chi yi' nak ix, palta yowalil chi tojlanej nak ch'en tumin bay is mam ix tu', axca ta' is beybal eb anima yet chi mojay eb ix k'opoj.

¹⁸ Masanil eb xal aj bal, yowalil chi cam eb xal.

¹⁹ Ta ay mac chi yun mul yetok no no', yowalil chi cami.

²⁰ Ta ay mac chi yak' xajanbal bay tzet chi al-lay oc diosal, yowalil chi mak'lay camok, yujtol wet yayji xajanbal tu', ayin Jehová in ti'.

²¹ Manchak e yetnej eb anima toc'al ayic' e xol tol man aj conobok, yujtol max ex ec' c'apax yin tx'ok conobal bay Egipto.

²² Manchak e yetnej eb ix camnakxa yichamil, ma eb unin tol c'amxa is mam, c'amxa is txutx,

²³ yujtol ta che yetnej eb, a ayin ok k'an eb colwal, cax yin aymanil ok in col eb.

²⁴ Ok tit wowal e yin xin, cax ok ex wiontok yin junok owal; axca tu' chi yun ex wak'on camok. Yuj wal tu xin, a e yistzil chi can eb yin c'amxa yichamil, cax chi can eb e yuninal yin tol c'amxa is mam.

²⁵ Ta che yak' ch'en tumin majanil bay junok meba' anima, tol e yet conob ayic' e yetok, c'am che cha' yuca' ch'en bay.

²⁶ Ta chi yak'can junok is pichil, yuj chi majanej ch'en tumin tu', ak' meltzoj bay yet chi aycan aj c'u,

²⁷ talaj asan pax ch'an jun is pichil tu' chi yaoc yuj sic, cax asannej chi yaoc yet ak'balil. Yuj tu xin, ta chi k'an colwal ayin, yin aymanil chin colwaj bay, yujtol ayin ti', jun bek chi cusoc in c'ul yin anima.

²⁸ C'am che yal yobal k'anej yin eb juez, tamwal yin eb yajawil conob.

²⁹ C'amokab chex mayji e yiontek e yofrenda ayin, yin e babel sat awoj. A e babel winak unin che yak' ayin.

³⁰ Axca tu' chi yun c'apax e babel yune' e wacax c'al e calnel; chi cancan no' ukebok c'ual yetok is txutx, axa yet is waxak c'ual yalji no' xin, cax che yak'on no' ayin.

³¹ Wet e yayji ayex ti'. Yuj tu' c'am che chi' chibejal no no' tol mak'bil cam yuj no chiwajwom no'; palta a bay no tx'i' che yak'a'.