Ex 18 - A Txꞌan Biblia Yin Kꞌanjobal 1989

Max betic' cham Jetro yulanen Moisés

¹ A cham Jetro is ni' Moisés, sacerdote yayji bay Madián. Max yab cham yuj jantak tzet max yun Dios yetok Moisés, c'al yetok conob Israel yet max yion eltek Dios eb bay Egipto.

² Cax yak'nakxa meltzoj cham Moisés xal Séfora is yetbi bay cham Jetro, yetok cawan eb is c'ajol, maxax chalay eb yuj is ni' tu'.

³ A nak babel c'ajol cham chi yik Gersón*fn* yujtol max yal cham Moisés: Ec'jabwom c'al wayji bay xol eb tx'ok conobal, ẍi cham.

⁴ Axa nak yet is cab chi yik Eliezer*fn* yujtol max yal cham: A is Diosal in mam wetok, a max in colon el bay ch'en yespada cham reyal Egipto, ẍi cham.

⁵ Axa yet max yaben cham Jetro tol a bay takin tx'otx', a tu' ay is campamento cham Moisés bay yich witz bay max tx'ox ba Dios, a bay tu' max toj cham Jetro tu' yiloni, ibil oc xal Séfora yetbi Moisés tu' yuj cham, yetok eb is c'ajol cawanil.

⁶ Max yalontok cham Jetro bay cham Moisés: —Ayin Jetro a ni' in ti', lanan wapni oc ach wiloni, ajun ix etbi wetok c'al yetok eb nak e yunin cawanil, ẍitok cham.

⁷ Yin wal aymanil max eltek cham Moisés chaon is ni' tu', max ay nojan cham satak, cax max tz'ubon el is ti'. Max lajwi yak'len eb cawil is c'ul xin, cax max octok eb bay yul is mantiado cham Moisés tu'.

⁸ Max yalon cham bay is ni' tu' tzet max utlay cham reyal Egipto yuj Jehová, yetokc'al masanil eb conob aj Egipto, yet max col-lay eltek eb conob Israel, cax max yalon pax cham yuj jantak yailal max yil yetok eb anima tu' bay yulak be, c'al tzet max yut colwaj ba Jehová yetok eb.

⁹ Caw wal max tzaloj aj c'ul cham Jetro yet max yaben is colwal Dios yin conob Israel, yet max colon eltek eb bay yul is k'ab eb aj Egipto.

¹⁰ Max yalon cham: —Al-layokab watx' k'anej bay Jehová Cham max ex colon el yul is k'ab eb aj Egipto, c'al yul is k'ab cham rey, max quex yion eltek yalan is chekbanil eb.

¹¹ A tinani' caw wal chi nachaj el wuj, tol a Jehová caw wal ec'ban yintak juntzanxa dios, yujtol max ex col-lay el yuj Cham yul k'ab eb aj Egipto, caxc'al caw wal max mimanej ba eb satak Cham, ẍi cham Jetro tu'.

¹² Max lajwi tu xin, cax max yak'on tz'a cham Jetro tu' jun no xajanbal bay Dios, c'al yak'on juntzanxa xajanbal. Max apni oc cham Aarón yetok eb yicham winakil conob bay ayic' cham is ni' Moisés tu', cax max low eb satak Jehová.

Max yaoc Moisés yopiso juntzan eb juez

¹³ Axa yet junxa c'ual xin, max ay chotan cham Moisés, max c'oli beyc'ulnen el is cawxinakil eb conob; masanil c'u ayc'al ec' eb anima tu' satak cham.

¹⁴ A yet max yilon cham Jetro tzet chi yut cham Moisés yin watx'nen el k'anej eb anima tu', max yalon cham bay: —¿Tzet yuj xan caytu' chot eb anima axca tu'? ¿Tzet yuj xan asan ach cha watx'nej is k'anej masanil eb anima ti'? Ay eb toc'al chi ec' is tiempo yechbanen masanil c'u, ẍi cham.

¹⁵ Max tak'wi cham Moisés: —Chi jayoc masanil anima ayin yuj in k'anlen bay Dios tzet chi yun watx'ji el is k'anej eb.

¹⁶ C'al yet chi yak'len eb owal cax chi jayoc eb ayin, cax chin beyc'ulnen elok mactxel chi ec' yiban, c'al mac yel chi yala', chi lajwi tu' cax chi walon is chekbanil c'al is cuybanil Dios bay eb, ẍi cham.

¹⁷ Cax max yalon cham is ni' tu' bay: —Man watx'ok axca chot tu'.

¹⁸ Caw wal chach c'unbitok cax chi c'unbi c'apaxtok eb anima ti'. Yelxac'al chi ec' yiban a mulnaji, yetok c'apaxok maj ach tzakay a tx'oklil.

¹⁹ Ab tzet ok wal ayach, a Dios ok colwaj etok. Tutun tol ach chach oc satak Dios yuj eb anima, cax chaon oc is k'anej eb satak Cham.

²⁰ Watx' tol cha cuy eb yin ley Jehová, cax chaloni tzet chi yun beytok eb, c'al tzet chi yun eb.

²¹ A wal junok tzet chon tinani', tol cha sic' jaywanok eb nak chi xiw bay Dios, eb tol watx', tol tojol is nabal, tol man comonok chi k'anil eb tumin yin anima; cax chak'on is yikbej eb yiban junjunok bulan anima. Ay eb chaoc yajawilok junok mil anima, ay pax eb chaoc yajawilok junok cien anima, ay pax eb xin, asan junok 50 anima bay chi oc eb yajawilal, ay c'apax eb xin, asan lajonwanok bay chi oc eb yin yajawilal.

²² A eb nak ti' chi beyc'ulnen el eb anima yin is mul tzanc'al tzet yorail. A yin axca tu' ok colwaj eb yion el jun mulnajil ti' janic'ok eban. Ta txennejc'al yayji oc jun k'anej tu', chi watx'nej ay eb. Ta miman yayji oc xin, catatu' chi yiontek eb a satak. Ta caytu' ok otej, ok colwaj eb yion el jun mulnajil ti' janic'ok eban.

²³ Ta chekej onen jun ti', cax ta chi cha c'apax c'ul Dios tol axca tu' chi yunej, caytu' ok yun techaj oj, yetok c'apaxok, a eb anima ti' ok meltzoj eb yin tzalojc'ulal bay cajan, ẍi cham Jetro tu'.

²⁴ Cax max yiken cham Moisés bay tzet max yal is ni' tu'.

²⁵ Yuj tu xin, max sic'on el cham eb caw wal aj nabal, eb jelan xol eb israel, cax max yaon oc cham is yikbej eb yiban junjun mil anima, yiban cien anima, yiban 50 c'al yiban lajonwan.

²⁶ A eb nak tu' ayoc yiban yin beyc'ulnen eb anima. Axa pax k'anej yel miman yayji ocok, chi ilaytok bay satak cham Moisés. A pax k'anej txennej yayji oc xin, a eb chi watx'nen elok.

²⁷ Max yalon tojcan ba Moisés bay is ni', axa cham niej tu' max meltzoj bay is conob.