Ester 9 - A Txꞌan Biblia Yin Kꞌanjobal 1989

Yayc'aybal eb yajc'ul eb israel

¹ A yet 13 waay yet is lajcaweb xajaw, a ton xajaw Adar, a ton jun c'ual tu' txequelxa yayji yet chi yuncan el tzet chi yal tx'an chekbanilej yet cham rey, a ton wal yet jun c'ual tu' chi ayc'ay eb israel yuj eb ajc'ul yaloni. Axa max yun xin, maj eloc axca tu', palta tol axa eb max ayc'ay yuj eb israel tu'.

² A bay masanil yul is makbej cham rey Asuero, max wajbaj oc ba masanil eb israel bay conoblak bay ayic' eb tu', cax max oc eb yak'on owal yin eb max yochej tol max ak'on c'ayil eb tu'. Tok ayto junok max tec'baj ba satak eb israel tu', yujtol mayal oc xiwc'ulal xol eb anima masanil.

³ Masanil eb mimek yajaw ayoc yulak departamento, c'al eb tol mimek yayji oc yikbej yul is makbej cham rey tu', max yaoc ba eb yetok eb israel yujtol caw wal chi xiw eb bay cham Mardoqueo.

⁴ Yujtol a cham tu', caw wal miman yajaw yayji bay is despacho cham rey; mayal toj is k'umal bay masanil departamento, junjunc'al c'u chi aj can is yikbej.

⁵ Max yak'on lajwok eb israel tu' eb ajc'ul yetok espada. Max ak'lay lajwok eb masanil, max yun wal eb axca wal max yochej c'ul.

⁶ Bay conob Susa max mak'lay cam 500 winak yuj eb israel.

⁷ Max mak'lay c'apax cam Parsandata, Dalfón, Aspata,

⁸ Porata, Adalía, Aridata,

⁹ Parmasta, Arisai, Aridai c'al Vaizata,

¹⁰ a ton eb lajonwan is c'ajol Amán is c'ajol Hamedata, jun yajc'ulben oc eb israel, palta c'am wal janic'ok is tzetak yetal eb mayal cam tu', max mitx' eb.

¹¹ A yet jun c'ual tu', a yet max yaben cham rey jantak wal bisil eb anima max cam bay conob Susa bay cajan cham,

¹² cax max yalon cham bay reina Ester axca ti': —A eb et conob mayal mak'cam eb 500 winak yetok lajonwan is c'ajol Amán bay conob Susa ti'. ¿Tzet xam wal max uj pax bay juntzanxa conob bay yul in makbej ti'? Al tzet chi yochej a c'ul cax ok wak'on ayach, ẍi cham.

¹³ Max tak'wi xal Ester axca ti': —Ta wal chi cha a c'ul mamin rey, chi je' chala' tol chi yun pax eb wet conob bay conob Susa ti' junelxa yet yecal axca mayal yun eb tinani' atac'ala' yalon a ley; cax chalon c'apaxok, tol chi aj locan is mimanil eb lajonwan is c'ajol Amán yin te te', ẍi xal.

¹⁴ Max yalon cham rey tol chi yun axca tu'. Max al-lay el jun orden tu' bay masanil yul conob Susa. Axa locbalay aj is mimanil eb lajonwan is c'ajol Amán tu'.

¹⁵ Masanil eb israel cajan bay conob Susa max wajbaj pax oc ba eb yet 14 waay xajaw chi yik Adar, cax max mak'on cam eb junxa 300 winak. Palta c'amc'al jabok is tzet yetal eb anima tu' max mitx' eb.

^16-17 A masanil eb israel cajan bay juntzanxa departamento max wajbaj c'apax oc ba eb yet 13 waay xajaw tu', yin taynen ba yuj colon ba eb yul k'ab eb ajc'ul. Max yak' lajwok eb 75,000 eb ajc'ul tu', palta c'amc'al janic'ok is tzet yetal eb max mitx' eb, axa yet 14 waay xajaw tu xin, max xew eb, max low eb yin tzalojc'ulal.

¹⁸ Yujtol a eb israel cajan bay Susa tu', max wajbaj ba eb yet 13 waay xajaw c'al yet 14, xan axa yet 15 waay xajaw tu xin, max xew eb, max chaon eb k'in c'al yoc loj yuj eb yin tzalojc'ulal.

¹⁹ Axa pax eb israel cajan bay conoblak c'al bay aldealak tol c'amoc is murallail yinlak, a yet 14 waay xajaw Adar, chi chaon eb k'in yin tzalojc'ulal, chi salen eb tzetak yetal bay junjun.

K'in yet Purim

²⁰ Max chek cham Mardoqueo tz'ibelay masanil juntzan tzet max uj ti', cax max yaontok carta bay masanil eb yet israelal cajan bay masanil yul is makbej cham rey Asuero, bay eb cajan bay cawilal c'al bay eb cajan bay najat.

²¹ Max yalon c'apaxok tol junjunc'al abil yet 14 c'al 15 waay xajaw Adar yowalil chi chalay k'in.

²² Yujtol a yet juntzan c'ual tu' max yak' lajwok eb israel eb is yajc'ul. A yet jun c'ual tu' t'inan chi ok' eb c'al yel yaw eb cami, axa max yun xin, max q'uexchaji, yinxa loj c'al tzalojc'ulal max yuncan ajok, xan chi cha eb k'in yet juntzan c'ual tu', chi salen eb tzetak yetal bay junjun, c'al yak'on eb colwal bay eb meba'.

²³ Axa eb israel xin, max ocxac'al can jun ley max yal Mardoqueo tu' is beybalok eb.

²⁴ Yujtol a Amán is yajc'ulben masanil eb israel max yaoc suerte yuj tzet c'ual chi lajwi el eb masanil yuj.

²⁵ Palta yujtol max apni oc xal Ester k'anjab bay cham rey, xan max tz'ibej cham chekbanilej tol a masanil yobtakil max na' Amán yin eb israel tu', a yiban chi tojcan masanil, xan max aj locan Amán tu' cax max aj c'apax locan masanil is c'ajol.

²⁶ Yuj tu' xan a juntzan c'ual tu' chi yik c'ual Purim. A jun k'anej tu' chi yal elapnok juntzan tzet yetal chi k'an eb yin suerte. Yuj tu xin, atac'ala' yalon tx'an carta cham Mardoqueo, c'al tzet max yil eb,

²⁷ xan a eb israel max ocxac'al can juntzan tu' is beybalok eb yetok is yinatil, yetokc'al masanil eb chi yaoc ba yin israelal yetok eb. Yowalil chi cha eb cab c'ual k'in tu' yet junjun abil, axca c'ual max nalaycanok, atac'ala' tzet max yun yal-layi.

²⁸ Max canxac'al can jun tu' yin junelnej, tol a masanil yinatil eb israel bay yulak masanil departamento, c'al yulak masanil conob, tol yowalil chi nalaytek c'al chalay k'in yet Purim yin juntzan c'ual tu' yin tojbalk'inal.

²⁹ Axa pax reina Ester xin, xal is cutz'in Abihail, c'al Mardoqueo cham israel yetok wal yikbej eb, max tz'iben eb junxa carta yuj k'in yet Purim, yet chi alay oc yip tx'an babel carta,

³⁰ cax max yaontok bay masanil eb yet israelal cajan bay 127 departamento ay yul is makbej cham rey Asuero. Max tz'ibejtok cawilc'ulej yin tx'an carta tu',

³¹ cax max al-layi tol yowalil chi chalay k'in yet Purim yet is c'ual tol txequelxa yayjicanok axca wal max yun yalon cham Mardoqueo yetok reina Ester. Yowalil chi yikej eb c'al is yinatil eb c'apaxok yuj nalaytek is lajubal c'ajbanc'ulal c'al cusc'ulal.

³² A jun chekbanil max yak' xal Ester, a ton wal chi alon tzetbil wal chi yun chalay k'inal Purim, a jun ti' max tz'ibelaycan yul jun tx'an un.