Ester 6 - A Txꞌan Biblia Yin Kꞌanjobal 1989

Ibilcanilal cham Mardoqueo

¹ A wal yet jun ak'bal tu' caw wal maj oc is wayan cham rey, xan max yala' tol chi ilaytek tx'an un bay chi yal masanil tzet yetal maxax ec'tok bay nación tu', cax max awtelay aj tx'an satak cham.

² C'uxanc'al max ilchaj yul tx'an bay chi yala' tzetbil tol a Mardoqueo max alon tzet yetal max na' Bigtán c'al Teres, taynemal puertail despacho cham rey yet max naon eb tzet ok yun yak'on cam eb cham rey Asuero tu' yaloni.

³ Yuj tu' xan max k'anlej cham rey bay eb ayoc yopiso yuj cham bay tu': —¿Tzet yetal max ak'layi c'al tzet yetal max utlay Mardoqueo yuj jun tzet max yun ti'? ẍi cham. Max tak'wi eb: —C'am wal jabok tzet yetal max ak'lay bay, ẍi eb.

⁴ Max yalon cham rey axca ti': —¿Mactxel ayic' bay yina tu'? Asek e yila', ẍi cham. A yet tu' lanan jayoc Amán bay yamak'il is despacho cham tu', yet chi ul yal bay cham rey tzet chi na' tu' yaloni, tol chi alay aj locan Mardoqueo bay yin jun te' mayal watx'nej tu'.

⁵ Xan max yal eb chekbej bay cham rey: —A cham Amán ayic' bay yina tu', ẍi eb. Max yalon cham rey tol chi awtelay octek bay yul despacho tu'.

⁶ Axa yoctok Amán tu xin, max k'anlen cham rey bay axca ti': —¿Tzet yetal yowalil chi utlay junok winak tol chi yochej in c'ul chi wi can? ẍi cham. Cax max naon Amán axca ti' yuj yibanil aj can yaloni: ¿Macto wal junokxa ok yi can cham rey palta ayin toni? ẍi.

⁷ Xan max tak'wi axca ti': —A tzet yetal moj yutlay junok mactxel tu',

⁸ tol chi ilaytek junok a pichil cha k'an yin opiso ti' mamin rey, c'al no chej cha k'an c'apaxok. A yin jolom no' tu' chi oc jun yelbub axca corona chi tx'oxon tol et no'

⁹ cax chi ak'lay bay junok eb yajaw tol mimek yopiso ti', axa jun tu' chi aon oc an pichilej tu' yin junok mac chochej chi ilay can tu', c'al yalay ajtok yiban chej tu', cax chi quetzlay no chej tu' yulak calle c'al bay txonbal, cax chi awji satak jun tu' axca ti': ¡Axca wal ti' chi utlay junok winak tol chi cha c'ul cham rey yion can! ẍi cham Amán.

¹⁰ Lajwi tu xin, max yalon cham rey bay Amán axca ti': —Asi' yin aymanil xin, itok an in pichil tu' c'al no chej, axca wal max yun alon tu', caywal tu' chot yin Mardoqueo nak israel, nak chotan ay bay is puertail in despacho. C'am wal junok tzet yetal max al tu' tol man ok onej, ẍi cham.

¹¹ Yuj tu' max yitok cham Amán an pichilej tu' c'al no chej, axa yaon oc an yin cham Mardoqueo tu'. Lajwi tu xin, max quetzon ec' no' bay yulak calle c'al bay txonbal, max el yaw satak, max yalon axca ti': ¡Axca wal ti' chi yun yilay aj can junok mactxel chi yochej c'ul cham rey chi yi can! ẍi.

¹² Max lajwi yilay ec' Mardoqueo tu' yuj xin, axa tojcan Mardoqueo tu' bay puertail despacho tu' junelxa, axa Amán xin, max toj pax can yin aymanil bay yatut, cusiltakxac'al c'ul max makchen el is sat yuj q'uixwilal.

¹³ Max yalon bay yistzil c'al bay eb yamigo aj nabal masanil tzet yetal max utlayi, xan max yal eb axca ti': —Yujtol israel jun Mardoqueo tu', lanan lajwi ay ekbej yintak. Man ok ayc'ay oj xin, palta ach ti' ok ach ayc'ay yuj chi yal tu', ẍi eb.

¹⁴ C'amtoc'al chi lajwi k'anjab tu', cax max apni oc eb is chekbej cham rey yinxac'al aymanil, yet chi ilaytok Amán yuj eb bay jun miman loj max watx'nej xal Ester.