Ester 10 - A Txꞌan Biblia Yin Kꞌanjobal 1989

Is mimanbilal Mardoqueo

¹ Max yaoc cham rey Asuero jun tojlabal yiban masanil anima yul is makbej masantac'al bay tilak a' mar.

² Masanil tzet max yun cham yetokc'al yikbej, c'al yabixal tzetbil wal max yun yak'on cham jun miman ikbej bay cham Mardoqueo. A juntzan tu' max tz'ibelaycan yul libro tzet max uj yul is makbej Media c'al Persia.

³ A Mardoqueo tu' max occan yin yet is cab yajawil yetok cham rey Asuero. Caw wal miman winak max yun yelapnok xol eb yet israelal. Caw wal ochebil yuj masanil eb is yet conob tu', yujtol max sayic' is watx'il eb is yet conob, cax max yak'on wal yip yet watx' chi ayji ec' eb yin watx'il.