Esdras 7 - A Txꞌan Biblia Yin Kꞌanjobal 1989

Max apni oc Esdras bay Jerusalén

¹ Max lajwi tu xin, a yet ayoc Artajerjes yin reyal bay Persia, a yet tu' ay jun winak chi yik Esdras. A ton eb is yichmam ti': Seraías, Azarías, Hilcías,

² Salum, Sadoc, Ahitob,

³ Amarías, Azarías, Meraiot,

⁴ Zeraías, Uzi, Buqui,

⁵ Abisúa, Finees, Eleazar, c'al Aarón a ton cham babel sacerdote.

⁶ Meẍtol yayji Esdras ti' yin is ley Jehová is Diosal Israel, a ton jun ley yak'nak Jehová bay cham Moisés. Yujtol max colwaj Jehová yetok, xan max yak' rey Artajerjes masanil tzet max k'ana'. Lajwi tu' max meltzojtek Esdras bay Babilonia.

⁷ Max jayoc bay Jerusalén yetok jun bulan eb yet israelal, eb sacerdote, eb levita, eb chi bitni, eb taynem puerta, c'al yetok eb chekbej yet templo. Max uj jun ti' yet ukebxa abil yoc Artajerjes yin reyal.

^8-9 Max colwaj is watx'c'ulal Dios yetok, xan max tit bay Babilonia yet wal babel c'ual, yet babel xajaw, yet ukeb abil yoc Artajerjes yin reyal. Max apni oc bay Jerusalén yet babel c'ual yet is so' xajaw yet is suk abil tu'.

¹⁰ A wal is nabal Esdras tol ok cuy wal is ley Dios, c'al beybalneni, cax ok cuylay eb israel tu' yuj yin ley tu'.

¹¹ A ton jun is copiail tx'an un max yak' cham rey Artajerjes bay Esdras sacerdote, tol cuywinak yin is ley Jehová, c'al is chekbanil ak'bil bay Israel:

¹² Ayin Artajerjes in, reyal in eb rey, chi wak' cawil a c'ul, ach Esdras, sacerdote c'al meẍtol ach, caw wal cuywinak ach yin ley cham Diosal satcan.

¹³ Max walil bay masanil eb israel ayic' bay yul in makbej ti', ta chi je' c'ul eb toj bay Jerusalén etok, mawal axca eb sacerdote ma eb levita, tokokab eb.

¹⁴ Ayin ti', yetok eb ukwan chi lajtinen k'anej wetok, chach jatok ela' tzetbil wal yayji bay Judá c'al bay Jerusalén tu', ta axca yalon is ley a Diosal ayoc yul a k'ab tu', caytu' yayji.

¹⁵ Itok ch'en plata c'al ch'en oro chi el yin co c'ul on jaontok bay e Diosal ayex israel ex tu', Cham ay is templo bay Jerusalén tu'.

¹⁶ I c'apaxtok masanil ch'en plata, c'al masanil ch'en oro cha cha' bay eb anima bay yul yet Babilonia tu', c'al jantak tzet chi el yin c'ul eb et israelal, c'al eb sacerdote yak'on yuj templo e Diosal bay Jerusalén tu'.

¹⁷ A yuj ch'en tumin tu' cax cha manon no wacax, no icham calnel, c'al no ach'ejtak calnel, yetok masanil tzet yetal chi ak'lay yetok no', axca trigo, ma cebada, c'al vino chi oc yin xajanbalil bay altar yet templo e Diosal bay Jerusalén tu'.

¹⁸ Axa ch'en oro c'al ch'en plata chi cancan xin, okxa e yil tzet chi oc e yuj, atac'ala' tzet chi cha c'ul e Diosal.

¹⁹ A pax masanil net chi k'anlay yet chi oc ayilal bay templo Dios max ak'lay ayach, ach caw chak' bay a Diosal bay Jerusalén tu'.

²⁰ Tzanc'al tzet yetal chi oc yopiso oj bay yin is templo a Diosal tu' chi je' eon eltek is tojol bay in tesorería.

²¹ Ayin rey Artajerjes in ti' chi wal bay masanil eb tesorero bay yayubc'ual a' Éufrates: Ak'ek yin aymanil masanil tzet chi k'an Esdras sacerdote, c'al meẍtol cuywinak yin ley yet cham Diosal satcan.

²² Chi je' yak'lay 75 quintal plata, 300 quintal trigo, 550 galón vino, 550 galón aceite, c'al masanil atz'am chi k'ana'.

²³ Tzanc'al tzet chi k'an cham Diosal satcan yuj is templo, ayman chi ak'lay masanil, yet watx' c'am junok yailal chi jayoc wiban, c'al yiban wuninal, c'al yiban masanil in makbej.

²⁴ Cax che yaben cantok tol c'am che k'an ch'en tojlabal c'al waj tumin ma junokxa tojlabal bay eb sacerdote, bay eb levita, bay eb chi bitni, bay eb taynem puerta c'al bay masanil eb ayoc yalan is chekbanilal yet templo Dios.

²⁵ Axa pax ach ti' Esdras, atac'ala' a jelanil ak'bil yuj Dios, aoc eb juez c'al eb gobernador chi watx'nen el masanil is k'anej masanil anima ay bay yayubc'ual a' Éufrates. A eb tu' yowalil chi yojtaknej el eb is ley a Diosal tu'; a mac man ojtaknenok ley tu' cha cuyu'.

²⁶ A mac c'am chi iken is ley a Diosal tu' c'al in ley, ayman chi alay oc yailal, ma chi cami, ma chi ilay el yul conobal tu', ma chi ilay ec' tzet yetal ay bay, ma chi oc preso, ẍi cham rey yin tx'an carta tu'.

Is txaj Esdras

²⁷ Max lajwi tu xin, max txajli Esdras: Al-layokab watx' k'anej yin Jehová co Diosal yetok eb jichmam, yujtol a Cham max ak'on yun cham rey tol miman yelapnok templo Jehová bay Jerusalén.

²⁸ Yuj is watx'c'ulal Jehová, xan watx' in yul sat cham rey, c'al yul sat eb chi lajtinen k'anej, yetokc'al yul sat masanil anima ay is may yayji oc yikbej bay is c'atan. Yuj tu' xan max in tec'baj in ba in wajban oc eb ikbajwom yayji oc yin is yinatil eb wet israelal, yuj meltzojtok eb wetok, ẍi Esdras.