Esdras 4 - A Txꞌan Biblia Yin Kꞌanjobal 1989

A eb ajc'ul max tenoc wanaj eb mulnajil

¹ A yet max yaben aj eb ajc'ul yin Judá, c'al yin Benjamín, tol mayal meltzojtek eb max ilaytok yin presoal bay Babilonia, tol lananxa ca watx'nen aj eb is templo Jehová Diosal Israel,

² max toj il-lay cham Zorobabel yuj eb, c'al eb yajaw yayji xol yican. Max yalon eb axca ti': —Matawal chi el yin e c'ul che cha' co colwal e yetok yin ca watx'nebilal aj mulnajil ti', yujtol chi ja c'apax oc co ba yin ayilal bay e Diosal axca ex ayex ti'. Ataxc'al yet max on ilaytek cayti' yuj Esar-hadón, a ton reyal Asiria, atax yet tu' max c'oli jak'on co xajanbal bay e Diosal tu', ẍi eb.

³ Palta max tak'wi Zorobabel yetok Josué, c'al yetok juntzan eb yajaw yayji xol yican, max yalon eb axca ti': —C'am e yalon e yet yin ca watx'nebilal aj is templo co Diosal on. Asan on ayon ti' ok co ca watx'nej aj bay Jehová, co Diosal ayon israel on ti', yujtol caytu' max yun yalon Ciro reyal Persia, ẍi eb.

⁴ Yuj tu' max oc ijan eb ajc'ul tu' yak'on cabax aj c'ul c'al xiwaj masanil eb cajan bay Judá yet watx' c'amxa chi ca watx'nen aj eb jun templo tu'.

⁵ Max yak' eb montebal tumin bay juntzan eb mimek yopiso xol eb persa, yet watx' chi tenoc wanaj eb ca watx'nelay aj templo tu'. Cayc'al tu' max yut eb yet ayoc Ciro yin reyal bay Persia, masantac'al yul is tiempoal rey Darío.

⁶ A ton yet max chaon c'apax el Asuero yak'on reyal, max ak'wi queja eb yin eb cajan bay Judá c'al bay Jerusalén.

⁷ A yul is tiempoal Artajerjes reyal Persia, a Bislam, Mitrídates, Tabeel yetokc'al juntzanxa ajun yetok, max tz'ibej eb junok un bay cham Artajerjes. A tx'an un tu' max tz'ibelay yin arameo c'al yin letrail arameo.

⁸ A Rehum cham comandante, yetokc'al Simsai cham ajtz'ib, a ton eb tu' max watx'nen jun carta yuj yak'lay queja eb cajyom bay Jerusalén bay rey Artajerjes.

⁹ A ton tx'an carta ti' max yatok eb cawan tu' yetokc'al eb ajun yetok eb, a ton eb yajaw yayji, c'al eb ay yikbej titnak bay Persia, bay Erec, bay Babilonia, c'al bay Susa, yul makbej Elam,

¹⁰ yetokc'al bay juntzanokxa nación. A ton eb max ilay eltek bay is conobal yuj Asnapar tol mimanbil, max ilaytok eb yuj bay conob Samaria, c'al bay juntzanokxa conob bay yetc'ulal yayubc'ual a' Éufrates.

¹¹ Max yal tx'an un axca ti': Ayon a chekbej on, cajan on bay yetc'ulal yayubc'ual a' aej Éufrates chi co tz'ibej jun un ti' ayach mamin rey Artajerjes:

¹² Chi jaltok ayach mamin rey, tol a eb judío max a bekil yul juntzanxa a makbej, max jayoc eb tac'al bay Jerusalén, cax chi ca watx'nen aj eb jun conob tenomtak tol yelxac'al yob. Mayal chail eb yich watx'nen aj muralla, toxa ok lajwok yuj eb.

¹³ Chi jalon c'apaxtok ayach mamin rey, tatol a jun conob tu' ok ca watx'nelay ajok, c'al watx'ji aj is murallail, a juntzan anima tu' manxa ok yak' eb tojlabal, tamwal waj tumin ayach. Yuj tu' majxa oc tumin bay a tesorería.

¹⁴ Yujtol ayon ti', ayon oc ach jak'on serbil mamin rey, c'am chi yochej co c'ul tol axca tu' ok ach utlayok, yuj tu' xan chi jaltok juntzan ti' ayach mamin rey,

¹⁵ yet chi saylay il bay yul archivo yet eb echmam. A bay tu' ok el mamin rey, yuj tzet chi jaltok ti', cax ok nachaj el oj, tol a jun conob tu' caw wal tenomtak, tol ay is may yin eb rey, c'al yin juntzanxa conob, tol a yuj max waj ba eb yin tenomtakilal, xan max uchlay lajwok jun conob tu'.

¹⁶ Yuj wal tu xin, xan chi jaltok ayach mamin rey, tatol chi ca watx'nelay aj jun conob ti', a yet ok watx'jok wal oc is murallail, axa yel ekbej bay yetc'ulal bay yayubc'ual a' Éufrates ti', ẍitok eb bay cham.

¹⁷ Lajwi tu xin, max yaontek cham rey Artajerjes paktzebal k'anej eb tu' axca ti': Ach comandante Rehum, c'al ach Simsai ajtz'ib, yetokc'al eb ajun e yetok bay Samaria c'al bay juntzanokxa conob bay yetc'ulal yayubc'ual a' Éufrates, chi wak' cawil e c'ul.

¹⁸ A tx'an un max e yatek ayin, watx' max yun yawtelay aj tx'an c'al coc'alnelay el in satak.

¹⁹ Max wala' tol chi saylay il-layok. Max ton ilchaj xin, tol a jun conob Jerusalén tu', caw wal tenomtak max yut ba bay eb rey yet yalantok, max wajbaj oc ba eb yin tenomtakil yin eb rey tu'.

²⁰ A yet tu' ay eb reyal Jerusalén caw wal jelan, max ayji yikbej yiban tx'otx' tx'otx' bay yetc'ulal yayubc'ual a' Éufrates, max tojlanej eb anima bay tu' tojlabal c'al waj tumin bay eb.

²¹ Yuj tu' xan alek bay juntzan winak tu' tol chi oc wanaj eb yin mulnajil tu', masantac'al ayin ok wala'. C'amto okabc'al chi ca watx'nelay aj jun conob tu'.

²² Man toc'alok che yiloc jun tu' yet watx' c'am chi etax el yul co makbej ti', ẍitok cham rey.

²³ A yet max awtelay aj tx'an carta cham rey Artajerjes satak cham comandante Rehum, c'al satak cham ajtz'ib Simsai, c'al satak eb ajun yetok eb, max toj eb masanil yin aymanil bay Jerusalén, max bet eb yak'on pural eb judío yoc wanaj yin mulnajil.

²⁴ Caytu' max yun yoccan waan ca watx'nelay aj templo Dios bay Jerusalén, masantac'al yet is cab abil yoc Darío yin reyal bay Persia.