Esdras 10 - A Txꞌan Biblia Yin Kꞌanjobal 1989

Max ilay el eb ix ix tx'ok conobal xol eb

¹ Yak'ban chi txajli cham Esdras, c'al yalon masanil juntzan ti', cax chi ok'i, jajan ay bay satak templo Dios, max oc oyan jun miman bulan eb yet israelal yin, eb winak, eb ix ix, c'al eb unin. Caw wal chi ok' c'apax eb yetok.

² Lajwi tu', a Secanías c'ajol Jehiel yin yinatil Elam, max k'anjab bay Esdras axca ti', max yaloni: Ayon ti' caw wal man ikemok on bay co Diosal, yujtol max jilej co ba yetok eb ix ix tx'ok conobal, tx'ok is diosal, palta xin, ayto wal tzet watx' chi jut co ba, yet watx' chon ak'lay mimanc'ulal yuj co Diosal.

³ A tinani' xin, ok jak' co ti' tol ok co chek pax eb xal jistzil tx'ok conobal tu' yetokc'al yune' eb xal, tol ok jikej tzet chal ach ti', yetok juntzanokxa eb chi iken is chekbanil Dios etok. Yunokab axca yalon is ley Cham.

⁴ Yuj tu' xan ajan wanok. Ach ti' ay alon et a watx'nen el jun ti'. Ok on oc etok. Ak' ep, ocok on yin jun k'anej ti', ẍi.

⁵ Xan max aj wan cham Esdras, max yak'on eb is ti' satak Dios yuj cham, tol chi yun axca max yal Secanías. Xan max yak' eb sacerdote, eb levita, c'al eb yet israelal eb tu' is ti'.

⁶ Lajwi tu' max el cham Esdras bay satak templo, max toj bay is cuarto Johanán, a ton is c'ajol Eliasib. A bay tu' max ec' ak'bal yuj yin tol maj lowok tamwal yuq'uena', yujtol caw wal max cusc'ul yuj is mul eb meltzojnaktek yin presoal.

⁷ Lajwi tu' max oc jun awtebal bay masanil eb anima ay bay Judá c'al bay Jerusalén, yet chi wajbaj oc ba eb bay Jerusalén tu', masanil eb meltzojnaktek yin presoal.

⁸ Ta ay mactxel c'am chi apni oc yin yet yox c'ual, atac'ala' max yun yalon eb yajaw c'al eb aom oc nabalej, chi ilay ec' is tx'otx' cax chi ilay el xol eb meltzojnaktek yin presoal tu'.

⁹ Yuj wal tu xin, a yin oxebxa c'ual tu' max wajbaj oc ba bay Jerusalén masanil eb winak yet Judá c'al yet Benjamín, a ton yet 20 waay yet is baloneb xajaw. Max apni oc eb masanil bay templo Dios; caw wal chi bil eb yuj xiwilal yuj jun k'anej tu', c'al yuj nab chi ayi.

¹⁰ Lajwi tu xin, max aj wan cham sacerdote Esdras max yalon bay eb axca ti': —Ayex ti' max oc e mul yujtol max e yilej e ba yetok eb ix ix tx'ok conobal. Caytu' max yun e yiontek yobtakil jiban.

¹¹ Yuj wal tu xin, alek ajtek e mul satak wal is Diosal eb jichmam jetok cax che yiken yochwan Cham. Pojek el e ba xol eb anima tx'ok conobal cajan co cawilal ti', c'al e bekoncan eb xal ix tx'ok conobal tu', ẍi cham Esdras.

¹² Masanil anima tu' max aj yaw yin ipejal, max yalon axca ti': —Ok jikej junen axca chal tu'.

¹³ Palta c'amc'al chi bek pax yak'on nab. C'am chi je' co cancan bay yulak calle ti', yujtol a jun k'anej ti', man asanok jun cabok c'ual ok yitok, yujtol xiwil on max oc co mul axca tu'.

¹⁴ Watx' mi tatol asan eb co yajawil chi cancan cayti' yin watx'nencan el jun k'anej ti'; axa masanil mactxel cajan bay yulak co conobal, tol max yilej ba yetok eb ix ix tx'ok conobal tu', chi jayoc eb yet junok c'ual tol txequel chi yuncanok, ibilokab oc eb yuj eb juez, c'al yuj eb yicham winakil conob tu'. Cac'al tu' ok jun co masanil, masantac'al ok yal tan yowal c'ul co Diosal jin, yuj jun k'anej ti', ẍi eb.

^15-16 A masanil eb meltzojnaktek yin presoal max cha c'ul eb jun k'anej tu', palta asan Jonatán c'ajol Asael, yetok Jahasías, c'ajol Ticba maj cha c'ul eb. Max oc c'apax Mesulam c'al Sabetai levita yetok eb. Yuj tu' max yaoc cham sacerdote Esdras juntzan eb winak tol yajaw yayji xol eb yican. A ton yet babel c'ual yet lajoneb xajaw, a masanil juntzan max yaoc tu' max waj ba eb masanil yul despacho yuj beyc'ulnen eb junjun k'anej.

¹⁷ Axa yet babel c'ual yet babel xajaw, a yet tu' max lajwi beyc'ulnen eb masanil eb max yilej ba yetok eb ix ix tx'ok conobal tu'.

¹⁸ A ton listail eb max yilej ba yetok eb ix ix tx'ok conobal tu': A xol yinatil eb sacerdote c'al xol eb yican Josué, c'ajol Josadac: a ton Maasías, Eliezer, Jarib c'al Gedalías.

¹⁹ A eb tu' max yak' wal eb ti' chekon pax eb xal ix tu', max yak'on eb junjun no icham calnel yin ofrendail yuj is mul.

²⁰ Xol eb yinatil Imer: a ton Hanani c'al Zebadías.

²¹ Xol eb yinatil Harim: a ton Maasías, Elías, Semaías, Jehiel c'al Uzías.

²² Xol eb yinatil Pasur: a ton Elioenai, Maasías, Ismael, Natanael, Jozabad c'al Elasa.

²³ Axa xol eb yinatil eb levita: a ton Jozabad, Simei, Kelaía, (ac'al oc chi yik Kelita) Petaías, Judá c'al Eliezer.

²⁴ Axa xol eb chi bitni: a ton Eliasib. Xol eb taynem puerta: a ton Salum, Telem, c'al Uri.

²⁵ Axa xol juntzanxa eb yet israelal, a ton eb ti' max yilej ba yetok eb xal tx'ok conobal tu': a xol is yinatil Paros: a ton Ramía, Jezías, Malquías, Mijamín, Eleazar, Malquías, c'al Benaía.

²⁶ Axa xol eb yinatil Elam: a ton Matanías, Zacarías, Jehiel, Abdi, Jeremot c'al Elías.

²⁷ Axa xol eb yinatil Zatu: a ton Elioenai, Eliasib, Matanías, Jeremot, Zabad c'al Aziza.

²⁸ Axa xol eb yinatil Bebai: a ton Johanán, Hananías, Zabai c'al Atlai.

²⁹ Axa xol eb yinatil Bani: a ton Mesulam, Maluc, Adaía, Jasub, Seal c'al Ramot.

³⁰ Axa xol eb yinatil Pahat-moab: a ton Adna, Quelal, Benaía, Maasías, Matanías, Bezaleel, Binuy c'al Manasés.

³¹ Axa xol eb yinatil Harim: a ton Eliezer, Isías, Malquías, Semaías, Simeón.

³² Benjamín, Maluc c'al Semarías.

³³ Axa xol eb yinatil Hasum: a ton Matenai, Matata, Zabad, Elifelet, Jeremai, Manasés c'al Simei.

³⁴ Axa xol eb yinatil Bani: a ton Madai, Amram, Uel,

³⁵ Benaía, Bedías, Queluhi,

³⁶ Banías, Meremot, Eliasib,

³⁷ Matanías, Matenai c'al Jaasai.

³⁸ Axa xol eb yinatil Binuy: a ton Simei,

³⁹ Selemías, Natán, Adaía,

⁴⁰ Macnadebai, Sasai, Sarai,

⁴¹ Azareel, Selemías, Semarías,

⁴² Salum, Amarías c'al José.

⁴³ Axa xol eb yinatil Nebo: a ton Jeiel, Matatías, Zabad, Zebina, Jadau, Joel c'al Benaía.

⁴⁴ A masanil juntzan ti' max yilej ba eb yetok eb xal ix tx'ok conobal, ay eb ayxa yuninal yetok eb xal tu'.