Ec 9 - A Txꞌan Biblia Yin Kꞌanjobal 1989

A tzet chi jut co ba yak'ban iquis on

¹ Max in oc wal ijan yin in beyc'ulnen masanil juntzan ti', max nachaj el wuj, tol a yunben eb watx', c'al eb aj nabal, a yul k'ab Dios ayocok. C'am jabok yojtak eb tzet ay satak eb, ma tol camc'ulal ma xin ajc'ulal.

² Axa chi yuncan aj xin, jun lajanc'al chi yun yelcan apnok. Jun lajanc'al chi yun eb tojol, c'al eb man tojolok, eb watx' c'al eb man watx'ok, eb ayilwom c'al eb man ayilwomok, eb chi yak' xajanbal, c'al eb c'am chi yak' xajanbal. Lajanc'al junok watx' yetok junok yobtakwom, mac chi locbaj bi Dios, c'al mac c'am chi locbaj bi Cham.

³ A xol masanil tzet chi uj bay yulyibank'inal ti', ay tzet tol caw wal man is mojok, a ton yujtol lajanc'al chi yun lajwi ay eb anima masanil. Yetok c'apaxok, a is nabal masanil anima, asan yin yobtakilal ay ocok, yak'ban iquis ec' eb, lemẍic'al chi jay camich, cax chi lajwi.

⁴ Yuj tu' xan yob jun tu', yujtol asan yet iquisto eb anima, chito je' naon ba c'ul eb. Watx'to wal yet junok tx'i' iquis, yintak junok no coj camnakxa.

⁵ Yetok c'apaxok, a eb iquis, yojtak eb tol ok cam eb, a pax eb camnak xin, c'amxa tzet yetal yojtak eb, tamwal ayto tzet chi yi eb, toltax chi tojcan eb c'ayc'ulal yuj eb anima.

⁶ A bay mukbanil camnak tu' chi lajwi is camc'ulal eb, is chichonc'ulal eb, c'al masanil yobtakilal chi yun eb, tok ayto bay ay yalon yet eb yin masanil tzet yetal chi uj bay yulyibank'inal ti'.

⁷ Tonek, jak'ek tzalojbok co c'ul yin co lobej, c'al yin juc'a', yujtol a tinani' chi cha' c'ul Dios tzet chi junej.

⁸ Co pich co ba yetok sak pichilej. Jaoc perfume yanilok co jolom.

⁹ Nabac'al masanil juntzan c'ual chi yak' Dios ayon, yuj tu xin, asan chon tzaloj yetok ix jetbi camc'ulnebil juj, yujtol asan jun ti' co satak yayji ocok, c'al co paktzebal yin co bilc'ulal bay yulyibank'inal ti'.

¹⁰ A masanil tzet yetal chi je' co watx'neni, co watx'nejc'al yin masanil co c'ul, yujtol a bay mukbanil camnak bay ok on tokcanok, a bay tu' c'amxa tzet ok je' juneni, tamwal co naoni, c'amxa ojtakbilal tamwal jelanilal bay tu'.

A tzet man tojolok chi uji

¹¹ Ay janic'okxa tzet yetal max wil bay yulyibank'inal ti': Man masanilok eb jelan beyi tol babel chi apni; man masanilok eb jelan yak'wi owal chi ayc'ay owal tu' yuj; man masanilok eb aj nabal, watx' chi ec' tiempo yuj, man masanilok eb jelan nabal chi oc beyomal, tamwal masanil eb cuywinak, chi oc yin mimek ikbej. Junjunc'al yetok tzet chi chaloj yuj.

¹² Yetok c'apaxok, c'am mac yojtak bak'in ok apnok is yorail. Axca chi yun can no txay yul txim, c'al no tz'iquin yul yal, caytu' eb anima, c'am tzet naan yuj cax chi jayoc junok cawxinakil yiban eb yin jun bekal.

¹³ Yetok c'apaxok, ay wal tzet yetal max wil bay yulyibank'inal ti', tol chi tx'oxtek junok miman cuybanilej:

¹⁴ Max wil junok yaliẍ conob, tol txennej anima cajan bay, axa junok rey tol xiwil is soldado max oc oyan yinlak yuj yak'on owal.

¹⁵ Palta a bay jun yaliẍ conob tu', a tu' cajan junok meba' winak, asan xin tol caw wal aj nabal. A yuj is yajnabalil tu', xan max mi je' colon el jun conob tu', palta tok ay mac max cha yabej c'al yikeni.

Ec'ban yelapnok jelanilal

¹⁶ Caxc'al mi a is yajnabalil junok winak tol meba' tu', c'am yelapnok yul sat anima, xan c'am chi chalay ablay tzet chi yala', palta xin, ayin ti' chi wala', tol yelxac'al ay yelapnok junok aj nabal, yintak junok tol tec'an chi yut ba.

¹⁷ Yelxac'al watx' jaben is k'anej junok aj nabal bay numumi, yintak pax jaben yel yaw junok reyal eb c'am nabal.

¹⁸ Yel miman yelapnok jelanilal, yintak mitx'k'abej yet owal. Yelxac'al miman tzet yetal chi etaxtok yuj junok anima man watx'ok chi yunej.